Kigali-Rwanda

Partly sunny
26°C
 

Amagare: Ikipe y’u Rwanda yiteguye kwitwara neza muri Gabon

Yanditswe na BUGINGO FIDELE

Ku ya Jan 15, 2018

Uyu munsi

Kango-Lambaréné (146 km)

Uyu munsi tariki 15 Mutarama 2018 ni bwo hatangira isiganwa ry’amagare rya mbere muri Afurika “La Tropicale Amissa  Bongo 2018”. Intera ya mbere irava ahitwa Kango isorezwe ahitwa Lambaréné mu bilometero 146.

Abakinnyi b’ikipe y’u Rwanda bari kumwe n’umutoza Sempoma Felix

Iri rushanwa ryitabiriwe n’ikipe y’u Rwanda igizwe n’abakinnyi 6 ari bo Areruya Joseph, wegukanye Tour du Rwanda 2017 akaba akinira ikipe ya kabiri ya Dimension Data for Qhubeka hari kandi  Ndayisenga Valens wegukanye Tour du Rwanda 2014 na 2016, Uwizeyimana Bonaventure, Ukiniwabo René Jean Paul, Ruberwa Jean Damascène na Munyaneza Didier.

Mbere yo gusiganwa intera ya mbere y’iri rushanwa, umutoza w’ikipe y’igihugu, Sempoma Felix yatangaje ko abakinnyi bose bameze neza nta kibazo. Gusa avuga ko muri iki gihugu hashyushye cyane ariko ko baza kubimenyera. Anavuga ko intego y’abakinnyi bose ari ukwitwara neza.

Muri 2014,  iyi ntera  ubwo yavaga  Lambaréné  isorezwa Kango yari iya 5, Uwizeyimana Bonaventure yanditse amateka yegukana iyi ntera asize abandi ndetse aza no mu bakinnyi bakomoka muri Afurika babashije kwegukana intera muri iri rushanwa ubundi ryitabirwa n’amakipe akomeye ku mugabane w’u Burayi.

Aganira n’Imvaho Nshya mbere y’intera ya mbere iri rushanwa muri uyu mwaka wa 2018, Uwizeyimana Bonaventure usanzwe akinira ikipe  ya Benediction y’i Rubavu akaba yaranitwaye neza akegukana intera ya 5 muri  Tour du Rwanda 2017  yatangaje ko buri igihe aba yifuza kongera kwegukana intera muri iri rushanwa kandi ko yumva yifitiye ikizere ko ashobora kuzongera akitwara neza akayegukana.