Amagare: Ikipe y’u Rwanda yegukanye umudari wa Feza mu gukina abakinnyi bavanze

Yanditswe na BUGINGO FIDELE

Ku ya 04-03-2021 saa 21:27:33
Ikipe y'u Rwanda ubwo yari imaze kwegukana umudari wa Feza

Kuri uyu wa Kane taliki 04 Werurwe 2021, mu Misiri ahakomeje kubera shampiyona y’Afurika mu mukino wo gusiganwa ku magare,  ikipe y’u Rwanda yegukanye umwanya wa kabiri ihabwa umudari wa Feza mu cyiciro abakinnyi b’abakobwa bakina bavanze n’abahungu “Mixed Relay Elite & U-23”.

Iki cyiciro cyakinwe n’amakipe 3 , ikipe y’u Rwanda yari igizwe na Ingabire Diane, Nzayisenga Valentine, Tuyishime Jacqueline, Nsengimana Jean Bosco, Mugisha Moise na Habimana Jean Eric yabaye iya kabiri aho mu ntera ya kilometero 28 bakoresheje iminota 43, isegonda 1 n’ibice 37.

Ku mwanya wa mbere haje ikipe y’Afurika y’Epfo yari igizwe na Oberholzer Carla, Janse Van Rensburg Frances, Preen Hayley, Gibbons Ryan, Main Kent na Basson Gustav aho bakoresheje iminota 39, amasegonda 18 n’ibice 24 naho ku mwanya wa 3 haza ikipe ya Ethiopia  yakoresheje  iminota 44,  amasegonda 32 n’ibice 12 ikaba yari igizwe na  Amha Selam, Gebreyowhans Mihiret, Watango Taye, Grmay Tsgabu Gebremaryam, Kebede Sintayehu na Beharu Yared.

Kuri uyu wa Gatanu taliki 05 Werurwe 2021, shampiyona y’Afurika irakomeza hakinwa icyiciro cyo gusiganwa mu muhanda “Road Race” mu ngimbi “Men Junior” no mu bangavu “Women Junior” aho basiganwa mu ntera ya kilometero 56.

Mu ngimbi, ikipe y’u Rwanda igizwe na Tuyizere Etienne, Mugabo Hussein, Iradukunda Valens na Niyonkuru Samuel.  Biteganyijwe ko basiganwa mu ntera ya kilometero 84. Muri iki cyiciro harasiganwa abakinnyi 28  baturuka mu bihugu 8 ari byo Misiri, Uganda, Burundi, Maroc, Rwanda, Afurika y’Epfo, Ethiopia na Algeria.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.