Kigali-Rwanda

Mostly cloudy with showers
20°C
 

Amagare: Ikipe y’u Rwanda igiye kwitabira Tour du Cameroun 2019

Yanditswe na BUGINGO FIDELE

Ku ya May 28, 2019

Tariki 01-06-2019

Akonolinga-Abong Mbang (136 km)

Tariki 02-06-2019

Yaoundé-Nanga Eboko (164 km)

Tariki 03-06-2019

Yaoundé-Ebolowa (158 km)

Tariki 04-06-2019

Pouma-Kribi (157 km)

 Tariki 05-06-2019

Kribi-Douala (174 km)

Tariki 07-06-2019

Douala (Circuit-108 km)

Tariki 08-06-2019

Loum-Dschang (112 km)

Tariki 09-06-2019

Bafia-Yaoundé (121km)

Ikipe y’u Rwanda igizwe n’abakinnyi 6  igiye kwitabira isiganwa mpuzamahanga  muri Cameroun “Tour du Cameroun 2019”  rizaba  kuva tariki 01 kugeza 09 Kamena 2019.

Iri siganwa ubwo riheruka kuba muri 2018 ryegukanwe n’ikipe y’u Rwanda aho Uwizeyimana Bonaventure ari we wasoje ayoboye. Mu isiganwa ry’uyu mwaka wa 2019, uyu mukinnyi Uwizeyimana akaba ari mu ikipe nanone igiye kwitabira.

Uwizeyimana Bonaventure wegukanye Tour du Cameroun 2018 ari mu ikipe igiye guserukira u Rwanda mu irushanwa ry’uyu mwaka wa 2019

Iyi kipe igizwe na Manizabayo Eric, Uwizeyimana Bonaventure , Nzafashwanayo Jean Claude, Ruberwa Jean Damascene, Mugisha Moise na Byukusenge Patrick. Ikipe y’u Rwanda  izajyana n’umutoza  Sempoma Felix akazaba ari kumwe na  Karasira Theonetse nk’umukanishi ndetse na  Ruvogera Obed ushinzwe kunanura imitsi abakinnyi.

Ikipe y’u Rwanda biteganyijwe ko izerekeza muri Cameroun  ku wa Kane tariki 30 Gicurasi 2019.

Abakinnyi bazaserukira u Rwanda muri Tour du Cameroun 2019

Tour du Cameroun 2019  igiye kuba ku nshuro ya 16, abasiganwa baturutse mu makipe 10 bazasiganwa mu ntera 8 basoze  basiganwa kilometero 1130. Intera ndende muri iri siganwa akaba ari iya gatanu yo kuva ahitwa Kribi ukagera i Douala (174 km) naho into ni intera ya 6 yo kunzenguruka (Circuit) mu mujyi wa Douala (108 km).

Amakipe 10 ni yo azitabira isiganwa

Abategura Tour du Cameroun bemeje ko amakipe 10 ari yo azitabira iri siganwa  arimo amakipe 3 yo ku mugane w’u Burayi  ariyo Global Cycling (Hollande), Dukla Banska Bystrica (Slovaquie) na Martigues Sport Cyclisme (Suisse). Hari kandi ikipe y’igihugu ya Maroc, u Rwanda, Cote d’Ivoire, Congo Brazzaville, Gabon, Cameroun ndetse n’ikipe ya SNH vélo (Cameroun).

Uko ikipe y’u Rwanda yitwaye umwaka ushize

Muri 2018, iri siganwa ryagomba kuba tariki 10 kugeza 18 Werurwe 2018   habura umunsi umwe ngo ritangire n’ikipe y’u Rwanda yagezeyo, tariki 09 Werurwe 2018 rirasubikwa kubera kubura amikoro rikinwa tariki 26 Gicurasi kugera 03 Kamena 2018.

Abakinnyi bari baserukiye u Rwanda ubushize ni Byukusenge Patrick, Ukiniwabo Rene Jean Paul, Hadi Janvier, Uwizeyimana  Bonaventure, Nsengimana Jean Bosco na Munyaneza Didier.

Uwizeyimana yitwaye neza yegukana intera ya 5 yo kuva Mbanga  ukagera   Bafang   (121.5 km) aho  yakoreheje  amasaha 3, iminota 23 n’amasegonda 37 ashyiramo ikinyuranyo  cy’umunota n’amasegonda 20 kuri Varhaňovský Jakub (Dukla Banska Bystrica) waje ku mwanya wa kabiri.

Byarangiye Uwizeyimana yegukanye iri siganwa aho muri kilometero 831.6 yakoresheje amasaha 21, iminota 53 n’amasegonda 20 aho yarushije  iminota 3 n’amasegonda 38, Haring Martin (Dukla Banska Bystrica) waje ku mwanya wa kabiri.

Uko abandi bakinnyi b’u Rwanda bitwaye,  Byukusenge Patrick yasoreje  ku mwanya wa 4, Ukiniwabo Rene Jean Paul (6), Munyaneza Didier  (12), Hadi Janvier (17) na Nsengimana Jean Bosco (19).

Ikipe y’u Rwanda ubwo bishimiraga kwegukana Tour du Cameroun 2018

Ubwo ikipe y’igihugu yakirwaga igarutse mu Rwanda