Kigali-Rwanda

Mostly cloudy
21°C
 

Amagare: Ikipe y’u Rwanda igiye kwitabira  Tour du Cameroun 2018

Yanditswe na BUGINGO FIDELE

Ku ya 24-05-2018 saa 10:18:29
Abakinnyi b'ikipe y'u Rwanda bagiye kwitabira isiganwa muri Cameroun

Tariki 26-05-2018

Pouma- Kribi (154,4 km)

Tariki 27-05-2018

Kribi-Douala (175.7 km)

Tariki 28-05-2018

Douala- Douala (108 km)

Tariki 29-05-2018

Douala-Limbe: (85,5 km)

Tariki 31-05-2018

Mbanga-Bafang (121,5 km)

Tariki 01-06-2018

Bafoussam- Dschang- Bafoussam (98 km)

Tariki 02-06-2018

Tonga- Bangangte- Tonga (83,7 km)

Tariki 03-06-2018

Bafia-Yaounde (122,8 km)

Ikipe y’u Rwanda mu gusiganwa ku magare  mu gitondo cyo kuri uyu wa Kane tariki 24 Gicurasi 2018  irahaguruka mu Rwanda   yerekeza muri Cameroun aho igiye kwitabira isiganwa mpuzamahanga «Tour du Cameroun 2018» rizatangira tariki 26 Gicurasi risozwe tariki 03 Kamena 2018.

Abakinnyi b’ikipe y’u Rwanda bagiye kwitabira isiganwa muri Cameroun

Iri siganwa ryagombaga kuba tariki 10 kugeza 18 Werurwe 2018   habura umunsi umwe ngo ritangire, tariki 09 Werurwe 2018 rirasubikwa kubera kubura amikoro. Nyuma  y’ibiganiro byabaye hagati y’ishyirahamwe ry’umukino wo gusiganwa ku magare muri Cameroun «FECACYCLISME» na Minisiteri ifite siporo mu nshingano bakemera ko bazatanga amafaranga angana na miliyoni 400 z’ama cfa yo gutegura iri siganwa, ishyirahamwe y’uyu mukino ku Isi «UCI» ryemereye Cameroun kongera gutegura iri siganwa.

Abakinnyi 6  ni bo bagiye guhagararira u Rwanda ari bo  Hadi Janvier, Munyaneza Didier, Nsengimana Jean Bosco, Byukusenge Patrick, Ukiniwabo Rene Jean Paul  na Uwizeyimana Bonaventure wegukanye intera ya  kabiri ya Rwanda Cycling Cup 2018 yabaye  tariki 19 Gicurasi 2018.

Iyi kipe irajyana n’umutoza Sempoma Felix, Karasira nk’umukanishi ndetse na Kayinamura Patrick uzafasha mu kunanura imitsi abakinnyi.

Amakipe 10 ni yo yatumiwe muri iri siganwa

Iri siganwa rizaba rigizwe n’intera 8 zihwanye n’ibilometero 949,6. Amakipe 10 ni yo yatumiwe muri iri siganwa arimo ikipe ebyiri zo muri Cameroun (Ikipe y’igihugu ya  Cameroun na SNH vélo club). Hari ikipe y’igihugu ya Côte d’Ivoire
u Rwanda, Gabon na Congo Brazzaville. Amakipe yo hanze y’Afurika ni Martigues Sport Cycling (France), Global Cycling (Hollande), Dukla Banska Bystrica( Slovaquie) na Club de la Défense (France).

Benshi muri aba  bakinnyi  b’u Rwanda si ubwa mbere bagiye kwitabira iri siganwa dore ko ikipe y’u Rwanda yakunze kwigaragaza aho  abakinnyi nka Bintunimana Emile, Hakuzimana Camera bagiye bitwara neza.

N’ubwo  aba bakinnyi  batari mu ikipe  yitabiriye iri siganwa, Nsengimana Jean Bosco wegukanye Tour du Rwanda 2015  ni umwe mu bakinnyi bigaragaje muri 2016 ubwo yakiniraga  Bike Aid  aho yegukanye  intera ya  5 ya Douala-Kumba naho muri 2017 akaba yaraje ku mwanya wa 2 mu ntera ya 7 mu gihe undi mukinnyi Uwizeyimana Bonaventure yegukanye umwanya wa 2 mu ntera ya 6.

 

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.