Kigali-Rwanda

Partly cloudy
19°C
 

Amagare: Ikipe y’u Rwanda igiye kwitabira isiganwa rikomeye muri Amerika

Yanditswe na BUGINGO FIDELE

Ku ya Aug 14, 2018

Ikipe y’u Rwanda igizwe n’abakinnyi  6 ejo hashize tariki 13 Kanama 2018 yahagurutse mu Rwanda yerekeje mu Leta ya  Colorado muri USA aho izitabira isiganwa  rikomeye Colorado Classic 2018” rizatangira tariki 16 risozwe 19 Kanama 2018.

Abakinnyi bagiye muri USA kwitabira Colorado Classic 2018,uhereye ibumoso ni Uwizeyimana, Byukusenge, Hadi, Nsengimana, Uwizeye na Ndayisenga Valens

Iyi kipe y’u Rwanda ikaba igizwe na Ndayisenga Valens wegukanye Tour du Rwanda 2014 na 2016 ndetse na Nsengimana Jean Bosco wegukanye Tour du Rwanda 2015. Hari kandi Hadi Janvier wegukanye umudali wa zahabu mu mikino y’Afurika muri 2015, Uwizeye Jean Claude, Uwizeyimana Bonaventure na Byukusenge Patrick aba bose  bakaba bari bamaze gukina Tour du Rwanda 2018. Iyi kipe y’u Rwanda yajyanye n’umutoza Sempoma Felix usanzwe atoza ikipe ya Benediction akaba n’umutoza wungirije w’ikipe y’igihugu.

Iri rushanwa ikipe y’u Rwanda igiye kwitabira ku nshuro ya kabiri rizitabirwa n’amakipe 15 arimo 14 ay’ababigize umwuga anakina amarushanwa akomeye  ku Isi. Aya ni  EF Education First (Suwede), Trek-Segafredo (USA),Mitchelton-Scott (Australia), LottoNL-Jumbo (u Buholandi), Hagens Berman Axeon (USA), Holowesko-Citadel (USA), Israel Cycling Academy (Israel), UnitedHealthcare Pro Cycling Team (USA), Rally Cycling (USA), Aevolo (USA), Elevate-KHS Pro Cycling (USA), Jelly Belly p/b Maxxis (USA), Silber Pro Cycling (Canada) na303 Project (USA).

Isiganwa rya “Colorado Classic 2018” abasiganwa basiganwa intera 4 aho tariki 16 Kanama 2018 bazakinira ahitwa Vail (103, 2 km), tariki 17 Kanama nabwo muri uyu mujyi wa Vail. Tariki 18 Kanama bazakinira ahitwa Denver (161,9 km) naho umunsi wa nyuma bongere bakinire muri uyu mugi (114,8 km).

Muri 2017, ikipe y’u Rwanda yitabiriye iri siganwa ryabaye tariki 10 kugeza 13 Kanama 2017. Iyi kipe yari igizwe na Gasore Hategeka, Uwizeyimana Bonaventure, Nsengimana Jean Bosco, Munyaneza Didier, Ukiniwabo Rene Jean Paul na Uwizeye Jean Claude.   Uwitwa Senni Manuel ukomoka mu Butaliyani  akaba akinira ikipe ya BMC Racing Team yo muri Amerika  ni we wegukanye iri siganwa mu gihe Uwizeye yaje hafi ku mwanya wa 4,  Ukiniwabo (51), Gasore (73) na Uwizeyimana (84).

Iri rushanwa ryari ryitabiriwe  n’abakinnyi 95 hasoza 84 batarimo Nsengimana Jean Bosco wavuyemo ku ntera ya mbere na Munyaneza Didier utarasoje intera ya nyuma ya 4.