Amagare: Byukusenge ni we munyarwanda  uri imbere muri Tour du Cameroun 2018

Yanditswe na Amani Claude

Ku ya 31-05-2018 saa 08:06:38
Byukusenge Patrick uri ku mwanya wa kane muri Tour du Cameroun 2018

Isiganwa mpuzamahanga ririmo kubera muri Cameroun «Tour du Cameroun 2018» rirakomeje aho uyu munsi tariki 31 Gicurasi 2018 hakinwa intera  ya 5  aho abasiganwa bava ahitwa Mbanga basoreze Bafang mu ntera y’ibilometero  121,5.

Byukusenge Patrick uri ku mwanya wa kane muri Tour du Cameroun 2018

Nyuma y’umunsi w’ikiruhuko ejo hashize tariki 30 Gicurasi 2018, Byukusenge Patrick ukinira ikipe y’u Rwanda ni we uza hafi mu bakinnyi baserukiye u Rwanda.

Iri siganwa ryatangiye tariki 26 Gicurasi 2018, ubu hagombaga  kuba hamaze gukinwa intera 4 ariko ni 3 kuko intera ya 3 itabashije kurangira tariki 28 Gicurasi 2018.

Mu ntera ya 4  yakinwe tariki 29 Gicurasi 2018 aho abasiganwa bavuye Douala bagasoreza Limbe ahareshya n’ibilometero 75.5,  Byukusenge Patrick yitwaye neza asoza ku mwanya wa kabiri aho yageranye ku murongo na Haring Martin   ukinira ikipe ya Banska Bystrica  muri Slovakia  bombi bakaba barakoresheje isaha 1, iminota 53 n’amasengonga 41. Kuri iyi ntera kandi, Uwizeyimana Bonaventure yasoje ku mwanya wa 4.

Nyuma y’izi ntera 3 zimaze gukinwa, Richet Noel ukinira ikipe ya Club de la Defense yo mu Bufaransa ni we iyoboye aho mu ntera y’ibilometero 518,1 amaze gukoresha amasaha 10, iminota 27 n’amasegonda 47 akurikiwe na Mahdar Martin ukinira Banska Bystrica  muri Slovakia  (10h27’55″), Downes Branton  wo muri Afurika y’Epfo (10h28’04″) naho ku mwanya wa 4 hakaza Byukusenge Patrick umaze gukoresha  amasaha 10, iminota 28 n’amasegonda 50.

Mu bandi bakinnyi b’u Rwanda bari hafi ku rutonde hari Uwizeyimana Bonaventure (7), Ukiniwabo (12), Munyaneza (13), Nsengimana Jean Bosco (21) na Hadi Janvier (31).

Uretse uru rutonde rusange, Nsengimana Jean Bosco ni we wa mbere mu barusha abandi kuzamuka  aho afite amanota 10 agakurikirwa na Haring Martin   ukinira ikipe ya Banska Bystrica  muri Slovakia   ufite amanota 6. Iri siganwa rizasozwa tariki 03 Kamena 2018.

 

 

Umwanditsi:

Amani Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.