Kigali-Rwanda

Mostly cloudy
22°C
 

Amagare: Areruya yerekeje mu ikipe ya Delko-Marseille mu Bufaransa

Yanditswe na BUGINGO FIDELE

Ku ya 12-03-2018 saa 06:41:18
Areruya Joseph kwitwara neza mu marushanwa atandukanye muri Afurika byatumye abona ikipe ikomeye mu Bufaransa

Areruya Joseph wari usanzwe ari umukinnyi w’ikipe ya kabiri ya Dimension Data for Qhubeka yamaze kubona ikipe y’ababigize umwuga  mu gihugu cy’u Bufaransa ari yo  Delko–Marseille Provence KTM.

Areruya Joseph kwitwara neza mu marushanwa atandukanye muri Afurika byatumye abona ikipe ikomeye mu Bufaransa

Ejo hashize tariki 11 Werurwe 2018 ni bwo iyi kipe  yatangaje ku  mugaragaro binyuze kuri “Twitter” ko yamaze kugura Areruya Joseph  nk’umukinnyi utanga ikizere muri Afurika. Iyi kipe ikaba yarahaye Areruya Joseph amasezerano y’imyaka 2.

Areruya Joseph  uri mu Rwanda kuri ubu yatangaje ko yishimiye iyi ntambwe ateye kandi ko yizeye kuzitwara neza.

Uyu mukinnyi  ari mu ikipe izaserukira u Rwanda mu mikino ihuza ibihugu bikoresha ururimi rw’icyongereza “Commonwealth Games 2018” izabera muri Australia tariki 04-15 Mata 2018 gusa mbere y’iyi mikino agomba kujyana n’ikipe y’u Rwanda mu isiganwa rizabera muri Algeria kuva tariki 27 Werurwe kugeza 02 Mata 2018.

Kuba Areruya Joseph abonye ikipe iri mu zikomeye mu Bufaransa zikina amarushanwa mpuzamahanga    byatewe n’uburyo yitwaye mu mwaka wa 2017 ndetse n’intangiriro za 2018.

Areruya   ufite imyaka 22 y’amavuko  yatangiye kwigaragaza mu 2015 ubwo  yasozaga ari uwa kabiri muri Tour du Rwanda  yari akinnye ku nshuro ya mbere. Mu 2016 yasoje ari uwa 4  ari nabwo yahitaga agurwa n’ikipe ya Dimension Data for Qhubeka yo muri Afurika y’Epfo ariko ikaba ibarizwa mu Butaliyani  ajyana na Mugisha Samuel  bakinayo umwaka umwe wa 2017.

Muri uyu mwaka wa 2017 Areruya yitwaye neza yegukana intera mu irushanwa rikomeye ryabereye mu Butaliyani “Giro d’Italia” mu kiciro cy’abatarengeje imyaka 23. Nyuma yo kwegukana iyi ntera, Areruya Joseph yegukanye Tour du Rwanda 2017.

Mu 2018, Areruya yatangiye neza yegukana isiganwa rya mbere muri Afurika ribera muri Gabon “La Tropicale Amissa Bongo 2018” muri Mutarama 2018 aho iyi kipe yamuguze yari yaryitabiriye.

Areruya   yongeye kwitwara neza yegukanye isiganwa ry’Afurika mu batarengeje imyaka 23 ryabereye muri Cameroun  tariki 31 Mutarama kugeza Gashyantare 2018 nyuma anegukana imidali  4 itandukanye muri shampiyona y’Afurika yabereye mu Rwanda  muri Gashyantare 2018.

Amateka y’ikipe Areruya yerekejemo

Iyi kipe yashinzwe mu 1974  kuva  muri 2011 ni bwo yatangiye ikipe y’ababigize umwuga yitabira amarushanwa akomeye  ku mugabane w’u Burayi  n’ahandi. Iyi kipe ikaba initabira amarushanwa mpuzamahanga  muri Afurika aho  yanitabiriye “La Tropicale Amissa Bongo 2018” ari yo Areruya yegukanye.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.