Kigali-Rwanda

Partly sunny
27°C
 

Amagare: Areruya  yegukanye igihembo cy’umukinnyi w’umwaka wa 2018 muri Afurika

Yanditswe na BUGINGO FIDELE

Ku ya Dec 23, 2018

Areruya Joseph usanzwe akinira ikipe ya Delko Marseille yo mu Bufaransa ni we wegukanye igihembo cy’umukinnyi  witwaye neza mu mwaka wa 2018 mu mukino wo gusiganwa ku magare “Best African cyclist of the year 2018”.

Areruya Joseph wegukanye La Tropicale Amissa Bongo 2018 ni we watsindiye igihembo cy’umukinnyi witwaye neza mu mwaka wa 2018 muri Afurika

Uyu mukinnyi ufite imyaka 22 y’amavuko  akaba yari yaje ku mwanya wa kabiri muri 2017 yegukanye iki gihembo ahigitse Daryl Impey ukomoka muri Afurika y’Epfo akaba akinira ikipe ya Mitchelton-Scott muri Australia na Amanuel Ghebreigzabhier ukomoka muri Eritrea akaba akinira Dimension Data for Qhubeka ari nawe wegukanye shampiyona y’Afurika ya 2018.

Ibi byashyizwe ahagaragara n’itsinda ry’abategura isiganwa mpuzamahanga ry’umukino wo gusiganwa ku magare ribera muri Gabon “La Tropicale Amissa Bongo” riyobowe na  Bernard Hinault wegukanye Tour de France ishuro 5 ari na we watangije iki gikorwa cyo guhemba umukinnyi witwaye neza kuva mu 2012.

Areruya  yatangiye  neza umwaka wa 2018 yegukana isiganwa rya mbere muri Afurika “La Tropicale Amissa Bongo 2018”, yongeye kwitwara neza yegukana irushanwa ry’Afurika mu batarangeje imyaka 23 ndetse no muri shampiyona y’Afurika “African Continental Championships 2018” yegukana imidari ibiri.

Bernard Hinault ukuriye iri tsinda ritanga iki gihembo yavuze ko  Areruya yari agikwiriye kuko yitwaye neza mu marushanwa akomeye muri Afurika. Ati «Ni umukinnyi ukomeye kandi ushobora kuzagera kure. Yaranshimishije ubwo yahanganaga n’abakinnyi babigize umwuga mu irushanwa riheruka muri Gabon yaje no kweguka.»

Aba bakinnyi bari batangiye guhatana ari 15, inyuma y’aba batatu,  hakurikiyeho Merhawi Kudus (Eritrea-Astana), Youcef Reguigui (Algeria – Sovac-Natura4Ever) , Mugisha Samuel (Rwanda – Dimension Data for Qhubeka), Azzedine lagab (Algeria-GSP), Salim Kipkemboi (Kenya – Bike Aid) , Clint Hendrickx (South Africa) , Isiaka Cisse (Ivory Coast), Henok Mulubrhan (Eritrea), Stefan De Bod (South Africa-Dimension Data for Qhubeka), Mathias Sorgho (Burkina Faso), Uwizeyimana Bonaventure (Rwanda) na Clovis Kamzong (Cameroon).

Abegukanye iki gihembo kuva muri 2012 ni Natnael Berhane (Eritrea,2012) ,Louis Meintjes (South Africa, 2013 na 2017), Mekseb Debesay (Eritrea,2014), Daniel Teklehaimanot (Eritrea,2015) Tesfom Okubamariam (Eritrea,2016) na Areruya Joseph (Rwanda,2018).

Areruya ari mu ikipe izitabira  La Tropicale Amissa Bongo 2019

Ikipe y’u Rwanda iri mu makipe 15 azitabira iri siganwa rizaba tariki 21 kugeza 27 Mutarama 2019. Abakinnyi 6 ni bo bamaze gushyirwa ahagaragara  ko bazitabira iri siganwa rizaba ribaye ku nshuro ya 14.

Aba bakinnyi ni  Areruya Joseph  ugiye kwitabira  inshuro ya 3 (2016,2018 na 2019)  akaba ari na we waryegukanye umwaka ushize. Hari Uwizeyimana Bonaventure   ugiye kwitabira ku nshuro ya 6 (2013, 2014, 2015, 2017, 2018 na 2019) akaba yaranegukanye intera muri 2014,  Uwizeye Jean Claude (2016 na 2019), Munyaneza Didier  (2018,2019) naho Nkurunziza Yves  na Mugisha Samuel ni ubwa mbere.

Iyi kipe izajyana n’umutoza Sempoma Felix, Karasira Theoneste nk’umukanishi na Kayinamura Patrick  ushinzwe kunanura imitsi abakinnyi.

Aba bakinnyi hamwe n’abandi  bari mu kigo k’imyitozo i Musanze aho  tariki 23 Ukuboza 2018 bazasubika imyitozo kubera iminsi mikuru isoza umwaka bakazasubukura tariki 02 Mutarama 2019. Areruya akaba ari bwo azashyikirizwa iki gihembo yatsindiye.