22°C , Partly cloudy | Kigali-Rwanda

Amagare: Areruya yabaye umunyafurika wa gatatu wegukanye « La Tropicale Amissa Bongo»

Yanditswe na BUGINGO FIDELE

Ku ya 22-01-2018 saa 08:25:19

Umukinnyi w’ikipe y’u Rwanda, Areruya Joseph yakomeje amateka aba umukinnyi ukomoka mu Rwanda wegukanye  isiganwa rya mbere muri Afurika  «La Tropicale Amissa Bongo» ndetse  uwa 3  ukomoka muri Afurika wegukanye iri siganwa.

Perezida wa Gabon,Ali Bongo Ondimba nyuma yo guhemba Areruya Joseph

Iri siganwa  ryatangiye gukinwa  mu 2006, uyu mwaka wa 2018 ubwo ryakinwaga ku nshuro ya 13 kuva tariki 15 kugeza 21 Mutarama 2018,  Areruya Joseph   yitwaye neza yegukana intera ya 4  yatumye ayobora isiganwa  kugeza ku munsi  wa nyuma.

Ku munsi wa nyuma w’iri siganwa, tariki 21 Mutarama 2018  abasiganwa bazengurutse mu mujyi wa Libreville  ahareshya n’ibilometero  133.5, uwitwa  Pacioni Luca ukinira ikipe Wilier-Tristina  mu Butaliyani  ari naho akomoka ni we wageze ku murongo ari uwa mbere gusa yahagereye rimwe n’abakinnyi 34 barimo Areruya Joseph wari uyoboye urutonde rusange. Aba bakinnyi bose bakoresheje  amasaha 3, iminota 07 n’amasegonda 26.

Nyuma y’iyi ntera ya nyuma, Areruya Joseph  yasoje ari uwa mbere  aho mu ntera 7 zihwanye n’ibilometero 998 yakoresheje amasaha 23, iminota 52 n’amasegonda 24 yakurikiwe ku rutonde na  Holler Nikodemus ukinira ikipe Bike Aid akaba akomoka mu Budage aho yakoresheje  amasaha 23, iminota 52 n’amasegonda 42  naho ku mwanya wa 3 haza   Gaudin Damien   ukinira ikipe ya Direct Energie  mu Bufaransa aho yakoresheje amasaha 23, iminota 53 n’masegonda 14.

Areruya Joseph (hagati) ari kumwe n’abakinnyi bamukurikiye bari Holler Nikodemus (uwa 2 ibumoso) naGaudin Damien Gaudin Damien (uwa 2 iburyo)

Areruya yanditse amateka

Areruya Joseph w’imyaka 22 nyuma ya Tour du Rwanda 2016 yahawe amasezeno y’umwaka umwe mu ikipe ya kabiri ya  Dimension Data for Qhubeka yo muri Afurika y’Epfo ariko ikaba ibarizwa mu Butaliyani. Mu 2017 yitwaye neza yegukana intera ya Giro d’Italia mu batarengeje imyaka 23 nyuma mu Gushyingo 2017 yegukana Tour du Rwanda 2018  maze iyi kipe ihita imwongera amasezerano.

Mu gihe ikipe ya Dimension Data yari itaratangira imyitozo yasabye Areruya ndetse na mugenzi we Mugisha kuba bakinira ikipe y’u Rwanda.

Areruya akaba yari  yajyanye n’abakinnyi b’u Rwanda ari bo Ndayisenga, Uwizeyimana, Ruberwa, Ukiniwabo na Munyaneza.  Gusa  intera ya 5, Ndayisenga na Uwizeyimana bakaba barakoze impanuka ntibasoza bahita banava mu irushanwa.

Ni we wabaye umukinnyi w’Umunyafurika witwaye neza

Nyuma yo kwegukana «La Tropicale Amissa Bongo2018», Areruya yabaye umunyafurika wa 3 wegukanye iri siganwa nyuma ya  Natnael Berhane wo muri Eritrea waryegukanye mu 2014 na Rafaâ Chtioui wo muri Tunizia (2015). Ubusanzwe iri siganwa rikaba ryarakunze kwegukanwa n’abakinnyi bakomoka mu Bufaransa.

Uretse Jussi Veikkanen wo muri  Finland waritwaye bwa mbere mu 2006, Frédéric Guesdon (2007), Lilian Jégou (2008), Mathieu Ladagnous (2009), Anthony Charteau (2010, 2011 na 2012), Yohann Gène (2013 na 2017) na Adrien Petit (2016) bose bakomoka mu Bufaransa.

Areruya yanahembwe nk’umukinnyi ukiri muto witwaye neza

Ikipe y’u Rwanda yitabiriye bwa mbere iri siganwa mu 2009 gusa ubu ni bwo umukinnyi w’u Rwanda abashije kwegukana iri siganwa gusa mu 2014, Uwizeyimana Bonaventure yegukanye intera 5.

 

 

 

 

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.