Kigali-Rwanda

Mostly cloudy
23°C
 

Amagare: Areruya n’ikipe ye bagiye kwitabira isiganwa  mu Bushinwa

Yanditswe na BUGINGO FIDELE

Ku ya Jul 17, 2018

Uyu munsi tariki 17 Nyakanga 2018 ni bwo Areruya Joseph na bagenzi be bakinana mu ikipe ya  Delko-Marseille Provence KTM yo mu Bufaransa berekeza mu Bushinwa mu mujyi wa  Qinghai aho bagiye kwitabira isiganwa mpuzamahanga « Tour of Qinghai Lake 2018 ».

Areruya Joseph ugiye kwitabira isiganwa ry’iminsi 14 mu Bushinwa

Iri siganwa biteganyijwe ko rizatangira tariki 22 Nyakanga risozwe tariki 04 Kanama 2018.  Nk’uko  tubikesha urubuga rw’iri rushanwa www.tdql.cn,  mu makipe 22 agomba kuryitabira  harimo  Delko-Marseille Provence KTM yo mu Bufaransa ikinamo Areruya Joseph wegukanye Tour du Rwanda 2017.

Ikipe ya Delko-Marseille izaba igizwe n’abakinnyi 7 ari bo Areruya Joseph (Rwanda),  Guerin Alexis, Trarieux Julien (France), Jones Brenton (Australia), Kasperkiewicz Przemysław (Pologne), Evaldas Šiškevičius  (Lithuania) na Gatis Smukulis (Latvia).

Muri iri siganwa  hazakinwa intera 13 zihwanye n’ibilometero 1841. Intera ya 8 izakinwa tariki 29 Nyakanga 2017 yo kuva ahitwa  Menyuan kugera Zhangye ni yo ndende ikazaba ireshya n’ibilometero 237 indi ndende izaba ireshya n’ibilometero 235 akaba ari iya 5 izakinwa tariki 26 Nyakanga 2018. Intera ngufi ni iya 6  ireshya n’ibilometero 66  izakinwa tariki 27 Nyakanga 2018 izava ahitwa  Dadongshu Yakou  igasorezwa Qilian.

Umwaka ushize wa 2017,  Yonathan Monsalve ukomoka muri   Venezuela akaba akinira Qinghai Tianyoude Cycling Team  mu Bushinwa  ni we wegukanye iri rushanwa. Uyu  mwaka wa 2018 azitabira.

Aganira n’Imvaho Nshya, Areruya yatangaje ko we na bagenzi be bamaze iminsi bitegura iri rushanwa  bakaba bafite intego yo kwitwara neza. Akomeza avuga ko uzaba ari umwanya mwiza wo kwitegura irushanwa rikomeye agomba kwitabira mu Bufaransa  ry’abatarengeje imyaka 23 «Tour de l’Avenir 2018 » rizaba tariki 17  kugeza 26  Kanama 2018.

Muri iri siganwa Areruya akaba  azaba ari kumwe n’abandi bakinnyi b’u Rwanda.  Areruya yahesheje u Rwanda iyi  tike nyuma yo kwegukana irushanwa ry’abatarengeje imyaka 23  mu rwego rw’Afurika  «Coupe des Nations de l’Espoir Blue 2018» ryabereye muri Cameroun kuva tariki 31 Mutarama kugeza 04 Gashyantare 2018.