Kigali-Rwanda

Mostly cloudy
23°C
 

Amagare: Areruya agiye kugaruka mu Rwanda gukina shampiyona y’igihugu

Yanditswe na BUGINGO FIDELE

Ku ya Jun 18, 2018

Areruya Joseph ukinira ikipe ya Delko–Marseille Provence KTM mu Bufaransa azagera mu Rwanda ku wa Gatatu tariki 20 Kamena 2018 aho aje kwitabira shampiyona y’igihugu y’umukino wo gusiganwa ku magare iteganyijwe tariki 23-24 Kamena 2018.

Areruya Joseph ugiye kugaruka mu Rwanda gukina shampiyona y’igihugu

Uyu mukinnyi  ufite imyaka 22 y’amavuko  yatangiye neza umwaka wa 2018 yegukana amarushanwa akomeye nka  La Tropicale Amissa Bongo 2018 n’irushanwa ry’Afurika   mu batarengeje  imyaka 23 ndetse no muri shampiyona y’Afurika yegukana imidari.

Uku kwitwara neza byatumye ava mu ikipe ya kabiri ya Dimension Data yakiniraga umwaka ushize ahite yerekeza muri Delko–Marseille Provence KTM mu Bufaransa.

Shampiyona y’igihugu  izatangira hakinwa gusiganwa n’isaha “Individual Time Trial”, bizabera i Nyamata tariki 23 Kamena 2018 naho tariki 24 Kamena 2018 hakinwe isiganwa ryo mu muhanda ahazakoreshwa inzira ya Sitade Amahoro-Kimironko-Kibagabaga-Nyarutarama-RDB-Airtel-Sitade Amahoro. Abasiganwa bakazahazenguruka.

Aganira n’Imvaho Nshya, Areruya atangaza ko amaze kumenyera  no kumenyerana n’abandi bakinnyi muri iyi kipe.

Kuba ikipe ya Delko-Marseille Provence KTM itazakina Tour du Rwanda 2018, Areruya  wegukanye iri siganwa muri 2017 avuga ko iyo iza kwitabira byari kuba byiza gusa avuga ko mu Rwanda basabye ko iyi kipe ye ishobora kumurekura akaba yaza agakinira ikipe y’igihugu.