20°C , Intermittent clouds | Kigali-Rwanda

Amagare: Abakinnyi 6 b’u Rwanda bazitabira isiganwa mu Bufaransa

Yanditswe na Bugingo Fidèle

Ku ya 30-09-2019 saa 06:12:25
Munyaneza Didier ni umwe mu bakinnyi bazitabira Tour de Vendée 2019

Tariki 06 Ukwakira 2019 mu Bufaransa ahitwa La Roche-sur-Yon hazabera isiganwa ry’umunsi umwe « Tour de Vendée 2019 ».

Iri siganwa rizitabirwa n’abakinnyi 6 b’u Rwanda barimo Uwizeye Jean Claude ukinira ikipe ya Les Sables Vendée CC yahoze yitwa Pays des Olonnes Cycliste Côte de Lumière yo mu Bufaransa, Mugisha Moise umazeyo iminsi muri iyi kipe akora imyitozo.

Mu bandi bakinnyi hari Mugisha Samuel ukinira Dimension Data for Qhubeka, Munyaneza Didier, Nzafashwanayo Jean Claude na Manizabayo Eric bakinira ikipe ya Benediction Excel Energy. Aba bakinnyi uko ari 4 bikaba biteganyijwe ko bahaguruka mu Rwanda berekeza mu Bufaransa kuri uyu wa Kabiri tariki 01 Ukwakira 2019.

Iri siganwa rigiye kuba ku nshuro ya 48 abasiganwa baturutse mu makipe agera kuri 18 bazasiganwa intera ya kirometero 200 bava ahitwa Challans bagera la Roche-sur-Yon aho bazazenguruka inshuro 3 intera ya kirometero 6,3 bageze muri uyu mujyi.

Amakipe azitabira yose hamwe ni 18

Biteganyijwe ko amakipe 18 ari yo azitabira iri siganwa, muri aya makipe harimo aho ku rwego rwo hejuru yitabira amasiganwa akomeye « WorldTour Team » ari yo AG2R La Mondiale na Groupama-FDJ zombi zo mu Bufaransa.

Hari amakipe 7 y’ababigize umwuga « Continental Pro” ari yo Arkéa-Samsic

Cofidis, Delko Marseille Provence, Total Direct Energie, Vital Concept-B&B Hôtels, Caja Rural, Seguros RGA na Wanty-Gobert Cycling Team. Ayandi nayo 8 y’abagize umwuga harimo Natura4Ever-Roubaix Lille Métropole, St-Michel-Auber 93, Amore & Vita-Prodir, EvoPro Racing, Massi-Vivo-Grupo Oresy, Swiss Racing Academy, Team Differdange-GeBa na Team Vorarlberg-Santic.

Isiganwa riheruka « Tour de Vendée 2018 » ryegukanwe na Nico Denz ukinira AG2R La Mondiale

Ubwo iri rushanwa ryabaga umwaka ushize wa 2018, abakinnyi 6 nabwo bari baserukiye u Rwanda barimo Niyonshuti Adrien Uwizeye Jean Claude, Ndayisenga Valens, Munyaneza Didier, Ukiniwabo Rene Jean Paul ndetse na Areruya Joseph.

Muri rusange ryari ryitabiriwe n’abakinnyi 104 habasha gusoza 46 naho abandi 58 ntibasoza. Areruya Joseph ukinira Delko Marseille ni we munyarwanda wabashije gusoza aho yasoje ari ku mwanya wa 46.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.