Amagare: Abakinnyi 3 b’Abanyarwanda mu bazahatanira igihembo cy’umukinnyi w’umwaka muri Afurika

Yanditswe na BUGINGO FIDELE

Ku ya Nov 27, 2018

Abakinnyi batatu b’Abanyarwanda barimo Areruya, Mugisha na Uwizeyimana  bari ku rutonde rw’abakinnyi 15 bazatorwamo umukinnyi witwaye neza muri uyu mwaka wa 2018 mu mukino wo gusiganwa ku magare muri Afurika “Best African cyclist of the year 2018”.

Uru rutonde rwashyizwe ahagaragara n’itsinda ry’abategura isiganwa mpuzamahanga ry’umukino wo gusiganwa ku magare ribera muri Gabon “La Tropicale Amissa Bongo” riyobowe na  Bernard Hinault wegukanye Tour de France ishuro 5 akaba ari nawe watangije iyi gahunda yo gutanga iki gihembo muri 2012.

Mu  bakinnyi 15 bashyizwe ku rutonde harimo Areruya Joseph  wazamukiye mu ikipe ya Les Amis Sportif i Rwamagana akanyura muri Dimension Data  ubu akaba akinira ikipe ya Delko Marseille mu Bufaransa.

Areruya Joseph wegukanye La Tropicale Amissa Bongo 2018

Areruya Joseph ufite imyaka 22 y’amavuko  wasoje umwaka wa 2017 neza yegukana Tour du Rwanda 2017, mu mwaka wa 2018 yatangiye neza yegukana isiganwa rya mbere muri Afurika “La Tropicale Amissa Bongo 2018”.  Yongeye kwitwara neza yegukana irushanwa ry’Afurika mu batarangeje imyaka 23 ndetse no muri shampiyona y’Afurika “African Continental Championships 2018” yegukana imidari ibiri. Kuri ubu ari ku mwanya wa 3 muri Afurika ku rutonde rwa UCI.

Undi mukinnyi ni Mugisha Samuel ufite imyaka 20 akaba  akinira  Dimension Data for Qhubeka.Yegukanye Tour du Rwanda 2018  ndetse n’imidari  2 mu irushanwa ry’Afurika “Africa Cup 2018” ryabereye muri Eritrea.

Mugisha Samuel wegukanye Tour du Rwanda 2018

Umukinnyi wa gatatu ni Uwizeyimana Bonaventure ufite imyaka 25 y’amavuko  akaba akinira ikipe ya Benediction y’i Rubavu. Muri uyu mwaka wa 2018  yegukanye Tour du Cameroun 2018  ndetse anitwara neza asoza mu bakinnyi 4 ba mbere muri Tour du Senegal 2018.

Uwizeyimana Bonaventure wegukanye Tour du Cameroun 2018

 Abandi bakinnyi  bazatorwamo  umukinnyi w’umwaka wa 2018 hari Ghebreigzabhier Amanuel (Eritrea)  akaba akinira  Dimension Data, yegukanye shampiyona y’Afurika  ya  2018, Cisse Isiaka (Cote d’Ivoire), De Bod Stefan (Afurika y’Epfo) akinira  Dimension Data for Qhubeka,  Hendrickx Clint (Afurika y’Epfo)  akinira  Bike Aid, Impey Daryl (Afurika y’Epfo) akinira Michelton-Scott.

Hari kandi Kamzong Clovis (Cameroon), Kipkemboi Salim (Kenya) akaba akinira  Bike Aid,  Kudus Merhawi (Eritrea)  akinira Astana, Lagab Azzedine (Algeria) akinira  GSP), Mulubrhan Henok (Eritrea), Reguigui Youcef (Algeria) akinira Sovac na Sorgho Mathias (Burkina Faso).

Nk’uko bitagazwa n’abategura iki gikorwa, tariki 21 Ukuboza 2018 ni bwo hazatagazwa umukinnyi wegukanye iki gihembo akazagishyikirizwa muri Mutarama 2019  ubwo hazaba haba  La Tropicale Amissa Bongo 2019 kuva tariki 21 kugeza 27 Mutarama 2019.

Igihembo  giheruka cya 2017  cyahawe Louis Meintjes ukomoka muri Afurika y’Epfo wari   ugitwaye ku nshuro ya kabiri nyuma y’icya 2013. Abandi  batwaye iki gihembo hari  Natnael Berhane (2012), Mekseb Debesay (2014), Daniel Teklehaimanot (2015) na Tesfom Okubamariam (2016).

Louis Meintjes umaze kwegukana iki gihembo inshuro 2 (2013 na 2017)