Akaga k’inyeshyamba mu mirwano yaguyemo umusirikare w’u Rwanda

Yanditswe na Imvaho Nshya

Ku ya 15-01-2021 saa 07:46:01
Umusirikare w'u Rwanda agenda hejuru y'ibitoryi by'amasasu mu gace ka PK12

Nta ngorane zibaho zibabaza abasirikare cyangwa umutwe uwo ari wo wose zangana no gutegura urugamba, ukagaba igitero ariko bikarangira uwo washotoye aburijemo umugambi wawe, nk’uko byagenze ku nyeshyamba zo muri Centrafrique zasubijwe inyuma ubwo zageragezaga gutera Umurwa Mukuru wa Bangui.

Ku wa Gatatu tariki ya 13 Mutarama ni bwo Umuryango w’Abibumbye watangaje akababaro watewe n’urupfu rw’umusirikare w’u Rwanda wari mu Butumwa bwo kubungabunga amahoro muri Centrafrique, nyuma y’imirwano yahuje inyeshyamba n’Ingabo ziri mu Butumwa bwa Loni (MINUSCA) ndetse n’iz’icyo Gihugu.

Cyari igitero byagaragaraga ko inyeshyamba zashyizeho umutima cyane no kwisuganya bihagije, zigamije kugera mu Murwa Mukuru wa Bangui. Icya mbere zakoze ni uguhuza imbaraga n’ibikorwa by’imitwe yitwaje intwaro itandukanye yose igamije guhungabanya umutekano w’Igihugu.

Inyeshyamba zo mu mitwe itandatu ikomeye muri icyo gihugu zihurije hamwe zirimo iza 3R/R3 (Return, Reclamation and Rehabilitation/Retour, Réclamation et Réhabilitation), Anti-Balaka, UPC (Unité pour la paix en Centrafrique), na MPC (Mouvement patriotique pour la Centrafrique)…

Izo nyeshyamba zose zahuje imbaraga zirwanya ubutegetsi bwa Perezida Faustin-Archange Touadéra, zishyigikiwe n’abanyepolitiki barimo François Bozizé wigeze kuyobora Centrafrique agahirikwa ku butegetsi mu mwaka wa 2013.

Mu gitondo cyo ku wa Gatatu ahagana saa kumi n’ebyiri,  inyeshyamba zivuye muri iyo mitwe zari zisuganyje zifite umugambi wo kwinjira mu Murwa Mukuru, ariko zisanga Ingabo z’u Rwanda n’izindi ziri mu butumwa bw’amahoro bwa Loni ziryamiye amajanja.

Bahererekanyije urufaya rw’amasasu rwamaze amaha agera kuri ane, ari na rwo rwaje kugwamo umusirikare w’u Rwanda undi umwe agakomereka nk’uko byahise bitangwazwa na Loni nyuma y’igihe gito icyo gitero kiburijwemo.

Hakurikiyeho kubarura abaguye muri icyo gitero ku ruhande rw’inyeshyamba. abarwanyi bafashwe mpiri ndetse n’intwaro zararujwe zirimo izo abarwanyi bakwiye imishwaro bataye ndetse n’izambuwe abishwe.

Imibare yaje gutangazwa nyuma igaragaza ko nubwo izo nyeshyamba ari zo zashotoye zapfuyemo 37 abandi 5 bagafatwa mpiri, ndetse n’abarokotse bagasubira mu bwihisho bwabo bimyije imoso.

Ku munsi w’ejo ni bwo Ingabo z’u Rwanda zashyikirije inzego zishinzwe umutekano muri Centrafrique intwaro n’ibindi bikoresho by’izo nyeshyamba ndetse n’abarwanyi batanu bafashwe mpiri.

Izo nyeshyamba zafatiwe mpiri mu gace ka Bimbo PK 12 aho izo nyeshyamba zahanganiye cyane n’Ingabo z’u Rwanda, kuri ubu ibitoryi by’amasasu bikaba bikwiye ahantu hose bitewe n’urufaya rw’amasasu.

Igitero cyagabwe ku wa gatatu ni cyo cyari icya mbere cyagabwe ku Murwa Mukuru wa Bangui nyuma y’amezi atandatu ashize.

Umuryango w’Abibumbye wamaganye ko inyeshyamba zizaryozwa urupfu rw’uwo Munyarwanda waguye mu Butumwa bwo bukungabunga amahoro kuko kuzigabaho ibitero biri mu byaha by’Intambara.

Ubuyobozi bw’Ingabo z’u Rwanda (RDF) buvuga ko abasirikare ba RDF bari mu butumwa bwo kubungabunga amahoro muri Centrafrique n’ahandi hose ku Isi batazacika intege mu kuzuza inshingano zo kurinda abasivili no kubungabunga umutekano w’abantu n’ibyabo bashinzwe kurinda.

Inyeshyamba zafashwe mpiri zashyikirijwe inzego zishinzwe umutekano muri Centrafrique

Inyeshyamba zateshejwe intwaro n’ibindibikoresho bya Gisirikare

Umwanditsi:

Imvaho Nshya

One Comment on “Akaga k’inyeshyamba mu mirwano yaguyemo umusirikare w’u Rwanda”

  1. Banyarwanda mukomeze muhatubere mu guhabya izo nyeshyamba. Mushake n’uburyo mwafata mpiri uwo Bozize mumujyane kwa Tuwadera. Nyagasani yakire umuvandimwe witabye Imana.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.