18°C , Intermittent clouds | Kigali-Rwanda

Abatwara ibinyabiziga basobanuriwe imikoreshereze y’ibisate by’umuhanda

Yanditswe na Mutungirehe Samuel

Ku ya 15-01-2020 saa 19:21:27
Aha umupolisi yasobanuriraga umushoferi w'imodoka impamvu bibutswa gukoresha ibisate by'umuhanda neza n'icyo bifasha mu mutekano mwiza wo mu muhanda (Foto Mucyo R.)

Polisi y’u Rwanda ishami rishinzwe umutekano wo mu muhanda ryibukije abatwara ibinyabiziga kwibuka gukoresha neza umuhanda ufite ibisate bibiri, bakibutswa ko mu Rwanda utwaye ikinyabiziga anyura mu muhanda w’iburyo akamenya igihe akoresha igisate k’ibumoso.

Ni ubukangurambaga bwatangirijwe mu mihanda yo mu Mujyi wa Kigali, muri gahunda ya mbere ya ‘Gerayo Amahoro’ y’ibyumweru 52 igeze mu cyumweru cya 36. Kuri iyi nshuro, ubukangurambaga bwatangiriye mu mihanda wa Remera uca Kisimenti n’undi unyura Prince House, ifite ibisate bibiri bibiri muri buri kerekezo cy’umuhanda.

Muri ubu bukangurambaga, abapolisi barebaga abatwaye ibinyabiziga batubahirije ayo mategeko, bakabahagarika, bakababaza icyo batekereza bahagarikiwe, hanyuma bakibutswa ubwo buryo bwo gukoresha ibisate bibiri by’umuhanda birengagije no kubibutsa ko ikindi gihe babihanirwa kuko biri mu mategeko y’umuhanda.

Umuvugizi wa Polisi y’u Rwanda, CP Kabera Jean Bosco, yatangaje ko birimo kugaragara ko abatwara ibinyabiziga batabyubahiriza igihe bageze mu muhanda ufite ibisate bibiri, ugasanga umushoferi cyangwa umumotari iyo amaze kunyura ku muntu atibuka ko agaruka mu gisate k’iburyo mu Rwanda bagenderamo.

Ati “Hari ikibazo kigenda kigaragara hirya no hino mu gihugu, cyane cyane cy’abantu batwara ibinyabiziga, by’uko batubahiriza amategeko agenga uburyo bwo kugenda mu muhanda cyane cyane mu gukoresha ibisate by’umuhanda.

Nk’aha turi, murabona ko uyu muhanda (Remera-Kisimenti) ufite ibisate bibiri, hari igisate k’iburyo n’igisate k’ibumoso; mu Rwanda rero amategeko ateganya ko tugendera mu gisate k’iburyo, dutwarira iburyo. Iyo umuntu ari mu muhanda ufite ibisate bibiri ujya gutwarira ibumoso iyo ushaka kugira ngo unyure kuri mugenzi wawe bigaragara ko agenda buhoro kandi wowe wihuta, ariko iyo umaze kumunyuraho nanone uragenda ukagaruka mu gisate k’iburyo nta bwo ukomeza mu gisate k’ibumoso.”

CP Kabera yavuze ko bakomeje kugenda babona abantu babyirengagiza nkana kandi babizi mu mategeko y’umuhanda.

Ati “Ariko rero icyo tugenda tubona n’impamvu y’iki gikorwa cyakozwe uyu munsi kandi kizakomeza no gukorwa n’ejo n’ejo bundi, ni uko abantu bagendera mu gisate k‘ibumoso bakagenda gahoro bagahagarara ntibihute bityo bikaba byateza impanuka. Urugero, wagera nk’aha kuri Zebra-Crossing ugendera ku gisate k’ibumoso ugahagarara kugira ngo umuntu yambukiranye umuhanda, uwakunyuzeho noneho ugiye kunyura ahantu habi iburyo akaba yagonga uwo muntu uguturutse imbere”.

CP Kabera yakomeje avuga ko amakosa menshi abatwara ibinyabiziga bakora aterwa ahanini no kurangara kandi polisi igiye kugira icyo ibikoraho.

Ati “Ntekereza ko hari ibintu byo gusa n’aho abantu barangara, dusanga ibintu biteza impanuka cyangwa se amakosa mu muhanda ari uburangare; nk’uko bigenda bigaragara 80% y’impanuka n’ibibazo byo mu muhanda bituruka ku burangare, kudakurikiza amategeko ku mpamvu zimwe cyangwa izindi.

Aho umuntu atwarira imodoka ni iburyo, birazwi, na we arabizi ariko ikintu kigaragara polisi igiye gukora hari ukongera kubibibutsa ariko noneho hari n’ibihano bizakurikiraho mu guhana. Abantu bakwiye kuba mu by’ukuri bubahiriza amategeko y’umuhanda ku buryo ikintu k’ikibazo kindi cyangwa impanuka zishobora kuba zaterwa n’impamvu igaragara ko ari impanuka ariko atari imigendere mibi no kwica amategeko nkana, kurangara no kudaha agaciro amategeko y’umuhanda”.

Bamwe mu bo polisi yabonyeho kwirengagiza amategeko yo gukoresha ibisate bibiri by’umuhanda, bemereye itangazamakuru ko basanzwe babizi ariko iki gikorwa ari icyo kubahwitura.

Mugwaneza Aimé yagize ati “Ni byiza cyane kwibutsa abantu uburyo bwo kugenda mu muhanda; hari igihe uba ugendera abandi nabi utabyibuka ariko ikiza mbonamo ni uko guhora batwibutsa ari ibintu byiza cyane mu kugabanya impanuka zo mu muhanda.

Iyo ugenda mu buryo busanzwe ugendera iburyo ariko waba ubona imbere yawe hari umuntu ugenda buhoro ukaba ushobora kumunyuraho, igihe hari imirongo ikase mu muhanda, ukagendera ku gisate k’ibumoso ariko wamara kumunyuraho ukagaruka mu gisate k’iburyo”.

Umumotari witwa Karambizi Felix yagize ati “Ibisobanuro mbyakiriye neza, gusa nari mbizi ariko umupolisi arongeye arampugura ndongera ndabimenya. Ubu nange ngiye kugenda ntange ubukangurambaga kuri bagenzi bange, mbabwire uko bazajya bagenda neza. Ikiza cyabyo bituma mu muhanda umutekano uboneka, impanuka zikagabanuka n’umuhanda ntuzemo umubyigano w’ibinyabiziga.”

Polisi ikomeza no gukangurira abagenzi b’abanyamaguru gukoresha umuhanda neza, bagendera ibumoso aho imodoka ziza bazireba imbere, bakirinda kandi kwambukiranya umuhanda bari kuri terefone, bafite utwumvisho twa terefone mu matwi, cyangwa ikindi kintu cyatuma badashyira ubwenge ku nzira bari kunyuramo yabagenewe bambukiranya umuhanda.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.