19°C , Partly sunny | Kigali-Rwanda

Abaturage 11,000 mu Mujyi wa Kigali baracyatuye mu manegeka – Rubingisa

Yanditswe na Twagira Wilson

Ku ya 30-12-2019 saa 14:49:26
Umuyobozi w'Umujyi wa Kigali, Rubingisa Pudence

Umuyobozi w’Umujyi wa Kigali Pudence Rubingisa avuga ko abaturage babarirwa ku bihumbi 11 mu Mujyi wa Kigali ari bo bagituye mu manegeka.

Rubingisa avuga ko muri bo harimo abatuye mu mirenge itandukanye nk’iya Gitega, Kimisagara n’ahandi, hakaba harimo abazatuzwa, ndetse na gahunda yo kubaka amazu aciriritse yo guturwamo ari bimwe mu bizakemura ikibazo cy’abatuye nabi hashobora gushyira ubuzima bwabo mu kaga.

Rubingisa yabivugiye ku kicaro cy’Umujyi wa Kigali kuri uyu wa Mbere, mu kiganiro Abadepite mu Nteko Ishinga Amategeko bagiranye n’ubuyobozi bw’Umujyi wa Kigali hamwe n’inzego z’Umugi wa Kigali harimo n’Abayobozi b’Uturere tugize Umujyi wa Kigali, Abanyamabanga   Nshingwabikorwa bose b’imirenge yo mu nkengero z’Umujyi wa Kigali ku birebana n’ishusho rusange y’ibyavuye mu ngendo  Abadepite bakoreye mu mirenge yose igize umugi, mu rwego rwo kwegera abaturage hagamijwe kumenya iterambere ry’ibikorwa remezo byibanze ku bikorerwa abaturage.

Visi Perezida w’Inteko Ishinga Amategeko Umutwe w’Abadepite Edda Mukabagwiza yagaragarije ubuyobozi bw’umugi bimwe mu bibazo  intumwa za rubanda zabashije kubona mu ngendo bakoze mu mirenge yose igize Umugi wa Kigali, aho yagarutse ku mibare y’abaturage batuye mu manegeka  nk’abagera ku bihumbi ikenda bo mu murenge wa Gitega, ikibazo cy’urubyiruko rukoresha ibiyobyabwenge n’icyo ubuyobozi bw’umugi bwiteguye gukora nk’umuti  wafasha gukemura ibyo bibazo.

Ku birebana n’ibyo bibazo byagarutsweho n’Abadepite bakabyereka ubuyobozi bw’umugi  bifashishije inyandiko z’ikoranabuhanga, Umuyobozi w’Umujyi wa Kigali Rubingisa Pudence avuga ko ari byo koko hakiri  umubare munini w’abaturage bagituye nabi bari mu manegeka avuga ko atari ku Gitega gusa ahubwo ko harimo nabo mu murenge wa Kimisagara batuye ahantu hashobora gushyira ubuzima bwabo mu kaga, uretse ko ngo abatuye nabi badafite ubushobozi ubutaka bwo kubatuzaho bwamaze kuboneka, asanga gahunda yo kubaka amacumbi aciriritse ari bimwe mu bizafasha gukemura ikibazo.,,

Ati   “Iyi nyandiko ikubiyemo ibibazo byose  mwabashije kubona nk’Abadepite bizadufasha  gukora no gutegura igenamigambi  ku iterambere ry’Umujyi wa Kigali ku bufatanye n’abandi bafatanyabikorwa, bityo bidufashe kugera ku kerekezo k’iterambere 2050, hamwe n’ingamba nshya zigamije iterambere ry’Umugi, no gushyira imbaraga mu guteza imbere ibikorwa remezo bigamije ikerekezo cy’umuturage.”

Depite Musa Fazil   yasabye ko habaho gahunda yo kurushaho kwegera no gusobanurira abaturage aho batuye ku birebana n’ibibazo bibareba kuko hari icyuho kivaho.

Ati  Hari nk’ibikorwa biba bikwiye gukorwa bitabaye ngombwa ko abantu bategereza ingengo y’imari Leta ibagenera, nk’urugero, umuhanda ugana BAOBAB wangijwe n’imodoka z’amakamyo kubera uburemere nk’ariya mabuye yavuyeho abantu baramutse bakoze ibishoboka bakayasimbura hagasanwa cyaba ari igikorwa kiza kandi abantu bagatangira umwaka mushya wa 2020 bameze neza.

Bimwe mu bibazo Abadepite bagaragarije Umujyi wa Kigali babashije kubona  aho bagiye mu mirenge ni ibikorwa remezo bitandukanye nk’imihanda y’imigenderano idahagije, amazi adahagije mu bice bimwe by’Umugi wa Kigali,  itumanaho ritagera hose bitewe n’iminara idahagije,  amateme na za ruhurura zitubatse neza ziteza ibindi bibazo n’ibindi.

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.