20°C , Partly sunny | Kigali-Rwanda

Abatahuweho COVID-19 mu Rwanda bageze kuri 320

Yanditswe na Imvaho Nshya

Ku ya 21-05-2020 saa 17:52:08

Kuri uyu wa Kane tariki ya 21 Gicurasi 2020, habonetse abarwayi bashya 6 b’icyorezo cya Koronavirusi (COVID-19) mu bipimo 1,083 byafashwe mu masaha 24 ashize, hataha umuntu umwe wakize neza, bituma umubare w’abamaze gutahurwaho icyo cyorezo kugeza ubu ugera kuri 320.

Minisiteri y’Ubuzima yatangaje ko umubare w’abakirimo kwitabwaho n’abaganga ugeze ku 103mu gihe abakize bakanasezererwa bose bageze kuri 217.

Minisiteri y’Ubuzima ivuga  ko abo barwayi ba COVID-19 bamaze gutahurwa mu bipimo 54,400 byafashwe kuva umurwayi wa mbere yatahurwa mu Rwanda muri Werurwe kugeza ubu.

Abakirwaye bakomeje kuvurirwa ahabugenewe, ndetse hakomeje igikorwa cyo gupima abantu mu Gihugu, bikaba bivugwa ko kugeza ubu nta murwayi mushya uratahurwa aturutse mu Baturarwanda hagati kuko abenshi  baba bavuye mu mahanga cyangwa mu bashyizwe kato k’iminsi 14.

Kugeza ubu ntawurabikwa mu Rwanda ko yishwe n’icyorezo cya COVID-19.

Inama y’Abaminisitiri yateranye ku wa Mbere tariki 18 Gicurasi, yanzuye ko nta gihindutse hakongera kudohorwa ku ngamba zashyiriweho kwirinda COVID-19, ingendo hagati y’Intara n’Umujyi wa Kigali, ndetse n’ibindi bikorwa by’ubuzima busanzwe byari bitaremererwa gukora bigasubukurwa tariki 1 Kamena 2020.

Abaturarwanda barasabwa kurushaho kubahiriza amabwiriza yo kwirinda iki cyorezo ari yo gusiga intera ya metero, kwambara udupfukamunwa no gukaraba intoki kenshi bakoresheje amazi meza n’isabune cyangwa alukoro yabugenewe.

Imibare yatangajwe ku rwego mpuzamahanga yerekana ko muri Afurika abamaze kwandura COVID-19 ari 96,829 barimo 38,334 bakize n’abandi 3,031 bahitanywe na cyo. Abamaze kwandura ku Isi bangana na 5,141,142 barimo abakize 2,051,407 n’abapfuye 331,732. Bivuze ko abakirimo kwitabwaho n’abaganga ku Isi bangana na 2,718,916.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.