Abasikuti n’Abagide barasabwa kugira uruhare mu gukemura ibibazo byugarije urubyiruko

Yanditswe na Mugisha Benigne

Ku ya 19-02-2020 saa 13:20:30

Umuyobozi w’Umuryango w’Abasikuti Uzabumugabo Virgile atangaza ko uyu muryango urera urubyiruko, kuri ubu ukaba uri gukora ibikorwa binyuranye mu rwego rwo kwibuka uwawushinze Baden Powell n’umufasha we Olave.

Uzabumugabo avuga ko ibikorwa by’Abasikuti n’Abagide bigamije kugaragaza uruhare rw’urubyiruko mu kubaka Igihugu, ariko kandi ngo hari ibibazo bigaragara  mu rubyiruko kurusha mu bandi Banyarwanda, aho muri iki cyumweru urubyiruko ruzaganirizwa ku bibazo binyuranye bigaragara mu rubyiruko ku nsanganyamatsiko igira iti “Musukuti na we Mugide ba ku isonga mu gukemura  ibibazo byugarije urubyiruko.”

Umuyobozi w’Abasikuti avuga ko tariki ya 22 Gashyantare buri mwaka abasukuti n’abagide bizihiza umunsi uwashinze umuryango w’Abasikuti n’abagide ndetse n’umufasha we Baden Olave bavutseho.

Ati “Hari ibibazo byugarije urubyiruko nk’ikibazo cyo gutera inda abangavu, urubyiruko rwiyahuza ibiyobyabwenge, gusesagura no kutizigamira, muri iki cyumweru turaganira kuri ibi bibazo dufatanyije n’urubyiruko dufatire hamwe ingamba z’uko twakora ubukangurambaga mu rubyiruko.”

Uzabumugabo avuga ko iki cyumweru kibanzirinzwa n’ibikorwa by’Abasukuti n’Abagide mu gihugu hose, ibibazo byavuzwe haruguru bikaba bizagarukwaho mu biganiro.

Avuga ko mu minsi umunani iki cyumweru kizamara, bazakora imirimo inyuranye, by’umwihariko avuga mu Karere ka Kamonyi bahakoze umuganda w’urubyiruko, cyane ko abasikuti na bo ari urubyiruko.

Akomoza  ku muryango w’Abasukuti n’uw’Abagide,  asobanura  ko abana batangira kwinjira mu muryango w’abasukuti ku myaka 6 naho abagide bagahera ku myaka 5, bagahugurwa ku bijyanye n’ikinyabupfura, kuvuga mu ruhame, uko bagenda bakura bagahugurwa ku miyoborere, gukunda igihugu, imibanire myiza ku buryo uri mu muryango w’abasukuti n’abagide akura ashobora kuba umuyobozi w’itsinda rito cyangwa rinini.

Uzabumugabo avuga ko ahanini Umugide n’Umusikuti baba ari intore bitewe n’indangagaciro batozwa mu muryango w’Abasukuti zijya guhura neza n’izitozwa Intore mu itorero.

Avuga ko yizera ko iki cyumweru ari intangiriro y’icyumweru cy’urugamba rw’ibibazo byugarijwe urubyiruko. Avuga kandi ko abaturage barimo gukorerwa uturima tw’igikoni ku miryango itishoboye, bagasaba ababyeyi gufasha Abasukuti n’Abagide kubona ibikoresho bikenewe mu gukora uturima tw’igikoni, nk’amasuka, ibitiyo n’ibindi kugira ngo icyo gikorwa kigerweho neza.

Uwamahoro Prisca ni umuyobozi wungirije w’Akarere ka Kamonyi ushinzwe imibereho myiza y’abaturage, ashimira cyane umuryango w’abasukuti ku bw’ibikorwa byakozwe muri aka Karere, ahatunganyijwe umuhanda wa kirometero 2 banatera ibiti bivangwa n’imyaka.

Ati “Gutunganya umuhanda bizoroshya ubuhahirane hagati y’abaturage, ibiti byatewe na byo tubitezeho gufata ubutaka buburinda isuri, ibiti bivangwa n’imyaka bizafasha kongera ifumbire muri uyu murima, bikarinda abana igwingira n’imirire mibi.”

Avuga ko ibi bikorwa byakorewe mu Mudugudu wa Mushimba, akanashimangira ko hari  ibindi bikorwa bikeneye ubukangurambaga muri gahunda zinyuranye nko kubashishikariza kwitabira Mituweri, kugira isuku, umuco wo kubana neza, kwirinda amakimbirane mu miryango, kuboneza urubyaro, ibi byose byakozwe n’urubyiruko ruri kumwe n’urubyiruko rw’abasukuti.

Uwamahoro avuga ko asanga imbere ari heza iyo arebye ikerekezo cy’urubyiruko muri iki gihe kuko bizafasha kuzamura imyumvire bubaka kwigira, bubaka ubushobozi.

Uwamahoro arasaba abaturage kubungabunga ibiti byatewe n’ibindi bikorwa kugira ngo bibashe kubagirira akamaro, aho buri wese asabwa kubungabunga ibiti bitewe mu murima we no kubyitaho ngo bitangizwa.

Umwanditsi:

Mugisha Benigne

Tanga Igitekerezo

Email yanyu ntigaragazwa ku rubuga. Amazina na Email ni ngombwa.