21°C , Partly cloudy | Kigali-Rwanda

Abapolisi b’u Rwanda 261 bagiye mu kiruhuko k’izabukuru

Yanditswe na Imvaho Nshya

Ku ya 30-06-2020 saa 21:08:56
Abapolisi batangiye ikiruhuko k'izabukuru bashimiwe umuhate n'umurava bagaragaje mu kwitangira Igihugu

Minisitiri w’Ubutabera Akaba n’Intumwa Nkuru ya Leta, Busingye Johnston yashimye abapolisi 261 bagiye mu kiruhuko cy’izabukuru barimo  abofisiye 147, abifuriza kuzagira ishya n’ihirwe mu buzima bushya batangiye.  

Ni mu muhango wo kubasezerera wabaye kuri uyu wa Kabiri tariki ya 30 Kamena 2020 wari wanitabiriwe n’Umuyobozi Mukuru wa Polisi y’u Rwanda IGP Dan Munyuza, Umuyobozi Wungirije muri Polisi ushinzwe abakozi n’imiyoborere DIGP Juvenal Marizamunda, Umuyobozi Wungirije ushinzwe ibikorwa bya Polisi DIGP Felix Namuhoranye, ndetse n’abandi bofisiye bakuru muri Polisi y’u Rwanda.

Minisitiri Busingye yabijeje ko bitangiye Igihugu gishima kandi kizahora kibyibuka, abifuriza ishya n’ihirwe mu buzima bagiyemo.

Yagize ati: “Mwabaye intwari, muri intwari mu kwihangana mwarabigaragaje, mwakomeye ku ndangagaciro z’igihugu n’iza Polisi y’igihugu, murabizi neza uko Polisi mwayinjiyemo imeze n’uko musize imeze umuntu rero yabyishimira.”

Minisitiri Busingye yasabye abakiri mu kazi gukomeza kwihangana nabo bakazagera ku munsi nk’uyu bagasezererwa mu cyubahiro kibakwiye.

Commissioner of Police (rtd) Faustin Nturushwa wavuze mu izina ry’abapolisi bose bacyuye igihe

Commissioner of Police (Rtd) Faustin Ntirushwa wavuze mu izina ry’abapolisi bose bacyuye igihe, yashimiye ubuyobozi bukuru bw’Igihugu burangajwe imbere na Nyakubahwa Perezida wa Repubulika y’u Rwanda Paul Kagame kuba barababaye hafi mu rugendo bari bamazemo imyaka myinshi bakorera igihugu.

CP (Rtd) Ntirushwa yanashimiye ubuyobozi bwa Polisi y’u Rwanda ku kinyabupfura, ubunyamwuga, ubunyangamugayo ndetse n’imibereho myiza bwabahaye.

Yavuze ko umuhango Polisi y’u Rwanda itegura wo gusezerera mu cyubahiro abageze mu izabukuru ari ikimenyetso cyiza cya gahunda z’igihugu ndetse n’urwego rwa Polisi y’u Rwanda.

Ati: “Turashimira ubuyobozi bwa Polisi y’igihugu butahwemye kutuyobora mu nzira zatumye dushobora kurangiza neza inshingano twari dushinzwe. Inzira zirimo kutwongera ubumenyi, kuduha ibikoresho nkenerwa bijyanye n’igihe, kuzamura imibereho myiza yacu n’iy‘imiryango yacu.”

CP (rtd) Ntirushwa yavuze ko abasezerewe bazakomeza kuba inyangamugayo baharanira ko ibyagezweho bitasubira inyuma kandi bakomeza guhesha isura nziza Polisi y’u Rwanda aho bazaba bari hose. Yavuze ko biteguye gukomeza gutanga umusanzu wabo mu bikorwa byose by’igihugu cyane cyane kubumbatira umutekano igihugu gifite.

Umuyobozi mukuru wa Polisi y’u Rwanda, IGP Dan Munyuza yashimiye bagenzi be bakoranaga bakaba bagiye mu kiruhuko cy’izabukuru. Abashimira  ubwitange bwabaranze mu gihe bari bamaze bakorana muri Polisi y’u Rwanda.

Ygize ati: “Twakoranye neza, mwaritanze bihangije, mwatanze imbaraga z’umubiri ndetse n’ibitekerezo. Abari bageze ku rwego rw’abofisiye bakuru mwakoze byinshi kuva cyera  mubohora igihugu.”

Minisitiri w’Ubutabera akaba n’Intumwa Nkuru ya Leta, Johnston Busingye hamwe n’Umuyobozi Mukuru wa Polisi y’u Rwanda IGP Dan Munyuza (iburyo)

 

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.