16°C , Partly cloudy | Kigali-Rwanda

Abanyarwanda bakwiye gukomeza umuco w’ubutwari- Meya wa Ruhango

Yanditswe na Gisubizo Gentil M.

Ku ya 02-02-2020 saa 18:52:24
Habarurema Valens Umuyobozi w'Akarere ka Ruhango

Mu gihe u Rwanda rwizihiza ku nshuro ya 26 Umunsi w’Intwari z’Igihugu, abatuye mu Karere ka Ruhango barasabwa kongera gutekereza no gusigasira umuco mwiza w’ubutwari.

Tariki ya 1 Gashyantare buri mwaka ni umunsi Abanyarwanda bazirikanaho Intwari zitangiye u Rwanda, uyu munsi wizihizwa mu Gihugu hose ukitabirwa n’ingeri zose hagamijwe kurushaho gusobanukirwa akamaro k’ubutwari.

Ni muri urwo rwego Akarere ka Ruhango gakoranya abaturage mu mirenge itandukanye, aho bakora ibikorwa bitandukanye bishimangira bikanashishikariza abagatuye kugira ubutwari.

Mu kiganiro Imvaho Nshya yagiranye n’Umuyobozi w’Akarere ka Ruhango Habarurema Valens, yavuze ko binyuze mu Nteko z’Abaturage bahurizwa hamwe bagasobanurirwa byinshi ku kamaro k’Intwari bityo bakabakangurira gutera ikirenge mu cyazo bakora ibikorwa bya gitwari.

Habarurema yagize ati: “Umunsi w’Intwari ni umwanya mwiza tuboneraho kongera gutekereza ku butwari bwaranze bamwe mu Banyarwanda bitanze ngo Igihugu kibe gifite umudendezo. By’umwihariko rero mu Karere kacu ka Ruhango, ku munsi ubanziriza umunsi nyirizina habaho umugoroba w’Intwari uba ugizwe n’ibiganiro bigaruka ku butwari. Uyu mugoroba wabereye mu murenge wa Kinazi haganirwa ku byiza Intwari z’igihugu zakoze  kugira ngo bibere urugero rwiza abaturage bityo na bo bahereko bagira uruhare mu kugira ubutwari mu bikorwa binyuranye byubaka Igihugu.”

Yakomeje avuga ko ibirori byo kwizihiza Umunsi w’Intwari uyu mwaka bibera mu murenge wa Mbuye, aho abaturage berekana bimwe mu bikorwa by’ubutwari bakoze hanategurwa ibiganiro n’abayobozi batandukanye biganisha ku muco w’ubutwari ukwiye kuranga abaturage ba Ruhango.

Ikiba kigamijwe cyane kuri uyu munsi ni ugusobanurira buri muturage uruhare rwe mu iterambere ry’Igihugu, gukomeza guha agaciro ibikorerwa mu Rwanda no kwishakamo ibisubizo bigamije iterambere rirambye ry’Akarere n’iry’Abanyarwanda bose.

Habarurema yongeyeho ati: “Nyuma y’ibyo birori harabaho umupira w’amaguru, uhuza imirenge ya Ruhango na Kinihira, ari na bwo hatangizwa ku mugaragaro imikino y’irushanwa rihuza imirenge rimenyerewe nka Umurenge Kagame Cup.”

Inyubako y’ibiro by’Akarere ka Ruhango

Bakiriye neza inyigisho z’ubutwari

Insanganyamatsiko yashyizweho na Minisiteri y’Urubyiruko n’Umuco ifatanyije n’Urwego rushinzwe Intwari z’Igihugu, Imidari n’Impeta by’Ishimwe (CHENO), igira iti: “Ubutwari mu Banyarwanda, Agaciro kacu”. Yatoranyijwe kugira ngo ikangurire Abanyarwanda cyane cyane urubyiruko guharanira ubutwari mu byo bakora byose gahamijwe kwihesha agaciro no kwigira.

Abaturage b’Akarere ka Ruhango bishimira ko hashyizweho umunsi wo kuzirikana Intwari z’u Rwanda kuko uba amahirwe ya buri wese yo kuzirikana amateka y’ubutwari bw’Abanyarwanda no kuyigiraho ibibafasha kwiteza imbere.

Bashima Hussen umwe mu rubyiruko waganiriye n’Imvaho Nshya utuye mu Murenge wa Ruhango, yavuze ko nk’urubyiruko bagiye kunguka inyigisho zitandukanye zirebana n’ubutwari, avuga ko yamaze kumenya neza ko umuntu adapfa kuba intwari ahubwo ko biterwa n’ibikorwa yakoze.

Bashima avuga ko nk’urubyiruko, na rwo rugomba gufata iya mbere mu guharanira ibikorwa byazabageza ku butwari kimwe n’abandi bazi babiharaniye.

Mu mateka y’Isi cyane cyane mu miryango y’abantu yateye imbere mu bihe bya kera nk’Abagereki, Abaromani n’abandi, bagiraga uburyo bashimira Intwari zabo n’abandi bantu bakoze ibikorwa bigirira umuryango w’abantu akamaro. Akenshi abashimirwaga bahabwaga imidari, icyubahiro n’andi mashimwe bitewe n’ubutwari bagaragaje cyane cyane mu bikorwa by’urugamba.

No mu Rwanda rwa mbere y’Abakoroni, Abanyarwanda bagaragazaga ibikorwa by’indashyikirwa cyane cyane ku rugamba barashimirwaga bagahabwa impeta.

Nyuma ya Jenoside yakorewe Abatutsi mu Rwanda mu 1994, Leta y’Ubumwe bw’Abanyarwanda yashyize imbere kubaka igihugu gifatiye ku muco n’amateka by’abakurambere hashyirwa imbere indangagaciro z’umuco w’ubutwari zahoze ziranga Abanyarwanda zirimo ubumwe, gukunda Igihugu, ubwitange, ubupfura, ubumuntu, gukunda umurimo kandi unoze, gufatanya n’izindi.

Ubuyobozi bw’Akarere ka Ruhango buboneyeho gushima Nyakubahwa Perezida wa Repulika Paul Kagame, wagize uruhare rukomeye mu kubohora Igihugu, utanahwema gukangurira Abanyarwanda kugira ubutwari, bunaboneraho kwifuriza Abanyarwanda bose umunsi mwiza w’Intwari z’u Rwanda.

Akarere kamaze kugira ibitaro 2 birimo ibya Kinazi

Amazu yo mu Mudugudu w’ikitegererezo wa Kigabiro

Abaturage bakomeje guharanira ubutwari mu bikorwa by’iterambere mu buhinzi n’ubworozi

Umwanditsi:

Gisubizo Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.