Abana basaga ibihumbi 70 batewe inda mu myaka ibiri, ‘abazibateye ntibakwiye kwitwa abagabo’

Yanditswe na Mugisha Benigne

Ku ya 19-11-2019 saa 16:57:00
Gusambanya umwana ni icyaha gihanwa n'amategeko y'u Rwanda

Ubushakashatsi bwa Minisiteri y’Uburinganire n’Iterambere ry’Umuryango bugaragaza ko abana 70.614 batewe inda kuva mu mwaka wa 2016 Kugeza mu 2018.

Iyi ni imibare yatangarijwe mu nama nyunguranabitekerezo yahuje inzego zinyuranye kuri uyu wa kabiri tariki ya 19 Ugushyingo 2019 ku kibazo cy’abana baterwa inda n’abagabo bakabyara imburagihe.

Iyi mibare y’ubushakashatsi igaragaza ko Intara y’uburasirazuba  yo ifite abana benshi batewe inda bangana na 19.838 bangana na 36.1%, Intara y’Amajyepfo ifite abana batewe inda bangana na 21%,  Intara y’uburengerazuba ifite abana 15.2% batewe inda, intara y’Amajyaruguru ifite 16.5% naho Umujyi wa Kigali ukagira abagera kuri 11.2% .

Ubushakashatsi bugaragaza ko imibare y’abana igaragazwa ari iy’ababashije kubyarira kwa muganga, naho abatarahageze ntibazwi.

Minisitiri w’Uburinganire n’Iterambere ry’Umuryango, Amb. Nyirahabimana Solina, nyuma yo kugaragarizwa imibare y’abana batewe inda, yasabye abagabo kugira icyo bakora mu gufasha kurandura iki kibazo burundu kuko biteye inkeke kandi kigenda gifata intera nini.

Ati “Turasaba abagabo kugira icyo bakora mu bufatanye n’abandi banyarwanda mu kurwanya ikibazo cy’abagabo basambanya abana bato bikabaviramo guterwa inda no kubyara imburagihe.”

Minisitiri Nyirahabimana asanga iki ari ikibazo kireba buri wese, ababyeyi, abana ubuyobozi n’abandi, inzego zose zikaba zigomba kukigira icyazo hagamijwe gufatanyiriza hamwe kukirwanya.

Umuyobozi mukuru wungirije w’Urwego rw’Igihugu rw’Ubushinjacyaha (RIB), Madamu Karihangabo Isabelle, yasabye abagabo gushakira izina rikwiye abasambanya abana bakabatera inda, kuko ngo ku bwe asanga abakora ibi badakwiye kwitwa abagabo kuko baba ari ugusebya iryo zina.

Ati “Ni byiza ko abagabo b’inyangamugayo bashakira izina abantu nk’aba basambanya abana bato bikabaviramo guterwa inda no kubyara imburagihe, abantu nk’aba ntibakwiye gukomeza kwitwa abagabo, ahubwo bakwiye gushakirwa izina ribakwiye kuko biswe abagabo baba basebya iri zina.”

Mukandasira Caritas, Umukozi w’Urwego rw’Igihugu rushinzwe guteza imbere ihame ry’uburinganire, yagaragaje impamvu aba bana badatanga amakuru. Yagize ati “Impamvu abana batewe inda batavuga abazibateye ni uko nta burinzi bahabwa ngo barindwe imiryango yabo cyangwa iy’ababahemukiye guhohoterwa, ahubwo ngo baheruka batanze amakuru, nyuma y’aho bagahura n’intambara zirenze izo bari bafite. Aba bana iyo bataze amakuru babaho nabi kurushaho, bagatotezwa n’imiryango yabo ibaziza ko bashyize hanze abo yita abakwe, ubundi baba ari abantu bo mu muryango umwe bakazizwa ngo ni uko bashenye umuryango, ibibazo bikababana byinshi.”

Perezida wa RWAMREC, Nzabonimpa Venant asoza iyi nama, yagarutse ku mibare iteye inkeke n’ikibazo cy’abana baterwa inda bakiri bato, avuga ko iki kibazo kitakemuka hatabayeho ubufatanye bw’inzego no guhindura imyumvire ku bagabo bubahuka gusambanya abana.

Yagize ati “Turasaba abagabo guhagurukira iki kibazo, bakagirana inama kandi ntibahishire abo baziho izo ngeso ahubwo bagahwiturana kugira ngo iki kibazo gikemuke.”

Yashimiye Leta ku bwo gukaza amategeko ahana abahamijwe icyaha cyo gusambanya abana, anashimangira ko ingamba zikomeje gufatwa ku bufatanye bwa bose iki kibazo cyakemuka.

Ubushakashatsi bugaragaza ko Akarere ka Nyagatare kaza ku isonga mu kugira abana benshi batewe inda, kagakurikirwa n’aka Gatsibo, kagakurikirwa na Gasabo na Rubavu.

Umwanditsi:

Mugisha Benigne

2 Comments on “Abana basaga ibihumbi 70 batewe inda mu myaka ibiri, ‘abazibateye ntibakwiye kwitwa abagabo’”

  1. Iyo mibare iragaragaza ahubwo ko hali icyorezo gikwiye gushakirwa umuti dushikamye: Gushikama rero si ukwitiranya ikiremwa-muntu gitera inda n’UMUGABO. Uko ni ukworoshya ikibazo, bigatuma n’igisubizo gihamye kidashakwa. Ubugabo si igitsina, si ipantalo cyangwa ikabutura kuko n’abagore/abakobwa basigaye babyambara, ahubwo UBUGABO ni imwe mu ndangagaciro ya kinyarwanda yerekana umuntu ufite ibitekerezo n’ibikorwa byubaka/byungura umulyango.
    Dore ahubwo zimwe mu nzira zo gushaka umuti urambye w’icyorezo:
    – Abo bana bacu baterwa inda babayeho bate iwabo mu milyango ? Bafite burere ki?
    – impanuro ya Nyakubahwa yo gufata umwana wese nk’uwawe yumvikanye gute mu mulyango nyarwanda?
    – Abatera inda se bo ni bantu ki? babayeho bate? Iyo mpanuro ibanza barayumva?

Tanga Igitekerezo

Email yanyu ntigaragazwa ku rubuga. Amazina na Email ni ngombwa.