18°C , Mostly cloudy | Kigali-Rwanda

“Abana bange  ntibari bazi icyanga cy’amata” – Baravuga imyato Girinka

Yanditswe na Rutayisire Emile

Ku ya 10-11-2019 saa 17:26:09
Gahunda ya Girinka yatumye batera imbere kubera umukamo ndetse bongera umusaruro w'ubuhinzi kubera ifumbire inka zitanga

Abaturage banyuranye bahawe inka ndetse n’abituwe muri gahunda ya Girinka bishimiye inka bahawe kuko byatumye batera imbere.

Nk’uko byagaragaye mu buhamya bwatanzwe n’abahawe inka kimwe n’abituwe bavuga ko bafite aho bavuye bita habi naho bageze bavuga ko hashimishije.

Mukamurigo Francine atuye mu Murenge wa Ngororero, Akagari ka Mugano, mu Karere ka Ngororero avuga ko abana be banyoye bwa mbere amata ari uko ahawe inka.

Agira ati: “Abana bange  ntibari bazi icyanga cy’amata  kuko batari barigeze bayasomaho. Ubwo nahabwaga inka muri Gahunda ya Girinka nayifashe neza nayo irankundira impa ibyo nari nyitegerejeho.

Nahoraga nibaza igihe abana bange bazanywera amata, ariko itangiye gukamwa nirinze guhita ntangira kugurisha amata ahubwo nkayakamira abana bange bakayanywa bakanezerwa nkumva nange biranshimishije.”

Akomeza avuga ko yatangiye kuyagurisha abana bamaze kuyamenyera kandi batakiyashukurira cyane ko asigaza ayo kunywa mu rugo.

Yagarutse ku buryo inka yatumye yongera ubucuti mu baturanyi kuko atangiye kuyagurisha yakamiye abana bo mu miryango ibiri, agira ati “Mu gihe nacaga inshuro meze nk’aho ntacyo maze aho mboneye inka byatumye ngira agaciro abaturanyi bagira icyo nange bankeneraho nkabakamira ndetse nkanabakopa mu gihe nta mafaranga bafite, ibyo byose bigatuma tubana neza.”

Kamiri Maurice atuye mu Karere ka Nyabihu mu Murenge wa Bigogwe, avuga ko inka yahawe muri Gahunda ya Girinka yamuzaniye umugisha. Agira ati “Inka nahawe ni umugisha mbura uko nsobanura. Usibye amata yatumye abana bagira ubuzima bwiza ndetse ngasagurira isoko, inka yampaye n’ifumbire ku buryo umusaruro w’ubuhinzi wiyongereye”.

Akomeza avuga ko ibirayi yezaga byiyongereye inshuro ebyiri ndetse abasha no kongera isambu ahinga abikesheje amafaranga akura mu mata.

Mudaheranwa Jean atuye mu Karere ka Gasabo, mu Murenge wa Bumbogo avuga ko inka yamukuye mu kiciro cy’abakene. Agira ati “Inka yatumye mva mu kiciro cya 1 cy’ubudehe ubu mbarizwa mu cya 3. Nishyura ubwisungane mu kwivuza bungana na n’amafaranga y’u Rwanda 12.000.”

Mudaheranwa avuga ko gahunda Perezida Kagame yatangije mu mwaka wa 2006 ari ingirakamaro kuko yatumye abasha kwicarana n’abandi bagabo atitinya.

Mukankusi Glycerie wo mu Mudugudu wa Kabagari  mu Karere ka Ngororero yahamije ko ijambo ubukene ritakivugwa iwe kubera inka yahawe.  Agira ati “Nahoraga nibaza uko nzava mu bukene, nkabaza umugabo wange icyo tuzaraga abana bacu ariko aho tuboneye inka ibibazo byarashize, ubuzima burahinduka ku buryo bigaragarira no ku maso.”

Akomeza avuga ko abana bafite ubuzima bwiza kandi ko kuva batangira kunywa amata batsinda neza mu ishuri akemeza ko bituruka ku munezero bafite no kumva ko nibataha batabura ibyo kurya.

Umuyobozi w’Akarere Ndayambaje Godefroid avuga ko gahunda ya Girinka yatumye imibanire y’abaturage irushaho kuba myiza. Agira ati “Imibanire mu baturage yabaye myiza kurushaho kuko uwituye n’uwituwe bahita baba inshuti.”

Akomeza avuga ko gahunda ya Girinka yatumye imirire mibi igabanuka mu bana kuko uwahawe inka akamira abaturanyi kandi ugasanga hari abo bahera amata ubuntu.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.