17°C , Partly cloudy | Kigali-Rwanda

Abamaze kwicwa na COVID-19 mu Rwanda bageze kuri 666

Yanditswe na Imvaho Nshya

Ku ya 19-07-2021 saa 21:39:30

Kuri uyu wa Mbere  taliki ya 19 Nyakanga 2021, abarwayi 17 bishwe n’icyorezo cya COVID-19 batuma abamaze kwamburwa ubuzima na cyo bagera kuri 666 nk’uko bigaragazwa n’imibare yatangajwe na Minisiteri y’Ubuzima. 

Ababuze ubuzima ni abagore cumi n’umwe b’imyaka 85 (Rusizi), 83 (Gicumbi), 83 (Nyanza), 82 (Musanze), 79, 67 (Bugesera), 75, 69, 56, 48 (Kigali) & 73 (Huye) n’abagabo batandatu b’imyaka 83, 73, 64, 30 (Kigali), 66 (Karongi) & 52 (Rusizi).

Uyu munsi kandi mu Rwanda habonetse abantu batahuweho ubwandu bwa COVID-19 mu masaha 24 bagera kuri 913, bityo umubare w’abamaze gutahurwaho virusi y’icyo cyorezo kuva cyagera mu Rwanda bagera ku 58,325.

Mu bamaze gutahurwa, harimo abagera ku 41,046 bangana na 70% bamaze gukira, aho 1,005 muri bo bakize mu masaha 24 ashize.  Ni mu gihe abakirimo kwitabwaho n’abaganga baba bari mu bitaro cyangwa mu ngo bagera ku 16,523 barimo 89 barembye.

Abarwayi bashya batangajwe barimo abo muri Musanze 152,  Kigali 140,  Kayonza 91, Burera 51, Rwamagana 42, Huye 36, Gatsibo 36,  Nyamagabe 35, Nyagatare 35, Gisagara 30, Rulindo 28, Ruhango 26, Nyabihu 25, Karongi 24, Nyanza 23, Nyamasheke 23, Ngoma 22, Muhanga 21, Gakenke 21, Gicumbi 18, Rusizi 16,  Rubavu 7,  Nyaruguru 6, Bugesera 3, na  Kirehe 1.

Ibipimo bimaze gufatwa kuva umurwayi wa mbere yatahurwa mu Rwanda ni 1,895,926 birimo 8,664 byafashwe mu masaha 24 ashize.

Umuyobozi w’Ikigo cy’Igihugu cy’Ubuzima (RBC) Dr. Nsanzimana Sabin, yavuze ko ibikorwa byo gupima COVID-19 bizakomeza no mu mavuriro cyane cyane hakumirwa ko abo virusi igaragayeho n’abagaragaje ibimenyetso batinda kubona ubuvuzi bikabaviramo kuremba cyangwa kwanduza benshi.

Inzego z’Ubuzima ziraburira abaturarwanda kwitwararika kuko mu Gihugu hageze ubwoko bwa COVID-19 yihinduranyije bwitwa Delta bugize 60% y’ubwandu bushya, bukaba bwandura vuba kandi bugatuma abantu banaremba vuba ndetse bamwe bakagira n’ibyago byinshi byo kubura ubuzima.

Uyu munsi, nta bantu bashya bahawe doze ya mbere y’urukingo rwa COVID-19, bityo abamaze gukingirwa muri rusange bagumye ku 406,004.  Ni mu gihe kandi abantu 253,087 bamaze guhabwa doze ya kabiri y’urukingo aho uyu munsi nta watewe urwo gushimangira.

Guverinoma y’u Rwanda yafashe ingamba nshya zigamije guhosha umuvuduko w’ubwandu bw’iki cyorezo, Kubera ubwiyongere budasanzwe bwa COVID-19 mu Mujyi wa Kigali no mu Turere twa Burera, Gicumbi, Kamonyi, Musanze, Nyagatare, Rubavu, Rwamagana na Rutsiro; hafashwe icyemezo cyo gushyira Umujyi wa Kigali n’utwo Turere muri Gahunda ya Guma mu Rugo (lockdown); guhera ku itariki ya 17 kugeza ku ya 26 Nyakanga 2021.

Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n’isabune cyangwa alukolo yabugenewe.

Ku Isi, abamaze kwandura COVID-19 muri rusange bararenga miliyoni 191 barimo abasaga miliyoni 174 bakize ndetse na miliyoni 4.1 z’abantu bamaze kubura ubuzima kubera icyo cyorezo.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.