17°C , Partly cloudy | Kigali-Rwanda

Abamaze gutahurwaho COVID-19 mu Rwanda bageze ku 60,066

Yanditswe na NTAWITONDA Jean Claude

Ku ya 21-07-2021 saa 23:16:46

Kuri uyu wa Gatatu taliki ya 21 Nyakanga 2021, mu Rwanda hatahuwe abarwayi bashya 925 batumye umubare w’abamaze gutahurwaho icyo cyorezo guhera muri Werurwe 2020 bagera ku 60,066. Muri abo batahuwe harimo abantu 43,055 bamaze gukira aho abantu 1,104 bakize mu masaha 24 ashize. 

Uyu munsi kandi hatangajwe abarwayi 16 bishwe n’icyorezo cya COVID-19 batuma abamaze kwamburwa ubuzima na cyo bagera kuri 693 nk’uko bigaragazwa n’imibare yatangajwe na Minisiteri y’Ubuzima.

Ababuze ubuzima ni abagore cumi na babiri b’imyaka 85, 84, 68, 60, 29 (Kigali), 80 (Nyaruguru), 76, 34, 24 (Muhanga), 75, 61 (Rubavu) & 66 (Kayonza) n’abagabo bane b’imyaka 93 (Rubavu), 80, 62 (Kigali) & 63 (Rwamagana).

Ni mu gihe abakirimo kwitabwaho n’abaganga baba bari mu bitaro cyangwa mu ngo bagera ku 1,638 barimo 74 barembye.

Abarwayi bashya batangajwe barimo abo mu Mujyi wa Kigali 122,  Gicumbi 58, Musanze 45, Ngororero 45, Rutsiro 44, Burera 43, Rubavu 43, Bugesera 39,  Kayonza 39, Huye 38,  Ngoma 38,  Karongi 38, Kamonyi 37, Gakenke 36, Nyamagabe 34, Rwamagana 31, Nyanza 30, Nyagatare 28, Nyamasheke 27,  Nyaruguru 24, Gatsibo 19, Rusizi 19,   Rulindo 16, Ruhango 16, Gisagara 15 na Muhanga 1. 

Ibipimo bimaze gufatwa kuva umurwayi wa mbere yatahurwa mu Rwanda ni 1,916,947 birimo 10,158 byafashwe mu masaha 24 ashize.

Inzego z’Ubuzima ziraburira abaturarwanda kwitwararika kuko mu Gihugu hageze ubwoko bwa COVID-19 yihinduranyije bwitwa Delta bugize 60% y’ubwandu bushya, bukaba bwandura vuba kandi bugatuma abantu banaremba vuba ndetse bamwe bakagira n’ibyago byinshi byo kubura ubuzima.

Uyu munsi, abantu bashya 7,423 bahawe doze ya mbere y’urukingo rwa COVID-19, bityo abamaze gukingirwa muri rusange bagumye ku 413,427.  Ni mu gihe kandi abantu 253,087 bamaze guhabwa doze ya kabiri y’urukingo aho uyu munsi nta watewe urwo gushimangira.

Guverinoma y’u Rwanda yafashe ingamba nshya zigamije guhosha umuvuduko w’ubwandu bw’iki cyorezo, Kubera ubwiyongere budasanzwe bwa COVID-19 mu Mujyi wa Kigali no mu Turere twa Burera, Gicumbi, Kamonyi, Musanze, Nyagatare, Rubavu, Rwamagana na Rutsiro; hafashwe icyemezo cyo gushyira Umujyi wa Kigali n’utwo Turere muri Gahunda ya Guma mu Rugo (lockdown); guhera ku italiki ya 17 kugeza ku ya 26 Nyakanga 2021.

Muri iki gihe cya Guma Mu Rugo, Inzego z’ubuzima zikomeje ibikorwa byo gupima no gukingira COVID-19 hagamijwe guharanira kwita ku banduye ndetse no gukumira ko ubwandu bushya bukomeza gukwirakwizwa. Ibi bikorwa byongerewemo imbaraga nyinshi mu Mujyi wa Kigali n’utwo turere tundi turi muri gahunda ya Guma Mu Rugo.

Umuyobozi w’Ikigo cy’Igihugu cy’Ubuzima (RBC) Dr. Nsanzimana Sabin, yavuze ko ibikorwa byo gupima COVID-19 birakomeje mu mavuriro yose cyane cyane hakumirwa ko abo virusi igaragayeho n’abagaragaje ibimenyetso batinda kubona ubuvuzi bikabaviramo kuremba cyangwa kwanduza benshi.

Mu gihe u Rwanda rutaragera nibura ku rugero rwa 60% bagomba gukingirwa, buri wese arasabwa kwitwararika no kubahiriza amabwiriza yo kwirinda ari yo gusiga intera ya metero, kwambara neza agapfukamunwa no gukaraba intoki kenshi bakoresheje amazi meza n’isabune cyangwa alukolo yabugenewe.

Ku Isi, abamaze kwandura COVID-19 muri rusange bararenga miliyoni 192 barimo abasaga miliyoni 175 bakize ndetse na miliyoni 4.1 z’abantu bamaze kubura ubuzima kubera icyo cyorezo.

Umwanditsi:

NTAWITONDA Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.