Abakoresha internet barasabwa kwitondera abo bagirana ibiganiro

Yanditswe na KAYITARE JEAN PAUL

Ku ya 10-08-2020 saa 17:54:55

Minisiteri y’Ikoranabuhanga na Inovasiyo yasabye ingeri zitandukanye z’abantu bakoresha enterineti kwitondera abo bahurira nabo kuri internet bityo bakirinda guhita babizera.

Ubutumwa bugufi iyi Minisiteri yashyize ku rubuga rwayo rwa Twita (Twitter), bugaragaza ko mu gihe cyose ugize ikibazo k’uwo rwandikirana na we, wakwihutira guhamagara Urwego rw’Ubugenzacyaha ‘RIB’.

Yagize iti: “Nta bwo buri wese muhuriye kuri enterineti ukwiye guhita umwizera. Itondere uwo uganira nawe, kandi niba umufiteho ingingimira, wimusubiza. Igihe ugize impungenge, hamagara RIB”.

Umuraza Justine yabwiye Imvaho Nshya ko kwirinda kugirira ikizere uwo ari we wese kuri enterineti ari byiza kuko bishobora kugeza umuntu aho atatekerezaga.

Ati: “Nkuhaye nk’urugero umwana w’umukobwa ashobora kwishimira kuvugana n’umuntu kuri enterineti akageza ubwo amwizera bityo akaba yagushwa mu mutego, agasambanywa cyangwa akagurishwa (Human Trafficking)”

Karumugabo Frank na we ashimangira ko igihe cyose wizeye uwo mwandikirana kuri enterineti ngo ushobora kugwa mu mutego w’abatekamutwe cyangwa n’abandi bagizi ba nabi.

Ashimangira ko akoresha imbugankoranyambaga zose ariko ko hari umupaka adashobora kurenga nko kuba yagira uwo yizera.

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.