Abakinnyi bose bazahagararira u Rwanda muri “Commonwealth Games 2018” baramenyekanye

Yanditswe na BUGINGO FIDELE

Ku ya 02-03-2018 saa 08:23:13
Bamwe mu bakinnyi bazaserukira u Rwanda muri Australia bari kumwe n'intumwa za Ambasade ya Australia n'abayobozi bo muri Komite Olempike y'u Rwanda na MINISPOC

Abakinnyi 17 mu mikino 4 ni bo bazaserukira u Rwanda mu mikino ihuza ibihugu bikoresha ururimi rw’icyongereza “Commonwealth Games 2018” izaba ibaye ku nshuro ya 21 ikazabera mu mujyi wa  Gold Coast muri  Australia kuva tariki  04 kugeza 15 Mata 2018.

Bamwe mu bakinnyi bazaserukira u Rwanda muri Australia bari kumwe n’intumwa za Ambasade ya Australia n’abayobozi bo muri Komite Olempike y’u Rwanda na MINISPOC

Nk’uko bitangazwa na Komite Olempike y’u Rwanda aba bakinnyi   ni Nyirarukundo Salome, Nizeyimana Alexis, Sugira James, Nishimwe Beatha, Ishimwe Alice na Tuyishimire Christophe mu basiganwa ku maguru “Athletics.

Hari Ndayisenga Valens, Areruya Joseph, Ukiniwabo Jean Paul Rene, Uwizeye Jean Claude, Uwizeyimana Bonaventure, Munyaneza Didier, Ingabire Beatha na Manizabayo Magnifique mu gusiganwa ku magare “Cycling”.

Abandi bakinnyi ni Nzayisenga Charlotte na Mutatsimpundu Denyse bakina Volleyball yo ku mucanga “Beach Volleyball”  naho Niyonzima Vedaste azakina mu kiciro cy’abaterura ibiremereye mu bafite ubumuga  “ Para Powerlifting”.

Aba bakinnyi bose bazahagararira u Rwanda bari kumwe n’abayobozi ba Komite Olempike y’u Rwanda ndetse na Minisiteri y’Umuco na Siporo “MINISPOC” , tariki 28 Gashyantare 2018  bakiriwe   n’intumwa z’Ambasade ya   Australia ifite ikicaro muri Kenya. Iyi  gahunda yabereye muri Serena Hotel yari igamije ahanini kumenyana, guha ikaze abazitabira iyi mikino muri kiriya gihugu no kubifuriza amahirwe mu marushanwa.

Uretse kwakirwa n’intumwa z’Ambasade ya Australia, aba bakinnyi bari kumwe n’abatoza babo bibukijwe  amabwiriza ngenderwaho y’imikino n’abakinnyi muri  aya marushanwa ndetse  banahabwa n’ikiganiro kihariye ku kwirinda ikoreshwa ry’imiti n’ibindi byongera imbaraga bitemewe mu mikino.

Aba bakinnyi bazaserukira u Rwanda bakaba baratangiye kwitegura  kugira ngo bazitware neza.

Iyi ni inshuro ya 3 u Rwanda rugiye kwitabira iyi mikino nyuma ya 2010 na 2014, gusa muri izi nshuro 2  u Rwanda nta mudali rurabasha kwegukana.

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.