Kigali-Rwanda

Partly cloudy
18°C
 

Abagore basaga ibihumbi 70 bagiye gusuzumwa kanseri y’inkondo y’umura

Yanditswe na Ngaboyabahizi Protais

Ku ya 18-07-2019 saa 17:42:07
Minisitiri Dr Gashumba Diane asaba abakobwa n'abagore kwisuzumisha Kanseri y'inkondo y'umura (Foto Ngaboyabahizi P).

Minisiteri y’Ubuzima yatangaje ko abagore bagera ku bihumbi 72 bo hirya no hino mu gihugu bagiye gusuzumwa kanseri y’inkondo y’umura muri gahunda yihariye y’ubukangurambaga bwo kurwanya ubu bwoko bwa kanseri mu bana b’abakobwa.

Ni ubutumwa bwatanzwe na Minisitiri w’ubuzima Dr Gashumba Diane, ubwo yatangizaga ku mugaragaro ubukangurambaga bwo kwisuzumisha kanseri y’inkondo y’umura, muri gahunda yo kurwanya iyi ndwara yibasira ab’igitsina gore.

Ubu bukangurambaga bwatangirijwe mu karere ka Musanze mu Ntara y’Amajyaruguru, Minisitiri Dr Gashumba akaba yasabye abagore guhindura imyumvire kuri iyi ndwara, ashishikariza abagore n’abakobwa kwipimisha kuyipimisha kugira ngo bamenye uko bahagaze.

Yagize ati: “Iyi gahunda igamije kurwanya kanseri y’inkondo y’umura ku bana b’abakobwa bafite imyaka 12, nk’uko mu mubizi igihugu cyacu ni cyo cyabaye icya mbere ku isi mu gukumira Kanseri y’inkondo y’umura, kandi abagera kuri 93% mu Rwanda barakingirwa.

Ubu rero abagore bagera ku 72,000 ni bo bazasuzumwa, abo bazayisangaho babahe imiti.Iyi gahunda ku ikubitiro izakorerwa mu turere twa Huye, Musanze, Nyamasheke, Nyarugenge na Gatsibo”.

Minisitiri Dr Gashumba akomeza asaba abagore bafite imyaka kuva kuri 30 kugeza kuri 49 kudacikanwa n’amahirwe yo kwisuzumisha hakiri kare Kanseri y’inkondo y’umura, kuko uwo basanganye ibimenyetso byayo avurwa kandi agakira.

Yagize ati: “Turashaka kurandura iyi Kanseri y’inkondo y’umura duhereye mu Karere ka Musanze, nkaba nsaba kandi urubyiruko rw’abakobwa kwirinda kwishora mu mibonano mpuzabitsina bakiri bato, kuko ari intandaro yo kwandura indwara zitandukanye zirimo na Kanseri y’inkondo y’umura”.

Bamwe mu barwaye iyi Kanseri n’abagize ibimenyetso byayo mbere, bakaza kwivuza bavuga ko bahise bayikira nk’uko Angeline Usanase w’imyaka 62, wo mu karere ka Nyarugenge yabitangarije Imvaho Nshya.

Yagize ati: “Natangiye mbona akenda k’imbere kanduye kandi ntakibyara, urumva umugore w’imyaka 58 sinari nkibyara; mpita njya kwa Nyiranuma banyohereza CHUK, nabo bahise banyohereza muri Butaro, na bo banyohereza Kenya, bankorera ibyo bita ngo ni ugushiririza.

Nahise nza gukoresha ibizamini basanga koko yarakize, ibi rero mbikesha imiyoborere myiza kuko muri urwo rugendo nakoze rw’amezi 5 muri 2018 ntabwo nigeze niyishyurira na mba ndashimira rwose Leta yacu”.

Usanase akomeza asaba abakiri bato cyane abakobwa n’abagore kujya bihutira kujya kwipimisha buri gihe, kugira ngo bamenye uko bahaze mu bijyanye n’uburwayi bwa Kanseri y’inkondo y’umura.

Kandi ashimangira ko iyo babonye ibimenyetso hakiri kare bavurwa bagakira nk’uko byamugendekeye.

Iyi ndwara ikaba igira ibimenyetso birimo kuva amaraso mu gitsina utari mu mihango, kubabara mu kiziba k’inda, kubona uruzi rudasanzwe mu gitsina, kuva amaraso mu gitsina nyuma y’imibonano mpuzabitsina no kuva amaraso mu gutsina ku mugore wamaze gucura.

Minisitiri Dr Gashumba Diane asaba abakobwa n’abagore kwisuzumisha Kanseri y’inkondo y’umura (Foto Ngaboyabahizi P).

Umwanditsi:

Ngaboyabahizi Protais

Tanga Igitekerezo

Email yanyu ntigaragazwa ku rubuga. Amazina na Email ni ngombwa.