Abafite ubumuga bishimiye ibyo Leta ibakorera

Yanditswe na Rutayisire Emile

Ku ya 17-01-2020 saa 15:02:51
Inama yahuje inzego zitandukanye iza Leta ,abikorera, n’imiryango Mpuzamahanga (Foto Rutayisire E)

Abafite ubumuga bashima Leta y’u Rwanda kubera ko yabahesheje agaciro, yubahiriza uburenganzira bwabo ikabashyiriraho amategeko abarengera ndetse n’inzego zo kuyashyira mu bikorwa.

Ibi byatangajwe na bo ejo hashize ku ya 17 Mutarama 2020 mu nama yateguwe na Minisiteri y’Ubutegetsi bw’Igihugu, MINALOC, ifatanyije n’Inama y’Igihugu y’Abafite Ubumuga, NCPD, yahuje inzego zitandukanye zaba iza Leta, abikorera n’imiryango mpuzamahanga ikorera mu Rwanda hagamijwe  kureba aho ingamba 24 u Rwanda rwiyemeje zigeze zishyirwa mu bikorwa.

Iyi nama yari igamije kumenyesha buri rwego izi ngamba no gukurikirana ishyirwa mu  bikorwa ry’ingamba rufite mu nshingano, gushishikariza buri rwego gutanga raporo y’ibyo rumaze gushyira mu bikorwa. Muri iyo nama kandi hagaragajwe aho ishyirwa mu bikorwa rigeze no gushishikariza buri rwego gushyiramo imbaraga.

Iyi nama ikaba ibaye nyuma y’inama yabereye mu Bwongereza i Londres ku wa 24 Nyakanga 2018, aho u Rwanda rwatangaje ingamba zarwo zigera kuri 24 mu guteza imbere abantu bafite ubumuga.

Umunyamabanga Nshingwabikorwa w’Inama y’Igihugu y’Abafite Ubumuga, Ndayisaba Emmanuel, yavuze ko uko abamugaye babayeho mu Rwanda bishimishije kandi ko n’inama yateranye iri muri gahunda nziza kuko Igihugu kiba cyaricaye kigashyiraho ingamba none kikaba gishaka kumenya uburyo zishyirwa mu bikorwa, ku buryo aho bitagenda neza hatangwe ibitekerezo bikorwe neza.

Yavuze kandi ku nzitizi abafite ubumuga bagifite cyane, agaruka ku burenganzira bwabo mu ikoranabuhanga. Yagize ati «Uko ikoranabuhanga ritera imbere ni ko abarikora bagomba kujya batekereza no ku bafite ubumuga. Urugero niba hakozwe icyuma cyo kubikurizamo amafaranga hagomba gutekerezwa ku burebure bwacyo ku buryo buri wese agomba gushyikira aho bandika. Ikindi bagatekareza ku nyandiko ya buraye (Braille) y’abafite ubumuga bwo kutabona kugira ngo abashe gukoresha neza icyo cyuma».

Akomeza atanga ingero nyinshi zijyanye n’ikoranabuhanga, avuga ku gukomeza  guca iheza n’ivangura rikorerwa abafite ubumuga yashimangiye ko iyo ibyo bikorwa bikomeje ntibicike ababikorerwa na bo batangira kwiheza. Ati «Iyo bahejwe na bo bagera igihe bakumva ko badakwiriye kubona iby’abandi bafite, ko badakwiriye kujya mu nzu runaka kuko batamushyiriyeho aho kunyura, kutajya muri Banki kubera ko ikoranabuhanga rihari ritorohereza abafite ubumuga, n’ibindi».

Yavuze kandi ko umwana ufite ubumuga agomba kwitabwaho hakiri kare kuko iyo avuwe kare akira kandi iyo adakize aba umutwaro ku gihugu kuko kigomba kumwitaho mu bibazo byose azagira mu buzima.

Rwehera Jamal uhagarariye abafite ubumuga bo mu idini rya Islamu mu Rwanda, yashimiye Perezida Paul Kagame wahaye agaciro abafite ubumuga ku buryo hari ibyo bamaze kugeraho. Yagize ati «Hari byinshi tumaze kugeraho kandi n’ibindi bibazo bikiriho bizagenda bikemuka kuko Leta y’u Rwanda iduha agaciro kandi yitaye ku bibazo duhura nabyo, uko ubushobozi buzajya bugenda buboneka bizakemuka».

Umuyobozi Nshingwabikorwa wa UPHLS, impuzamiryango iharanira kurwanya Sida no guharanira ubuzima bwiza, Karangwa François Xavier, yavuze ko ibikorerwa abafite ubumuga biri ku rugero rwiza urebye aho bavuye, aho bageze n’aho bagana.

Yagize ati «Mu nzego zose usanga amategeko yashyizweho arengera abafite ubumuga yubahirizwa. Nsanga ari byiza ko abamugaye bahabwa uburenganzira bwose bwo kubasha kwiga, bakabona ibikoresho byose bikenerwa kugira ngo babashe kuzamuka bagere ku rwego rwo hejuru nk’urw’abandi».

Yakomeje yibutsa abakora ibikoresho by’ikoranabuhanga ko  bagomba kwibuka abafite ubumuga na bo bakabinjiza muri gahunda y’uko ibyo bikoresho na bo baba babikeneye kandi ko ari uburenganzira bwabo nk’ikiremwamuntu».

Karangwa akaba asaba ubufatanye n’inzego zose kugira ngo ibyo amategeko yemerera abafite ubumuga babibone ndetse n’aho atubahirizwa ashyirwe mu bikorwa.

Perezida wa Komisiyo y’Igihugu y’Uburenganzira bwa muntu Nirere Madeleine yavuze ko nka Komisiyo bafite  mu nshingano kwita ku burenganzira bwa muntu ariko by’umwihariko abafite ubumuga.

Yagize ati «Kubahiriza uburenganzira bw’abafite ubumuga bisaba ubufatanye n’abafatanyabikorwa bose kugira ngo ingamba zafashwe zishyirwe mu bikorwa. Intambwe Igihugu cyateye mu gushyiraho amategeko no kuyashyira mu bikorwa ni ibyo gushima. Kuri ubu imyumvire yarahindutse ku buryo Abanyarwanda bamaze kumenya uburenganzira bw’abafite ubumuga kandi ko na bo bashoboye, bafite ubushobozi nk’ubw’abandi kuko ufite ubwonko bukora neza ntakimunanira».

Yakomeje avuga ko icyangombwa ari ukureba uko umuntu yamugaye akoroherezwa uburyo bwo gukora bitewe n’ikibazo cy’ubumuga afite. Yagarutse ku kuba nka Komisiyo bafite Komite yihariye yita ku bafite ubumuga by’umwihariko.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.