19°C , Partly cloudy | Kigali-Rwanda

Abafite ubumuga bahawe amagare azabafasha mu mukino wa Wheelchair Basketball

Yanditswe na NKOMEJE GUILLAUME

Ku ya 02-06-2018 saa 07:21:55
Abafite ubumuga bahawe amagare 12 azabafasha gukina umukino wa Wheelchair Basketball

Umuryango mpuzamahanga wita ku bafite ubumuga bw’ingingo mu Karere k’Uburasirazuba “MoveAbility ICRC Foundation”, ku bufatanye  n’Ishyirahamwe ry’imikino y’abafite ubumuga mu Rwanda “NPC-Rwanda” wahaye abafite ubumuga amagare 12 azabafasha gukina umukino wa Basketball uzwi nka “Wheelchair Basketball”.

Abafite ubumuga bahawe amagare 12 azabafasha gukina umukino wa Wheelchair Basketball

Mu gikorwa cyo kumurika ku mugaragaro aya magare cyabaye tariki 31 Gicurasi 2018 muri Salle ya NPC-Rwanda, cyabimburiwe n’umukino wabaye hagati y’abagabo bamugariye ku rugamba rwo kubohora igihugu basanzwe bakina Wheelchair Basketball bavanze n’abagore bakirimo kwigishwa uyu mukino.

Murema Jean Baptiste, Perezida wa NPC-Rwanda yatangaje ko bishimiye iyi nkunga bahawe. Avuga ko nyuma yo guhabwa aya magare, bagiye gukurikizaho kureba uko bashyiraho amakipe atandukanye y’uyu mukino mu byiciro byombi.

Yagize ati Abakinnye bose mwabonye ko  ari  abatuye muri Kigali, ariko tugiye gushinga n’andi makipe kugira ngo habeho  kwitoza mu buryo butandukanye”.

Yanatangaje ko n’ubwo aya magare 12 bahawe adahagije muri uyu mukino, ariko ku bufatanye n’uyu muryango bafitanye amasezerano y’ubufatanye mu gihe k’imyaka ibiri babemereye ko mu Kuboza 2018, bashobora kubaha andi magare 12.

Zeon De Wet,  umuyobozi w’umuryango  MoveAbility ICRC Foundation ufite ikicaro muri Tanzania yavuze ko bifuje gutangira ibikorwa byabo mu Rwanda ku bufatanye na NPC, bahereye ku guha amagare abakinnyi ba basketball y’abafite ubumuga ariko bazakomeza no mu bindi bikenewe.

Yanaboneyeho no gutangaza ko bazatera inkunga irushanwa ryo kwizihiza umunsi mpuzamahanga w’abafite ubumuga muri uyu mukino wa Wheelchair Basketball uzaba tariki 3 Ukuboza 2018.

Umukino wa Wheelchair Basketball utari umenyerewe cyane mu Rwanda, wiyongereye ku mikino ikinwa n’abafite ubumuga irimo iy’abafite ubumuga bwo kutabona “Goalball”, ubw’ingingo “Sitball” na “Sitting Volleyball”, guterura ibiremereye “Power Lifting”, n’iy’abafite ubumuga bwo mu mutwe “Boccia”.

Umwanditsi:

NKOMEJE GUILLAUME

Tanga Igitekerezo

Email yanyu ntigaragazwa ku rubuga. Amazina na Email ni ngombwa.