Abafatanyabikorwa barasabwa kongera ubufatanye mu kurengera ibidukikije

Yanditswe na Rutayisire Emile

Ku ya 19-11-2019 saa 18:32:55
Dr. Uwamariya Jeanne d'Arc Minisitiri w'Ibidukikije wa kabiri uturutse ibumoso aganira n'abafatanyabikorwa mu bikorwa byo kubungabunga ibidukikije

Minisitiri w’Ibidukikije Dr. Jeanne d’Arc Mujawamariya yasabye abafatanyabikorwa bose ba Minisiteri ayobora ndetse n’inzego zose kongera ubufatanye n’imikoranire mu rwego rwo gucengeza amahame yo kubungabunga ibidukikije n’umutungo kamere muri gahunda z’ibikorwa n’imishinga yabo, kugira ngo intego z’iterambere rirambye zibashe kugerwaho.

Ibi yabitangaje mu muhango wo gutangiza inama  nyunguranabitekerezo yahuje Minisiteri y’Ibidukikije, abafatanyabikorwa bayo barimo Ishami ry’Umuryango w’Abibumbye ryita ku Iterambere, UNDP, USAID, ndetse n’izindi nzego za Leta zinyuranye, bose bita ku kubungabunga ibidukikije, mu bikorwa bitandukanye bibarirwa muri Minisiteri, haba kubungabunga ubutaka, kubungabunga amashyamba, kubungabunga amazi n’ibindi bigize ibidukikije byose bigamije iterambere no kubungabunga ibidukikije n’umutungo kamere

Yagize ati “Kuba Isi ari wo mugabane abantu bafite, kandi imihindagurikire y’ikirere ikaba igira ingaruka nyinshi ku baturage, buri wese yakabaye yumva uburemere bwo kubungabunga ibidukikije mu rwego rwo guhangana n’ingaruka zikomoka ku mihindagurikire y’ikirere.”

Yakomeje avuga ko hakenewe kongera ubufatanye bw’inzego zose mu kurinda no kubungabunga ibidukikije n’umutungo kamere mu rwego rwo kubasha kugera ku iterambere rirambye.

Umuyobozi w’Ikigo gishinzwe kubungabunga ibidukikije (REMA), Eng. Collette Ruhamya, yagaragaje ko hakiri imbogamizi mu kubungabunga ibidukikije harimo nk’ingengo y’imari igenerwa ibidukikije iba idahagije, guhuza ibikorwa kw’inzego zose, ndetse n’ishoramari ridahagije mu kurinda ibidukikije no gukoresha neza umutungo kamere.

Yagize ati “Isesengura ry’amafaranga akoreshwa (Budget) twakoze, usanga amafaranga yose angana na 2,9% ari yo yagiye mu bidukikije kandi mu by’ukuri iyo mishinga yindi yose ayo mafaranga aba yagiyeho ikorerwa ahongaho ku bidukikije. Ni mu butaka, ni amazi, n’ubuhinzi, ni imiturire, ni amashyamba n’imyanda  ivamo nayo iva mu bidukikije”.

Yakomeje avuga ko bashaka ko izo nzego z’indi zibishyira muri gahunda zazo, niba bagiye kubaka umudugudu bagatekereza aho bawubaka, imyanda izavamo igatekerezwa aho izashyirwa, hakigwa ku buryo bwo kubaka no gukoresha ubutaka buke ku buryo abashinzwe urwo rwego babishyira muri gahunda.

Kugira ngo ibikorwa mu kubungabunga ibidukikije bigende neza, Eng. Ruhamya yavuze ko bisaba ko habaho uburyo bwo gushyiraho ubufatanye bukomeye kandi burambye n’abafatanyabikorwa bose, na za Leta mu kurinda ibidukikije n’umutungo kamere kandi bigashyirwa mu mihigo ya buri wese.

Mu butumwa yatanze yagize ati “Ubutumwa dutanga ni uko abantu bazi neza ko iyi si turiho ari imwe nta bwo yiyongera, ibyo dukora byose ni ho tubikorera nyamara ibyo dukoresha ni umutungo kamere dufite. Tugomba rero kwiga kuwukoresha neza kandi ibi ntibireba urwego rumwe, ntibireba umuntu umwe biratureba twese kugira ngo duhindure imyumvire, duhindure imikorere ntidukomeze gukora ibintu uko twabimenyereye kuko nta yindi si tuzajyaho.”

Abateraniye muri iyo nama bavuga ko hakenewe gukorwa ubushakashatsi bwimbitse ku bintu bibangamira ibidukikije kandi hakongerwa n’ubukangurambaga mu baturage ngo na bo bagire uruhare mu kubungabunga ibidukikije kuko kwangirika kwabyo ari bo bigiraho ingaruka bwa mbere.

Umuyobozi w’Ikigo gishinzwe Ubucukuzi, gaze na Peterori, Francis Gatare, yagaragaje ko mu bucukuzi hari gukorwa ibishoboka byose ngo hongerwe ikoranabuhanga, ndetse no kongera ubukangurambaga n’ishoramari rishyirwa muri urwo rwego mu kurengera ibidukikije n’umutungo kamere.

Agaruka ku buryo mu bucukuzi bw’amabuye y’agaciro babungabunga ibidukikije bakora ibikorwa byo gusubiranya aho bayacukuye ndetse hagaterwa ibiti.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.