24°C , Partly sunny | Kigali-Rwanda

Ababa barahuye n’abarwayi ba Koronavirusi barasabwa kwigaragaza ngo bapimwe

Yanditswe na Mugisha Benigne

Ku ya 25-03-2020 saa 12:40:45
Gukaraba intoki neza ni kimwe mu by'ibanze abantu basabwa mu kwirinda Coronavirus

Minisiteri y’Ubuzima (MINISANTE) irakangurira abantu bose baba barahuye n’abarwayi ba Koronavirusi cyangwa baheruka ku ngendo zo mu mahanga kwigaragaza kugira ngo basuzumwe banapimwe iki cyorezo.

Umunyamabanga wa Leta muri MINISANTE, Dr Mpunga Tharcisse, yagize ati, “Hagize uwaba yarahuye n’umuntu urwaye Corona cyangwa akubutse mu mahanga iki cyorezo kuvugwamo akihisha ntiyigaragaze byaba biteye agahinda. Nta mpamvu yo kugira ipfunwe kuri iyo ndwara ahubwo yaza tukamupima, tukamusuzuma tukanamuvura mu gihe twasanga yaranduye iki cyorezo.”

Akomeza avuga ko abarwayi babonetse mu minsi ya mbere nta n’umwe urapfa ngo kandi baragenda boroherwa ngo ndetse hari n’uri hafi kuzuza iminsi 14 aho bateganya kumusezerera mu minsi 4 cyangwa itanu iri imbere kuko azaba yakize.

Dr Mpunga asaba buri wese wumva afite ibimenyetso by’indwara kugana kwa muganga agasuzumwa cyane ko ibimenyetso byayo bijya gusa n’iby’izindi ndwara nko kugira umuriro, ibucurane, kwitsamura mu buryo bukabije, kurwara umutwe no guhumeka mu buryo bugoranye.

Ati “Ndamara Abanyarwanda impungenge ko kurwara  ari ibintu bisanzwe kandi ko ntawihamagarira indwara ahubwo ni ibyago uwafashwe aba yagize. Ndabahamagarira kwirinda ipfunwe mu gihe baba bagaragaza ibimenyetso ko ahubwo bakwiye kugana kwa muganga kuko tubereyeho kubafasha no kubavura.”

Ku bijyanye n’ibikoresho byo gupima iyi ndwara bikiri bike ku isi, Dr Mpunga avuga ko iyi indwara yaje itunguranye kandi ko yabanjirije mu Bushinwa , igihugu cyihariye 1/5 cy’abatuye Isi, ndetse igakomereza mu Burayi naho hari abaturage benshi ku buryo ibikoresho byo kuyipima bitari biteganyijwe kuko yatunguranye kandi igafata benshi mu gihe gito.

Avuga rero ko ibikoresho byo kuyipima  bikiri bike ku Isi kubera izo mpamvu, ariko akamara impungenge Abanyarwanda ko ibiri mu gihugu bihagije, u Rwanda rukaba nta kibazo cy’ibikoresho rufite.

Yasoje akangurira Abanyarwanda kwihutira kwivuza mu gihe bafite ibimenyetso n’ubwo bijya gusa n’iby’izindi ndwara ngo ariko iyo bageze kwa muganga babasha gusuzumwa bakaba bamenyeshwa ko ari indwara zisanzwe cyangwa ari iki cyorezo, bityo bakavurwa.

Mu Rwanda, kuri ubu harabarurwa abarwayi 40 ba Koronavirusi, u Rwanda rukaba rufite abarwayi benshi mu Karere k’Afurika y’Iburasirazuba. Iki cyorezo cyahereye mu Bushinwa mu mpera z’umwaka ushize wa 2019.

Abamaze kwandura iyi virusi ku Isi ni 435,383, muri bo ababarirwa muri 19,620 barapfuye, mu gihe abandi 111,878 bavuwe bagakira, mu gihe abandi 303,885 bakirwaye hirya no hino mu mpande enye z’Isi.

Igihugu kiri ku isonga mu kugaragaramo umubare munini w’abanduye coronavirusi ni  u Bushinwa bwabaruye abarwayi 81,218 kuva mu Kuboza 2019, barimo 3,281 bamaze guhitanwa n’iyi virusi, hakurikiyeho u Butaliyani bwagaragayemo abarwayi  69,176, muri bo hakaba harimo 6,820 bamaze kwitaba Imana.

U Butaliyani bwari bumaze iminsi bupfusha amajana menshi y’abantu, amakuru agezweho kuri uyu wa 25 Werurwe 2020 agaragaza ko uyu munsi nta muntu wapfuye muri icyo gihugu, aho igihugu kiri ku isonga mu gupfusha benshi ari Espagne yapfushije  443 mu munsi umwe, muri rusange abamaze kwicwa na coronavirusi muri icyo gihugu bakaba ari 5,367.

Umwanditsi:

Mugisha Benigne

One Comment on “Ababa barahuye n’abarwayi ba Koronavirusi barasabwa kwigaragaza ngo bapimwe”

  1. Ikibazo ni ukumenya uyirwaye uwariwe. Mushobora no kuba mwarahuye ariko Kuko amazina yabo nagace bakomokamo bidatangazwa wasanga hari nuwahuye nabo Kandi ntabimenye. Ge numva kubamenya byafasha benshi kwigaragaza.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.