18°C , Partly sunny | Kigali-Rwanda

Nyarugunga: Abaturage bishimiye ubutumwa bwatanzwe hifashishijwe Drone

Yanditswe na KAYITARE JEAN PAUL

Ku ya 25-04-2020 saa 19:33:53
Abanyarwanda basabwa kumva ubutumwa batagombye kwirema udutsiko kugira ngo batanduzanya Koronavirusi

Abaturage bo mu murenge wa Nyarugunga mu karere ka Kicukiro mu Mujyi wa Kigali, bagaragaje ko bishimiye ubutumwa bagejejweho hifashishijwe indege nto zitagira abapirote “Drone” aho bashishikarizwaga kuguma mu rugo.

Ahagana mu saa kumi n’imwe z’umugoroba (17h00)  kuri uyu wa Gatandatu tariki 25 Mata 2020, mu gace kazwi nko mu Kajagari imbere y’ibitaro bya Gisirikare i Kanombe nibwo hagaragaye iyi Drone.

Bamwe mu baturage bari mu muhanda baje guhaha ndetse n’abacuruzi, babwiye Imvaho Nshya ko bishimiye kubona Drone yifashishwa mu kubagezaho ubutumwa bubashishikariza kuguma mu rugo.

Rwabukwisi Andrée yagize ati : “Nishimiye kubona akadege kavugira hejuru yacu katwibutsa gukomeza kuguma mu rugo ndetse no kugira isuku. Numvise ijwi hejuru yanjye ndebye mbona ni drone. Ibi bagaragaza ko inzego zacu zidushakira ibyiza no kurwanya Koronavirusi mu buryo bwose”.

Kamushana Edward wari mu Kajagari mu rwego rwo guhaha na we yishimiye ubutumwa bwatangwaga hifashishijwe drone.

Ati : “Ndabyishimiye kuko ntibisanzwe kubona drone zirimo zitanga ubutumwa muri iki gihe turi mu rugo mu rwego rwo kwirinda ikwirakwizwa rya COVID-19. Ntawe utabyishimira kuko ubwo Polisi yabitangazaga numvaga bitashoboka”.

Mugabo Gilbert yifashishije imbuga nkoranyambaga, yagaragaje ko iyi Drone yanageze mu karere atuyemo ka Nyarugenge mu murenge wa Nyakabanda.

Yagize ati : “Icyarimwe na hano mu murenge wa Nyakabanda  mu karere ka Nyarugnge ahazwi nko muri Karabaye, ubwo butumwa buri gutangwa hifashishijwe utwo tudege, kandi ni byiza biragaragara ko ubutumwa nk’ubu bwari bukenewe muri kano gace. Twese hamwe nidufatanya tuzatsinda COVID-19”.

Mu butumwa Polisi y’igihugu iherutse gutambutsa ku rubuga rwa “Twitter” yavuze ko hari ibyo isaba abaturarwanda mu gihe izi ndege zigeze mu kirere batuyemo.

Polisi y’igihugu yagize iti : “Hari nko kutarangarira izo ndege nto ahubwo mugatega amatwi ubutumwa zibagezaho kandi mukabwubahiriza uko bwakabaye. Kwirinda gusohoka mu ngo zanyu, mujya gushakisha ahantu hirengeye habafasha kubona izo ndege nto. Kwirinda kwirema amatsinda murangariye izo ndege ntoya kuko byabaviramo kwanduzanya Koronavirusi”.

Drone zifashishijwe mu kugeza ubutumwa ku batuye mu murenge wa Nyarugunga no mu tundi duce tw’Umujyi wa Kigali

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.