21°C , Partly sunny | Kigali-Rwanda

Basketball: BK izatanga inkunga ya miriyoni 135 muri uyu mwaka wa 2020

Yanditswe na BUGINGO FIDELE

Ku ya 16-01-2020 saa 17:46:04
Umuyobozi wa BK, Dr Karusisi (ibumoso) na Perezida wa FERWABA, Mugwiza Desire (iburyo) nyuma yo gushyira umukono ku masezerano mashya (Foto: BK)

Muri 2018 ni bwo ishyirahamwe ry’umukino wa Basketball mu Rwanda “FERWABA” ryasinye amasezerano y’ubufatanye na Banki ya Kigali aho  yagomba gutera inkunga ibikorwa bya  Basketball mu Rwanda mu gihe k’imyaka 3 (2019 kugeza 2021)  igatanga miriyoni 300, bivuze ko ari miriyoni 100 buri mwaka.

Nyuma y’umwaka wa mbere (2019), FERWABA na BK bavuguruye aya amasezerano  aho iyi Banki yazamuye inkunga iva kuri miriyoni 100 ku mwaka ijya kuri miriyoni 135. Aya masezerano akaba yarashyizweho umukono n’impande zombi tariki 15 Mutarama 2020.

Umuyobozi mukuru wa BK, Dr Karusisi Diane yatangaje ko umwaka wa mbere bakorana na FERWABA mu bikorwa byo guteza imbere umukino wa Basketball byagenze neza. Yavuze ko habaye amarushanwa imbere mu gihugu ndetse n’ayo hanze kandi byose byagaragaje urwego rwiza.

Ati : Twabonye ko dufite abakinnyi beza kandi bashoboye. Twarebye uburyo twakomeza gukorana kugira ngo umukino ukomeza utere imbere .”

Dr Karusisi Diane avuga  ko gukorana na FERWABA byatumye begera cyane urubyiruko  ndetse bitanga n’umusaruro kuko bamaze gufungura konti zigera ku bihumbi 22 z’abari hagati y’imyaka 18 na 25. Ati : “Ibi ni ikerekana ko abakiri bato basigaye batwibonamo  bitandukanye na mbere aho wasangaga dufite abakuze gusa.”

Mu bikorwa byabaye mu mwaka wa 2019 harimo shampiyona y’igihugu mu byiciro byombi, imikino y’abakiri bato ya 3 kuri 3 ndetse n’andi marushanwa. Habaye kandi imikino y’ijonjora ya nyuma  y’imikino y’Afurika y’amakipe yitwaye neza iwayo “BAL”.

Perezida wa FERWABA, Mugwiza Desire yagize ati : “Byabaye byiza , twagize amahirwe tubona inzu y’imikino igezweho kandi abantu baritabiriye byose ku bufatanye  na BK.”

Yakomeje avuga ko uyu mwaka wa 2020 nabwo bafite ibikorwa bitandukanye birimo  shampiyona, Basketball itagira umupaka,  imikino y’abakiri bato ndetse no kwakira imikino ya nyuma ya BAL.

Umuyobozi ushinzwe kwamamaza ibikorwa muri BK,   Nshuti Thierry yavuze impamvu iyi nkunga bagenera FERWABA yiyongereye  ari uko umubare w’amakipe azakina shampiyona yiyongereye aho mu bahungu hiyongereyeho amakipe 5 bivuze ko agomba na yo kugenerwa inkunga yo kwitegura ndetse ko no mu mikino  hari ibindi bikenewa nko guhemba abasifuzi n’ibindi.

Yanavuze ko kandi mu minsi ya vuba Sitade Nto Amahoro izatangira kuvugururwa bivuze ko imikino myinshi izajya ibera muri Kigali Arena kandi ko kugira ngo imikino ihabere bisaba indi myiteguro irenze iyari isanzwe muri Sitade Nto.

Nshuti Thierry   yanavuze ku irushanwa ry’abatarengeje imyaka 17 bakina ari 3 kuri 3  aho  yavuze ko bifuza kugera mu bice birenze ibyo bagezemo muri 2019. Ati : “Twabonye hari aho tutageze, hari nka Nyamasheke, Rusizi, Karongi, Nyagatare na Gicumbi turifuza ko  nabo twabegera.”

Perezida wa FERWABA, Mugwiza avuga ko intego bafite  ari  ugukangurira  buri wese ukina Basketball n’uyikunda kugira konti muri BK kandi ko bizeye kuzabigeraho.

Herekanwe abazajya bamamaza ibikorwa bya BK

Herekanwe abakinnyi bitwaye neza mu mwaka wa 2018-2019 aho bazamamaza ibikorwa bya BK umwaka wose “Brand Ambassadors” bakaba barahawe miriyoni 1 y’amafaranga y’u Rwanda.

Mu kiciro cy’abagabo hari Sangwe Armel (APR BBC), Ndizeye Dieudonne (Patriots BBC), Niyonsaba Bienvenue (APR BBC), Nshobozwabyosenumukiza Wilson (REG BBC) na Niyonkuru Pascal (APR BBC). Mu bagore ni Mwizerwa Faustine, Imanizabayo Laurence (The Hoops), Uwimana Asouma, Umugwaneza Charlotte na Kantore Sandra (APR BBC).

Shampiyona iheruka ya 2018-2019 yegukanwe n’ikipe ya Patriots BBC mu bagabo  aho yitwaye neza igatsinda REG BBC imikino 4-3. Mu bagore APR BBC yegukanye igikombe itsinze The Hoops imikino 4-2.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.