2019/2020: Urwego rw’Umuvunyi rwakiriye ibibazo by’akarengane 640

Yanditswe na Imvaho Nshya

Ku ya 28-10-2020 saa 10:52:50
Umuvunyi Mukuru Murekezi Anastase

Ku wa Kabiri tariki 27 Ukwakira 2020, Inteko Rusange y’Imitwe Yombi iyobowe na Perezida w’Umutwe w’Abadepite Mukabalisa Donatille, yagejejweho raporo y’ibikorwa by’Urwego rw’Umuvunyi by’umwaka wa 2019/2020 na gahunda y’ibikorwa byarwo by’umwaka wa 2020/2021.

Umuvunyi Mukuru Murekezi Anastase, yabwiye Abadepite n’Abasenateri ko mu mwaka wa 2019-2020 Urwego rw’Umuvunyi rwakiriye mu nyandiko ibibazo by’akarengane 640, birimo ibyazanywe n’abagabo 377 n’ibyazanywe n’abagore 261 n’ibibazo 2 byatanzwe n’ibigo.

Murekezi yavuze ko mu bibazo 640 byakiriwe, ibibazo 436 byarakemutse, mu gihe ibibazo 171 bigikurikiranwa mu Nzego byoherejwemo, naho 33 ntibirasuzumwa kubera ko byaje mu mpera z’umwaka.

Iyi raporo igaragaza ko abaturage bageza ibibazo ku Rwego rw’Umuvunyi biganje mu Turere two mu Mujyi wa Kigali akaba ari naho hari ibibazo byinshi bingana na 187, hagakurikiraho Intara y’Amajyepfo ifite ibibazo 134, Intara y’ Iburengerazuba ifite ibibazo 133, Intara y’Iburasirazuba ifite ibibazo 111 naho Intara y’Amajyaruguru ifite ibibazo 73.

Kuba ibibazo byinshi byinjira ari ibituruka mu Mujyi wa Kigali, ngo biterwa n’uko ari ho hari abaturage byorohera kugera ku Rwego rw’Umuvunyi kurenza ahandi kuko ruri hafi yabo.

Mu Rwego rwo kwegera abaturage, Umuvunyi Mukuru yavuze ko Urwego rw’Umuvunyi rwashyizeho za “cyber café” mu Turere 5 kugira ngo rworohereze abaturage kurugezaho ibibazo byabo bitabahenze kandi vuba batagombye kuza ku kicaro cy’Urwego rw’Umuvunyi.

Muri rusange ibibazo byose byakiriwe muri cyber-cafés ni 296. Muri byo, 31 byohererejwe Urwego rw’Umuvunyi kugira ngo rubisuzume ndetse bikaba byarakiriwe bisuzumwa mu bindi bibazo byagejejwe ku Rwego rw’Umuvunyi mu nyandiko.

Raporo igaragaza ko mu mwaka wa 2019- 2020, Urwego rw’Umuvunyi rwasesenguye kandi rugenzura imitungo yamenyekanishijwe n’abantu 1,245 muri bo 12 ntibashoboye gusobanura neza inkomoko y’umutungo wabo bityo bakorerwa iperereza. abantu 3 dosiye zabo zararangiye zishyikirizwa Ubushinjacyaha naho 9 dosiye zabo ziracyakurikiranwa.

Umuvunyi Mukuru yavuze ko mu gukumira no kurwanya ruswa n’akarengane, u Rwanda rumaze gutera intambwe ishimishije; ibi bikaba bishimangira Poritiki nziza Igihugu kihaye yo guteza imbere imiyoborere myiza n’imitangire ya Serivisi inoze mu Nzego zose.

Inkuru y’Inteko Ishinga Amategeko

 

Umwanditsi:

Imvaho Nshya

7 Comments on “2019/2020: Urwego rw’Umuvunyi rwakiriye ibibazo by’akarengane 640”

  1. Igishimishije ku Muvunyi Mukuru ni uko asubiza abamugezaho ibibazo binyuranye n’abayobozi benshi. Uretse ko Ku kibazo twamugejejeho kireba abanyarwanda 1800 babujijwe uburenganzira kuri pansiyo y’imyaka biteganyirije mu mahanga bitewe na Leta y’u Rwanda itubahirije amasezerano yagiranye n’ikindi gihugu. Twari twizeye ko Umuvunyi Mukuru yari kugisobanura neza kuko yagikurikiranye ari Minisitiri w’Abakozi ba Leta n’Umurimo, akaba ari mu bemeye ko imisanzu yacu izanwa mu Rwanda tukahabonera pansiyo. Ibyo Leta y’u Rwanda ntiyabyubahirije ahubwo iraduhamagarira gufata iyo misanzu binyuranye n’amategeko agenga ubwiteganyirize bikatubuza pansiyo burundu. Icyo kibazo twakigejeje mu Nteko Ishinga Amategeko twifuza ko bazamuhamagara akagisobanura kuko igisubizo yaduhaye kitatunyuze.

  2. Jyewe mbona ko niba icyo kibazo leta y’u Rwanda idashoboye kugicyemura nk’uko yari yabyiyemeje ijya mu mishyikirano ,abashinzwe kuturenganura nabo bakaba bakigeraho bakababwa iyo misanzu yacu yasubizwa leta y’u Burundi tukazajya gusaba ko aribo batwihera pension ?

    1. Yewe! Byaba ari amaburakindi. Simbona Leta y”u Rwanda ijya gutakambira u Burundi ngo nimusubirane imisanzu yamyu ibyo twemeye byatunaniye. Urwo si rwo Rwanda rw’ubu. Reka dukomeze duhanyanyaze dusobanure ikibazo kirumvikana ndibwira ko ari ukudahugukirwa kw’abayobozi bamwe na HE akaba ataragisobanuriwe neza, aho azacyumvira ni we nizeye uzagikemura. Naho ibyo gusubiza imisanzu mu Burundi byo, nzemera nipfire ngo “impyisi y’iwanyu ikurya ikurundarunda”.

  3. Reka, jyewe iby’impyisi y’iwanyu ikurya ikurundarunda, numva nta shingiro bifite kubishima, kuko yakurundarunda itakurundarunda byose ni ukukurya!
    Ese ubundi kuki igomba kukurya?

  4. Umuvunyi mukuru yarakwiye gusobanura impamvu yo gusaba ko imisanzu yacu izanwa mu Rwanda ivuye i Burundi. Akabisobanura nk’umuntu wagiye muri négociations zabyo. Igisubizo cye cyabaye icyo kutwikiza aho gushyira mu kuri ngo aturenganure. Imisanzu yacu bayisabye ngo imyaka twakoze i Burundi yongerwe kuyo twakoze ino , noneho batubarire pansiyo bakomatanyije iyo myaka.

  5. Ubu se Koko aka si akarengane aba banyarwanda bagiriwe. Jyewe ndabona ko niba imisanzu icyo yasabiwe kidakozwe Urwanda rwasusiza iyo misanzu iyo yavuye maze tukazajjya I Burundi gusabirayo pension nkuko Hari benshi bayigawe kuva Aho tugarukiye mu Rwanda. Buteye agahinda. Mubisanzwe negiciations zibaho kuneza y’ abaturage.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.