Kigali-Rwanda

Mostly cloudy
26°C
 

2017/2018, imanza 43 226 zashyikirijwe inkiko ubushinjacyaha bwazitsinze ku kigero cya 98,54%

Yanditswe na NIYONSENGA PATRICK

Ku ya Aug 14, 2018

Umushinjacyaha Mukuru Mutangana Jean Bosco, yatangaje ko imanza 43 226 zashyikirijwe Inkiko, ubushinjacyaha bwazitsinze ku kigero kingana na 98,54%.

Umushinjacyaha Mukuru, Mutangana Jean Bosco, asobanura ibikorwa byakozwe n’ubushinjacyaha mu mwaka 2017-2018 (Foto Niyonsenga P)

Ibi Mutangana yabigarutseho mu kiganiro Ubushinjacyaha Bukuru bwagiranye n’Itangazamakuru ejo hashize tariki 13 Kanama 2018, mu rwego rwo kugaragaza ibikorwa byakozwe n’urwo rwego mu mwaka ushize wa 2017-2018.

Yagize ati: “Imanza 43 226 zashyikirijwe inkiko ubushinjacyaha bwazitsinze ku kigero cya 98,54%, mu nzego uko ari eshatu z’ubucamanza.”

Yavuze ko mu mwaka wa 2017-2018, urwego rw’ibanze rwakiriye amadosiye 30 760 mu gihe cy’umwaka 1, naho imanza 21 789 zaregewe inkiko mu gihe 8587 zashyinguwe, 30 376 zabonewe ibisubizo, naho 384 akaba ari ibirarane, bikaba biri ku kigereranyo cya 98,75% ku rwego rw’ibanze.

Naho ku rwego rwisumbuye mu mwaka wa 2017/2018, rwo rwakiriye amadosiye 12 327, imanza 7 326 zaregewe inkiko mu gihe amadosiye 4 790 yashyinguwe, 211 ari ibirarane bikaba ku kigero cya 98.29% ku rwego rwisumbuye.

Akomoza ku rwego rukuru (National level) yavuze ko mu mwaka wa 2017/2018 rwakiriye amadosiye 136 naho imanza 61 zaregewe inkiko mu gihe 41 zashyinguwe, naho 102 zaraburanishijwe, 37 ni ibirarane, bikaba biri ku rugero rwa 73,3%.

Mutangana yasobanuye ko urwego rw’ibanze ari rwo rwibandwaho cyane kuko ari rwo rugira akazi kenshi

Ati: “Urwego rw’ibanze ni ho hantu dushyira imbaraga nyinshi kubera ibikorwa bihakorerwa, tugerageza kubaka ubushobozi bw’urwo rwego, ni ho hari abashinjacyaha benshi kuko ni ho ibirego  byose bihera. Urugero twavuga nko gukubita no gukomeretsa, ibyaha byo kwinjiza ibiyobyabwenge mu gihugu, ruswa n’ibindi”.

Yakomeje avuga ko kandi atari ihame ko imanza zose baburanye bazitsinda nk’ubushinjacyaha bukuru ko nabo hari izo bagiye batakaza.

Ku manza zijyanye n’ibyaha bimunga igihugu, Umushinjacyaha Mukuru yavuze ko baregeye inkiko imanza 441 zirimo abantu 511 bashinjwa amafaranga y’u Rwanda 745,630,709.

Ubushinjacyaha bukuru bwagaragaje ko bwakiriye ibirego bigera kuri 49, byagaragajwe muri gahunda leta yashyizeho ngo zifashe abaturage mu iterambere ari zo VUP, ubudehe, Girinka n’izindi, abantu 65 baregewe inkiko bakurikiranweho kunyereza amafaranga asaga  469,866,098.

Umushinjacyaha Mukuru akaba yarasabye abaturage gutanga amakuru ku byaha bakorerwa, yongeraho ko nta muntu uri hejuru y’amategeko, ko uwo ari we wese ugaragayeho icyaha agomba kubihanirwa hatitawe ku cyo ari cyo cyose.