12 bari bafungiwe bahawe imbabazi, biyemeza gukoresha neza EBM

Yanditswe na Twagira Wilson

Ku ya 26-10-2018 saa 13:40:43
Mbera Emmy, umuhuzabikorwa wa EBM muri RRA

Ibigo 12 byari byafungiwe imiryango kubera gukoresha nabi ibyuma bitanga inyemezabuguzi (EBM) byababariwe.

Ikigo cy’Imisoro n’Amahoro (RRA) cyatanze izo mbabazi nyuma yo gutakambirwa n’Urugaga rw’Abikorera (PSF).

Ukuriye PSF mu Mujyi wa Kigali, Bitwayiki André, yatakambye anizeza ko gukoresha nabi EBM bitazasubira.

Ibi byavugiwe mu mu nama yahuje RRA, abagaragayeho gukoresha nabi EBM ndetse n’ukuriye PSF mu Mujyi wa Kigali kuri uyu wa Kane.

Komiseri Mukuru wa RRA,Bizimana Ruganintwali Pascal, yabababariye, abasaba kutongera gukorasha EBM nabi.

Itegeko rigenga EBM rivuga ko utakoresheje neza EBM acibwa inchuro 10 y’umusoro wa VAT wanyerejwe.

Iyo bikozwe bwa kabiri acibwa akubye inshuro 20 umusoro wa TVA wari ugiye kunyerezwa.

Ariko haza n’igihano cy’inyongera, cyo gufungirwa iminsi 30, gishobora gutangwa haba ku ikosa rya mbere cyangwa se habaye isubira cyaha.

Umuhuzabikorwa w’umushinga wa EBM, Mbera Emmy, avuga ko aba bacuruzi bagiye bagaragara mu byaha byo kugabanya agaciro k’inyemezabuguzi kadahwanye n’amafaranga abakiriya babaga babishyuye cyangwa se abandi bakaba badatanga inyemezabuguzi ku bicuruzwa bimwe na bimwe.

Ati “Byose nta kindi biba bigamije usibye kunyereza umusoro wa TVA, uba wishyuwe n’abaguzi”

Mbera Emmy, umuhuzabikorwa wa EBM muri RRA, aha ni kuwa 16 Ukwakira 2018 asobanura ko igikorwa cyo gufungira abadakoresha EBM kizakomeza. Ifoto/Ububiko.

Bitwayiki André ukuriye PSF mu Mujyi wa Kigali yashimye icyemezo cya Komiseri mukuru kuba yaciye inkoni izamba akongera gufungurira abo bacuruzi.

Bitwayiki avuga ko urugaga rw’abikorera rugiye kurushaho kwegera abacuruzi kugira ngo bakoreshe EBM neza kugira ngo batazongera kugwa muri ibi bihano.

Madame Mukandekezi Odette ahagarariye sosiyete Iturize Ubeho Ltd. Yemera ayo makosa yo kwandika ibiciro bituzuye ku nyemezabuguzi.

Avuga ko ibihano byo gufungirwa iduka byabakoze ahantu kandi bibahaye isomo rikomeye ryo kutazongera gutinyuka gukoresha nabi imashini za EBM.

Umwanditsi:

Twagira Wilson

Tanga Igitekerezo

Email yanyu ntigaragazwa ku rubuga. Amazina na Email ni ngombwa.