22°C , Partly cloudy | Kigali-Rwanda

Zimbabwe: Igihe Mugabe yahawe cyarenze ateguye

Yanditswe na admin

Ku ya Nov 21, 2017

Muri Zimbabwe, Robert Mugabe yongeye gutungura abaturage b’igihugu ke n’abanyapolitiki bari biteze ko yegura ku butegetsi ku bushake mu ijambo mbwirwaruhame ryo ku Cyumweru tariki 19 Ugushyingo 2017.

Umutwe we wa politiki ZANU-PF bamaze kubona ko Mugabe akomeje kwinangira, batangaje ko bamutegereje kugeza ku wa Mbere (ejo hashize) bitarenze mbere ya saa sita, ariko iki gihe cyarageze kiranarenga ateguye.

Robert Mugabe yakira abayobozi bakuru b’ingabo za Leta ya Zimbabwe mbere y’uko avuga ijambo mbwirwaruhame kuri televiziyo ku ya 19 Ugushyingo 2017

Ikinyamakuru Jeune Afrique (J.A), kemeza ko ubwo Robert Mugabe yagezaga ijambo mbwirwaruhame ku banyazimbabwe ku Cyumweru, ngo yari aherekejwe na bamwe mu basirikare bakuru b’igihugu ke,  ngo ubona  bizeye ko ari bwegure ku butegetsi ariko batungurwa n’uko atabivugiye aho mu ruhame. Ahubwo ngo yasezeranyije ko ari we uzayobora inteko rusange y’umutwe w’ishyaka ZANU-PF mu kwezi gutaha k’Ukuboza kandi ryamaze kumweguza ku buyobozi bwaryo.

Mu ijambo rye, yagize ati «Ndabamenyesha ko mu byumweru biri imbere inteko rusange ya Zanu izaterana. Ni nanjye kandi uzaba uyoboye ibiganiro byayo». Umwe mu bakorana bya hafi na Robert Mugabe, ngo yari yatangarije J.A ko umukambwe ngo yemeye kwegura kandi ko abitangaza mu ijambo mbwirwaruhame ageza ku benegihugu.

RFI, Radio Mpuzamahanga y’u Bufaransa, iti «Ni muri urwo rwego ubuyobozi bw’umutwe wa politiki ZANU uyobora Leta ya Zimbabwe bahaye uburenganzira Inteko ishinga amategeko guterana bakeguza Robert Mugabe ku mwanya wa Perezida kuko basanga izindi nzira zose zinaniranye».

Igihe ntarengwa abarwanashyaka bari bamuhaye ngo ni mbere ya saa sita zo ku wa Mbere tariki 20 Ugushyingo 2017. RFI iti «Yego birazwi ko Zanu-PF ifite 80% by’abagize Inteko ishinga amategeko ya Zimbabwe. Byumvikane ko hazabanza gusuzumwa icyo amategeko avuga ku kweguzwa kwa Perezida kugira ngo hirindwe kwica Itegeko Nshinga».

Ibitangazamakuru mpuzamahanga bitandukanye, bitangaza ko kugeza ubu abasirikare bakuru b’igihugu barimo Gen. Chiwanga birinze gutangaza aho bahagaze nyuma y’itangazo ryo mu cyumweru gishize ko batahiritse Perezida Mugabe ku butegetsi bwa Zimbabwe. Ahubwo  ngo bashakishaga abari muri Guverinoma bamutije umurindi wo kwirukana bamwe mu bayobozi bahanze Zanu bafitiye igihugu akamaro.

RFI iti «Nubwo birinze kuvana Robert Mugabe ku mwanya wa Perezida ku mbaraga, aho bigeze niba intumwa za rubanda imitwe yombi bamukuyeho ikizere akanga kwegura ku neza, ibyo birinze byo guhirika ubutegetsi byanga bikunda bazabigwamo kuko igisirikare ari cyo gifite ijambo rya nyuma».

KAYIRA ETIENNE