20°C , Mostly cloudy | Kigali-Rwanda

ZIGAMA CSS yungutse amafaranga asaga miliyari 13.7 mu 2020

Yanditswe na Imvaho Nshya

Ku ya 02-04-2021 saa 05:39:26
Inteko Rusange ya ZIGMA CSS yitabiriwe n'abayobozi batandukanye mu nzego zishinzwe umutekano w'u Rwanda

Ubuyobozi bw’Ikigo cy’imari cyo kuzigama no kugurizanya (ZIGAMA CSS) bwatangaje ko icyo kigo cyungutse amafaranga y’u Rwanda asaga miliyari 13.7 mu mwaka wa 2020, hakaba haragaragaye inyongera y’amafaranga miliyari 2.7 ugereranyije n’inyungu ya miliyari 11 yabonetse mu mwaka wa 2019.

Iyo nyongera yatangajwe mu nama y’Inteko Rusange ya ZIGAMA CSS yateranye ku wa Kane tariki ya 1 Mata 2021 mu Mujyi wa Kigali, ku cyicaro Gikuru giherereye ku Kimihurura mu Karere ka Gasabo.

Iyo nama yayobowe na Minisitiri w’Ingabo Maj Gen Albert Murasira, ikaba yanitabiriwe na Minisitiri w’Ubutabera akaba n’Intumwa Nkuru ya Leta Johnston Busingye, Umugaba Mukuru w’Ingabo z’u Rwanda Gen Jean Bosco Kazura, abayobozi bakuru mu nzego za Gisirikare n’iz’umutekano n’abandi banyamuryango batumiwe.

Muri iyo nama, abayobozi ba ZIGAMA CSS barangajwe imbere n’Umuyobozi w’Inama y’Ubutegetsi Dr. James Ndahiro, bagaragaje uburyo icyo kigo cy’imari cyagaragaje icyizere mu bijyanye n’iterambere mu mwaka ubukungu bw’u Rwanda n’ubw’Isi bwibasiwe n’icyorezo cya COVID-19.

Bashimiye umuyoboro n’inama bahawe na Perezida wa Repubulika akaba n’Umugaba w’Ikirenga w’Ingabo z’u Rwanda Paul Kagame, wagiriye inama ikomeye icyo kigo cy’imari yo gutangira gushora mu ikoranabuhanga n’itumanaho mu isakazabumenyi mu mwaka wa 2005.

Dr James Ndahiro yagize ati: “Inyungu zose twabonye mu mwaka ushize zishingiye ku ikoreshwa rya serivisi z’ikoranabuhanga twatangije. Abanyamuryango bacu ntibatinze kumenyera gukoresha iryo koranabuhanga kandi ni byo byadufashije gukomeza iterambere rya banki. Turashima byimazeyo umuyoboro twahawe n’Umugaba w’Ikirenga washimangiye ko dukwiye gushora imari mu ikoranabuhanga, ni bwo bwari uburyo buzira amakemwa bwo gukomeza kandi twarabyiboneye by’umwihariko mu bihe bya COVID-19.”

Ubuyobozi bwa ZIGAMA CSS bwemeza ko hakomeje ibikorwa byo kwagura ikoranabuhanga mu mitangire ya serivisibinyuze mu gukoresha serivisi za Mobile Money, gukoresha application ya telefoni mu kubona serivisi zose za banki, gushyiraho ibyuma byikoresha mu gutanga amafaranga (ATM), gukoresha telefoni isanzwe mu kureba uko konti ihagaze (USSD), serivisi z’ubutumwa bugufi n’ibindi byose bifasha abanyamuryango koroherwa no kubona serivisi z’imari zinoze.

ZIGAMA CSS ni ikigo cy’imari gihuriwemo n’abanyamuryango biganjemo abakorera inzego z’umutekano zirimo Igisirikare cy’u Rwanda (RDF), Polisi y’u Rwanda, Urwego rw’Igihugu rushinzwe Imfungwa n’Abagororwa (RCS), Urwego rw’Igihugu rushinzwe Umutekano (NSS) n’Urwego rw’Igihugu rw’Ubugenzacyaha (RIB).

Mbere y’uko u Rwanda rwibasirwa n’icyorezo cya COVID-19, icyo Kigo cy’imari cyari cyihaye intego yo kugeza ku nyungu ya miliyari 15 z’amafaranga y’u Rwanda mu mwaka wa 2020 wose.

Umwanditsi:

Imvaho Nshya

Tanga Igitekerezo

Email yanyu ntigaragazwa ku rubuga. Amazina na Email ni ngombwa.