Yvanny Mpano, indi mpano ishimangira uburyohe bw’umuziki nyarwanda

Yanditswe na Twizeyimana Fabrice

Ku ya 25-11-2019 saa 16:19:26
Yvanny Mpano mu mashusho y'indirimbo Ndabigukundira

Mutangana Yves, uzwi mu muziki nyarwanda nka Yvanny Mpano, ni umwe mu bahanzi bamaze kugaragaza impano yihariye mu kuririmba no kwandika indirimbo zirimo ubuhanga haba mu buryo ziririmbwemo ndetse n’ubutumwa zitanga.

Ni umwe mu bagaragaje impano n’ubuhanga byamuhesheje amahirwe yo gutoranywa mu ba mbere bahawe amahirwe yo kwiga umuziki w’umwuga mu ishuri ry’umuziki n’ubugeni rya Nyundo.

Mu kiganiro yagiranye n’Imvaho Nshya, uyu musore yagaragaje ko na mbere yo kujya kwiga ku Nyundo yari asanzwe akora umuziki, ariko akaba yaragiye kwiga mu ishuri kuko yifuzaga kuwugiraho ubumenyi burenzeho, kugira ngo awukore mu buryo bw’umwuga umubyarire umusaruro ku giti ke ndetse n’igihugu muri rusange.

Yagize ati “Impano yange mu muziki yagaragaye kera ndetse ni naho havuye iri zina nkoresha mu muziki rya Mpano. Ubwo nagiraga amahirwe yo gutoranywa mu banyempano bahabwa amahirwe yo kujya kwiga umuziki w’umwuga ku Nyundo naravuze nti reka ngereyo numve ibyo bigisha niba hari icyo byamfasha.

Twagize amahirwe yo kwigishwa n’abarimu b’abahanga, ku buryo nahungukiye ubumenyi bwinshi, ndetse mva ku ntebe y’ishuri mfite ikerekezo gishya ngomba kuganishamo umuziki wange, ku buryo unteza imbere ndetse n’abandi bakungukira kuri ubwo bumenyi nahashye, kuko muri gahunda zange nifuza no gutanga umusanzu wange mu kuzamura izindi mpano z’umuziki nyarwanda zizaba zitarabona amahirwe yo kugaragara.”

Nyuma yo kuva ku ntebe y’ishuri, uyu muhanzi avuga ko yabaye nk’uwubuye paji nshya y’umuziki we, akora indirimbo zishimangira umwimerere w’impano ye.

Muri izo ndirimbo harimo izikunzwe cyane muri iyi minsi nka Ndabigukundira imaze kurebwa n’abantu basaga ibihumbi 285 mu gihe cy’amezi ane imaze ishyizwe ku rubuga rwa Youtube rw’uyu muhanzi, ndetse n’izindi nka Sinarenzaho, Mama Lolo, Amateka n’izindi.

Yvanny Mpano yabwiye Imvaho Nshya ko mu mishinga ya bugufi afite, harimo indirimbo yenda gushyira ahagaragara yise ‘Vision 2020’ izaba ingaruka ku kerekezo 2020 u Rwanda rwihaye ndetse n’ibyiza igihugu cyagezeho muri icyo kerekezo k’iterambere cyari cyarihaye.

Impano yatangiye kumukirigita kera

Uyu muhanzi avuga ko n’ubwo impano y’umuziki yayivukanye, ariko yatangiye gushaka kuyibyaza umusaruro ubwo yari arangije amashuri y’ikiciro rusange (Tronc Commun) ariko nk’uko abisobanura ngo ababyeyi bamusabye kubigendamo gake.

Abisobanura agira ati “Gukora umuziki byanjemo niga mu kiciro cya kabiri cy’amashuri yisumbuye, ariko mu rugo bakomeza kugenda bampagarika bambwira bati banza wige urangize amashuri yisumbuye, ubone intangiriro y’ubuzima bwawe, umuziki uzawujyamo nta bwo tukubujije”.

 “Ubu Abanyarwanda ntacyo wababeshya mu muziki”

Uyu musore avuga ko ashimishwa cyane n’uburyo Abanyarwanda bamaze gusobanukirwa umuziki, ku buryo babasha kumenya umuhanzi w’umuhanga bakamushyigikira, ibi akaba yemeza ko ari inkuru nziza ku bahanzi bafite impano nk’iye.

Yagize ati “Ikiza cy’umuziki ni uko umuntu amenya uko apima impano (ubuhanga) ku buryo wavuga uti runaka arabizi, cyangwa ntabizi, nta bwo wajya imbere y’abantu ngo ubabeshye.

Rero Abanyarwanda n’abantu bumva umuziki ugutwi kwabo kumaze gutera imbere mu myumvire y’umuziki nyarwanda, ngira ngo ni nayo mpamvu turimo guhabwa ano mahirwe, ngira ngo urabona ko muri iyi myaka harimo kugenda hazamuka abahanzi benshi kandi nizeye ko mu myaka iri imbere tuzaba dufite abahanzi b’ibyamamare mu muziki benshi.”

Yvanny Mpano ni umwe mu bize umuziki ku Nyundo

Ibanga ry’uburyohe bw’indirimbo ze riri mu kwandika neza

Yvanny Mpano ahamya ko mu buhanzi bwe imbaraga ze ahanini ziri mu mpano yo kwandika neza indirimbo. Avuga ko indirimbo ze zose ari we uziyandikira, kandi ngo uretse no kwiyandikira ajya anandikira abandi bahanzi bagenzi be indirimo.

Yagize ati “Nge ndi umwanditsi w’indirimbo, ndiyandikira nkandikira n’abandi bahanzi. Kwandika bisaba ubwonko, kubiha umwanya ntekereza ko ari ikintu umuntu aba yihariye kuko ubundi twese twakabikoze kimwe. Ntekereza ko ari impano nk’uko umuntu agira impano yo kuririmba cyane, umuntu akagira iy’ijwi ryiza cyane, ariko iyo ugize umugisha byose biregerana.”

Mu ndirimbo uyu muhanzi yandika avuga ko ashyira imbaraga cyane mu mwimerere w’ururimi, akagerageza kutavangavanga indimi mu buryo bishobora gucanga uwumva izo ndirimbo.

Abafana be ni ryo pfundo ry’ibikorwa bye

Yvanny Mpano kimwe n’abandi bahanzi batarihaza mu bushobozi babikesha umuziki, ahamya ko agifite imbogamizi z’ubushobozi buke butuma adashyira mu bikorwa imishinga ye yose uko aba yayitekereje, mu gihe yifuza.

Icyakora ngo abakunzi b’indirimbo ze bakora ibishoboka byose bakamushyigikira uko bashoboye kose, ku buryo ngo nta cyo yababuranye bagifite.

Avuga ko azakomeza guharanira kudatenguha abafana afite magingo aya, ndetse n’abandi bazakomeza kwiyongera mu bakunzi be, dore ko umuziki we urimo kwaguka buri munsi mu Rwanda ndetse no mu mahanga.

Ashimira cyane Leta y’u Rwanda ikomeza guteza imbere impano z’abana b’u Rwanda binyuze mu bikorwa bitandukanye nk’ishuri ryo ku Nyundo ryashyizeho, ibikorwa remezo byubakwa byorohereza abahanzi gukora akazi kabo,…. akaba ahamya ko nabo bazakomeza gukora ibishoboka byose mu kugira uruhare mu iterambere ry’igihugu n’imibereho myiza y’Abanyarwanda muri rusange.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.