23°C , Partly cloudy | Kigali-Rwanda

Werurwe 2020, igihe ntarengwa cyo gukoresha mubazi ku bamotari

Yanditswe na Kayitare Jean Paul

Ku ya 09-01-2020 saa 15:55:41
Ngarambe Daniel, Perezida w'Ihuriro ry'Amakoperative mu Rwanda FERWACOTAMO, avuga ko mubazi zizakoreshwa bitarenze ukwezi kwa 3 (Foto Kayitare J.Paul)

Ubuyobozi bw’Ihuriro ry’Abamotari mu Rwanda FERWACOTAMO, bwatangaje ko ukwezi kwa Werurwe 2020, ari cyo gihe ntarengwa cyo kuba abamotari bazaba bakoresha mubazi ku buryo umugenzi azajya akoresha ikarita cyangwa terefoni kugira ngo ashobore kwishyura amafaranga y’urugendo.

Mu kiganiro Imvaho Nshya yagiranye na Perezida wa FERWACOTAMO, Ngarambe Daniel, yasobanuye ko umugenzi azajya yishyura moto akoresheje ikarita cyangwa terefoni ngendanwa, ariko akagaragaza ko abamotari mubazi bazajya bazihabwa ku buntu.

Ngarambe avuga ko nyuma yo kubona ko hari imikorere itanoze mu bamotari mu bijyanye n’ikoranabuhanga, bahisemo gufatanya n’izindi sosiyete kugira ngo barebe uburyo bashyiraho mubazi.

Avuga ko Ikigo ngenzuramikorere (RURA) cyabafashije gushyiraho ibiciro by’ingendo kugira ngo umugenzi n’umumotari badahomba, akaba ari yo mpamvu iki nacyo ngo cyatekerejweho kugira ngo hage hakoreshwa mubazi.

Avuga kandi ko mubazi zigomba gutangira gukoreshwa n’abamotari bitarenze ukwezi kwa Werurwe. Yagize ati “Muri uku kwezi kwa Mutarama turatangira gushyiramo mubazi, mu nama twakoranye na RURA ndetse n’abamotari twemeranyijwe ko uko kwezi kwa Gatatu kuzajya kurangira abamotari bose bakoresha mubazi”.

Ngarambe avuga ko Yego Moto, Pascal Moto na Mara phone, ari byo bigo bazakorana ubwo abamotari bazaba batangiye gukoresha mubazi, akavuga ko icyo barimo gukora kugeza ubu, ari ukwandika abamotari no kubahugura kugira ngo bamenye umubare nyawo bagomba gushyiramo mubazi.

Uruhare rw’amakoperative ni uko ngo barimo gushyira abanyamuryango mu makoperative ku batari barimo kugira ngo uzakoresha mubazi bashobore kujya bamenya aho bamubariza n’aho bamukurikiranira na koperative ubwazo zibigizemo uruhare.

Ku rundi ruhande, FERWACOTAMO itangaza ko ikoranabuhanga rya mubazi rije gukemura ibibazo byinshi birimo kwishyura amafaranga mu ntoki kuko ngo mu bamotari ni ho hari hasigaye ihererekanya ry’amafaranga.

Ati “Abatega moto ni abantu b’abasirimu bagendana n’iterambere. Nta bantu rero bakigendana amafaranga mu mufuka akaba ari yo mpamvu twavuze tuti reka tworohereze abantu bajyane n’iterambere bityo n’abamotari bajyane n’ikoranabuhanga”.

Mugabarigira Boniface, umumotari ukorera mu karere ka Kicukiro mu Mujyi wa Kigali, avuga ko gukoresha mubazi ari byiza kuko ngo hari aho bajya bagera mu masaha y’ijoro bakamburwa ibirimo n’amafaranga, akaba ari ho ahera avuga ko ibibazo byo kwibwa amafaranga no kuyata ko bitakongera kubaho mu gihe baba bakoresha mubazi.

Ati “Gukoresha mubazi ni byiza kuko bizatuma nge ubwange ntongera guta amafaranga cyangwa ngo nyibwe mu gihe naba ngeze muri karitsiye zitari nziza nkaba nakwamburwa ayo nakoreye”.

Nkubana Ildephonse ukora akazi ko gutwara abagenzi kuri moto mu Mujyi wa Kigali, na we ashima gahunda yo gukoresha mubazi kubera ko atazongera kujya ahura n’ikibazo cyo kuvunjisha ngo agarurire umugenzi, ibintu afata nk’ibyamutwariraga umwanya mu kazi ke.

Umwanditsi:

Kayitare Jean Paul

2 Comments on “Werurwe 2020, igihe ntarengwa cyo gukoresha mubazi ku bamotari”

    1. Iyi gahunda ninziza pe, ariko se ntagihe batabivuze ngaho mukwa5 ngaho mukwa7 ubu ukwambere ko ntikurangiye?(izi nama zose zibera I Nyamirambo kdi mbampari sinjya nsib’inama).

Tanga Igitekerezo

Email yanyu ntigaragazwa ku rubuga. Amazina na Email ni ngombwa.