21°C , Partly cloudy | Kigali-Rwanda

WASAC yasobanuye igituma gusaranganya amazi bitubahirizwa uko bikwiye

Yanditswe na Mutungirehe Samuel

Ku ya 14-01-2020 saa 09:00:33
WASAC ivuga ko hari imishinga itandukanye yo gukemura ikibazo cy'amazi mu Mujyi wa Kigali

Ikigo k’igihugu gishinzwe amazi, isuku n’isukura, WASAC, kimaze igihe gitanga amatangazo  amenyesha abaturage by’umwihariko bo mu Mujyi wa Kigali uko abari mu bice bikigoranye kubona amazi bazayabona binyuze muri gahunda yo kuyasaranganya.

Gusa bamwe mu baturage bari mu bice biba byahawe izo gahunda usanga babaza impamvu batayabona kandi bahawe gahunda yayo.

Umuyobozi Mukuru wa WASAC Muzola Aimé yemereye Imvaho Nshya ko na bo bajya bagezwaho izo mbogamizi by’umwihariko izigendanye n’uko iyo gahunda itagenze neza, umuntu utayabonye abaza impamvu atayabonye.

Ati “Yego ariko ni ijyanye n’uko uko gutumanaho bitagenze neza, niba umuntu atayabonye anamenye impamvu atayabonye kuko ni ibyangombwa cyane kuvuga ngo ntiyayabonye, ariko se byatewe n’iki kuko iyo umubwiye uti nta bwo wayabonye bitewe n’uko itiyo yapfumutse na we arabyumva icyangombwa ni ubusobanuro uba umuhaye, bitandukanye n’uko yayabura kandi ntanamenye impamvu yayabuze kandi ni uburenganzira bwe kumenya uko yayabuze”.

Yakomeje agira ati “Buriya tugomba kuba tumenya ngo ni hehe, kubera ko buriya ingengabihe n’ubwo twayishyiraho itiyo igapfumuka cyangwa se uruganda rukagira ikibazo kindi rukagira ikibazo rugahagarika nta bwo biba bivuze ko iyo gahunda itagomba kubaho.

Ariko iyo habayemo ibintu bituma idakurikizwa uko byari bimeze, ibyo ni byo wenda rimwe na rimwe abantu batabasha kumva ngo basobanukirwe ariko iyo gahunda iba igomba gukurikizwa, aho itakurikijwe tukabimenya kugira ngo tumenye impamvu nayo ikamenyeshwa abantu ko uyu munsi mwari kubona amazi ariko ntimwayabonye, itiyo yapfuye, uruganda ntirwakoze, umuriro wabuze, ibintu byose bikaba bifite impamvu ibisobanura.”

Muzola avuga ko iyo hari umuturage wagaragaje ko atabonye amazi, basanze hari n’igihe abivuga atari ikibazo rusange, ku muyoboro afatiraho bakihutira kubikosora, gusa abashinzwe gahunda yo gusaranganya amazi mu bice bitandukanye by’Umujyi wa Kigali akabasaba kumenyesha abaturage icyateye guhinduka kwa gahunda batanze.

Ati “Ibyo ni ibintu biba bisaba guhanahana amakuru cyangwa se kumenya ayo makuru kuko hari n’igihe biba atari rusange, ariko hari n’igihe umuntu ashobora kuvuga ngo gahunda nta bwo yubahirizwa kandi wenda yaragize ikibazo ke bwite kitari rusange.

Icyo mbona gikomeye ni uko guhana amakuru, ni ukuvuga ngo nubwo twabibwiye abashinzwe amashami yacu bage bakurikirana. Nka Kicukiro na Gahanga nta bwo bakwiye kuba bavuga ngo hari igihe batayabonye atari ikibazo gihari kihariye, kuko ho nibura byari bimaze gutungana”.

Kuri gahunda y’icyumweru gishize, cyatangiye tariki ya 6 kugeza 12 Mutarama 2020, ku rubuga rwa Twitter rw’Ikigo WASAC, bamwe mu bari bahawe gahunda yo kubona amazi bagaburirwa n’umuyoboro w’amazi uva mu bice by’Akarere ka Nyarugenge ugana mu mirenge ya Gatsata, Runda, Nyabitare, Rugarika, Camp Militaire, Kagina, Rubona, bagaragaje ko bayategereza bagaheba.

Uwiyita @Niyo1t (Kuri Twitter) yagize ati “Mu Gatsata harimo Umudugudu (Bigega) uheruka amazi mu kwezi kwa 07/2019, iki kibazo mwagikemuye ko mwaba mufashije aba baturage mwo kagira Imana mwe! Amavomero yo mu ngo yarumye neza neza”.

Uwiyita Bikorakeny, na we yagize ati “Mubishyize mu bikorwa byaba ari byiza cyane rwose! Ikibazo ni uko mudakurikiza ibyo muba mwiyemeje”.

Abandi na bo bagaragazaga ko basa n’abibagiranye nta gahunda y’amazi babona kandi bafite ikibazo cy’amazi atarabageraho.

Bimwe mu bice WASAC ivuga ko bikigoye kugerwamo n’amazi meza itunganya ni mu bice by’Umurenge wa Kanombe, by’umwihariko muri Gasarabana na Rugunga kuko hari amazi make cyane gusa akizeza abaturage ko hari umushinga uzakemura icyo kibazo birambye.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.