18°C , Mostly cloudy | Kigali-Rwanda

WASAC: Muri Gicurasi umwaka utaha Kigali izaba ifite amazi ahagije

Yanditswe na Mugabo Lambert

Ku ya 01-11-2019 saa 17:48:21
WASAC yongerewe ingengo y'imari kugira ngo ibikorwa remezo bigeza amazi meza ku Banyarwanda byubakwe, bizatume intego ya Guverinoma y'u Rwanda igerwaho, Abanyarwa bose bazabe bafite amazi meza mu 2024 (Foto Gisubizo G)

Umuyobozi Mukuru w’Ikigo k’Igihugu cy’Amazi, Isuku n’Isukura (WASAC), Eng. Aimé Muzola, yavuze ko muri Gicurasi umwaka utaha wa 2020 muri Kigali hatazongera kubaho gusaranganya amazi, kuko ikibazo cyayo kizaba cyakemutse.

Uyu Muyobozi Mukuru wa WASAC yabitangaje mu kiganiro n’abanyamakuru, ubwo yabazwaga niba bishoboka ko iki kigo ayobora cyatanga amazi ahagije ku baturage ntiyongere kubura muri Kigali.

Muzola yavuze ko muri Gicurasi 2020 iki kibazo kizaba cyakemutse burundu, ati “Mu duce hafi ya twose, nta muntu uzongera kubura amazi, azajya aba ahari amasaha 24.”

Umuyobozi Mukuru wa WASAC yagaragaje imishinga ihari, harimo uzakemura ikibazo cy’amazi muri Kigali, ahari uruganda rwa Kanzenze ruzajya rutanga m3 40.000 buri munsi ndetse n’ibigega by’amazi birimo kubakwa.

Mu Mujyi wa Kigali harimo kubakwa ibigega by’amazi umunani bizakemura icyo kibazo k’ibura ry’amazi, aho hari ikiri i Remera gifite ubushobozi bwo kwakira amazi angana na m3 10.000, Kabeza hari igifite m3 5000, ikiri Kanombe gifite ubushobozi bwa m3 2000, n’ibindi bizatangira gutanga amazi bitarenze Gicurasi 2020.

Eng. Muzola akaba avuga ko gahunda ya Guverinoma y’imyaka irindwi, NST1, iteganya ko mu 2024 Abanyarwanda bose bazaba bafite amazi meza. Ati “Gahunda ya Leta NST1 iteganya ko Abanyarwanda bazaba bafite amazi meza ku kigero 100%. Ni muri 2024. Ubu bigeze ku kigero cya 62%.” Bityo, ngo muri 2024 buri Munyarwanda azaba afite amazi meza kandi atabura.

Ikindi Umuyobozi Mukuru wa WASAC avuga, ni uko umushinga wo gushyira amazi mu migi itandatu yunganira Umujyi wa Kigali, ari yo Muhanga, Rubavu, Rusizi, Musanze, Nyagatare na Huye, nawo uzarangira muri 2020.

Ku kibazo cy’amazi yakunze kubura muri Nyamata mu Karere ka Bugesera, yavuze ko hari ikigega kimaze kuzura aho bita Bidudu, Karumuna, kizakira amazi angana na m3 5000, kikazakemura ikibazo k’ibura ry’amazi muri Nyamata, Kanzenze ndetse cyohereze amazi ku Kibuga Mpuzamahanga k’Indege cya Bugesera. Na cyo biteganyijwe ko kizatangira gutanga amazi bitarenze Gicurasi 2020.

Umuyobozi Mukuru wa WASC akaba yarasabye abantu gukoresha amazi neza nk’umutungo basangiye. Zimwe mu nama zo kuyakoresha neza, ngo ni ukoza amenyo umuntu akoresheje agakombe, kwirinda koza ibintu no kumesa robine ifunguye, ku bakaraba amazi ashyushye basabwa gutega ibase kuri robine bategereje ko amazi ashyushye aza.

Uku gukoresha amazi make kandi neza, ngo bituma umuntu yishyura amafaranga make. Gusa, ikigo WASAC, Umuyobozi Mukuru wacyo avuga ko bagiye kuzana ‘Smart meters’, zizakemura bimwe mu bibazo byagaragaraga mu kwishyura kw’abakiriya. Eng. Muzola akaba avuga ko zizaza vuba kandi nta bwo abakiriya bazazishyuzwa, ni ugusimbura izari zisanzwe.

Umwanditsi:

Mugabo Lambert

Tanga Igitekerezo

Email yanyu ntigaragazwa ku rubuga. Amazina na Email ni ngombwa.