22°C , Partly cloudy | Kigali-Rwanda
Ahari Nayikondo zitagikoreshwa zigiye kuzasanwa hongerweho n'izindi zikoresha imirasire y'izuba

WASAC igiye kwifashisha imirasire y’izuba mu kongera amazi mu byaro

Yanditswe na MUTUNGIREHE SAMUEL

Ku ya 07-02-2018 saa 07:23:06

Umuyobozi wungirije w’ikigo k’Igihugu gishinzwe amazi n’isukura, WASAC, mu bice by’icyaro, Umuhumuza Gisele, avuga ko muri gahunda yo kongera amazi akagera ku baturage bose 100% hiryo no hino mu byaro hagiye kwifashishwa amavomo akura amazi mu butaka “Nayikondo” akoreshwa n’imirasire y’izuba.

Ahari Nayikondo zitagikoreshwa zigiye kuzasanwa hongerweho n’izindi zikoresha imirasire y’izuba

Ati “Ubundi Nayikondo ni uburyo bwo gucukura amazi tukayavana ikuzimu, icyo gihe biterwa n’ingufu wakoresheje. Izo dusanzwe tumenyereye ni ikoreshwa n’imbaraga z’amaboko; icyo gihe amazi uyavana ahantu hatari kure, muri metero 30 z’ubujyakuzimu.

Iyo ukoresheje imbaraga z’izuba cyangwa imbaraga za moteri ushobora gukurura amazi kugeza muri metero 100 z’ubujyakuzimu, icyo gihe uzamura amazi aba yayunguruwe kubera ubutabire bw’ikuzimu busanzwe buriho ndetse ayo mazi aba yaciye mu nzira kamere ziyungurura amazi, ukazamura amazi menshi kandi meza. Icyo rero ni cyo dushaka kwitabira mu rwego rwo kugira ngo dukoreshe za nayikondo zisanzwe ariko tunakoreshe n’izindi ngufu z’izuba mu kuvoma amazi.”

Akomeza asobanura ko ‘Nayikondo’ z’amaboko nazo zigihari ariko bazi neza ko hari n’aho zitagikora neza kuko zapfuye bitewe n’impamvu zitandukanye.

Ati “Turabizi ko hari aho zagiye zipfa, impamvu zirimo kuba haba hatarimo ubumenyingiro hafi aho mu nteko z’abaturage bashobora guhita bazisana hakiri kare. Iyo hapfuyeho nka kariya gakoresho bafatisha intoki (handle) kakavaho ejo ukakihorera na ka kandi kari mo hasi kuri pompe nako kageraho kakagwa umugese ntihabeho kuzamura amazi kuko hatabayeho icyo kintu cyo kubikurikirana. Ibyo ni byo turimo kugira ngo bashobore kubyisanira, inteko z’abaturage zigatozwa.”

Muri gahunda yo kongera amazi mu byaro, cyane mu Ntara y’Iburasirazuba harimo imishinga itandukanye; mu karere ka Bugesera hari uruganda rw’amazi ruzajya rutanga metero kibe (m3) 5000 ku munsi ruzarangira muri uyu mwaka wa 2018, mu mujyi wa Nyagatare, n’izindi nyigo zo kuzongera amazi mu gice cy’iyo ntara.

Umuhumuza akomeza avuga ko muri gahunda yo kugeza amazi meza ku baturage 100% mu 2024, hari ibintu bibiri bigiye kwibandwaho ari byo kongera inganda zitunganya amazi no gusana  imiyoboro y’amazi isanzwe ihari cyane iyo mu Mujyi wa Kigali.

Ati “Birajyana no kongera inganda zitunganya amazi, kongera imiyoboro y’amazi no gusana iyo miyoboro yangiritse.”

Ikigo WASAC kivuga kandi ko imirimo yo kongera ingano y’amazi mu Mujyi wa Kigali igeze kure kuko imirimo yo kubaka uruganda rutunganya amazi rwa Nzove III igeze kuri 98% rukaba rushobora gutahwa muri uku kwezi kwa Gashyantare 2018, rukazatanga amazi angana na metero kibe 40 000 ku munsi.

TANGA IGITEKEREZO

Leave a Reply

Be the First to Comment!

avatar