21°C , Partly cloudy | Kigali-Rwanda
Ngarambe Laurent, umuyobozi wa UNIK VC wemeza ko batazitabira amarushanwa y'uyu mwaka w'imikino wa 2018-2019

Volleyball: UNIK VC nta bwo izitabira amarushanwa mu mwaka w’imikino wa 2018-2019

Yanditswe na NKOMEJE GUILLAUME

Ku ya 25-10-2018 saa 08:55:28

Ubuyobozi bw’ikipe ya Kaminuza ya Kibungo mu mukino wa Volleyball “UNIK VC”, buratangaza ko bamaze gufata ikemezo cy’uko batazakina amarushanwa ategurwa n’ishyirahamwe ry’umukino wa Volleyball mu Rwanda “FRVB” muri mwaka w’imikino wa 2018-2019.

Ngarambe Laurent, umuyobozi wa UNIK VC wemeza ko batazitabira amarushanwa y’uyu mwaka w’imikino wa 2018-2019

Muri aya marushanwa ategurwa na FRVB harimo shampiyona y’igihugu ya Volleyball, iteganyijwe kuzatangira tariki 10 Ugushyingo 2018, nk’uko byemejwe mu nama y’inteko rusange iheruka.

Aganira n’Imvaho Nshya, Perezida w’ikipe ya UNIK VC, Ngarambe Laurent yatangaje ko bandikiye FRVB babamenyesha ko batazitabira amarushanwa y’uyu mwaka w’imikino wa 2018-2019. Yagize ati Twabandikiye tubayimenyesha ko tubaye duhagaritse kwitabira amarushanwa y’uyu mwaka w’imikino wa 2018-2019.”

Ngarambe uvuga ko bateganya gushyikiriza FRBV iyi baruwa ihagarika kwitabira amarushanwa y’uyu mwaka w’imikino bitarenze uyu munsi tariki 25 Ukwakira 2018  agaragaza ko ahanini byatewe n’uko bafite ikibazo cy’amikoro adahagije.

Ati “Mu mashuri makuru hagiye harimo ibibazo by’amikoro ahanini aterwa n’igabanuka ry’abanyeshuri, twahoze dufite abanyeshuri bagera ku bihumbi 4 500, ubu twari dufite abagera ku bihumbi 2, na bo hari impungenge z’uko bashobora kugabanuka kuko hari abagera kuri magana 4, bazasoza amashuri mu Kuboza 2018.”

Uyu muyobozi atangaza ko muri uyu mwaka bagiye bateganya kwita cyane ku bijyanye n’amasomo bakabifatanya no kwicara bagasuzuma ibibazo bafite, bagashaka n’abaterankunga bityo bazagaruka umwaka utaha bahagaze neza.

AVUGA KO BAZAKOMEZA KWITABIRA AMARUSHANWA AHUZA ZA KAMINUZA

Ngarambe Laurent, Perezida wa UNIK VC yemeza ko nubwo bahagaritse kwitabira amarushanwa ategurwa na FRVB bazakomeza kwitabira amarushanwa ahuza za Kaminuza haba imbere mu gihugu ndetse no hanze.

Ati “Nubwo tutazakina aya marushanwa, gusa tuzakina amarushanwa ahuza za Kaminuza zo mu Rwanda no hanze kuko dufite abakinnyi n’abakozi bafite ubushobozi bwo kuba bakitabira.”

UNIK yahoze yitwa INATEK yigeze kugira ikipe ikomeye ndetse  inegukana igikombe cya shampiyona muri 2015 na 2016 , mu mwaka ushize w’imikino wa 2018 yasoreje ku mwanya wa 6 mu makipe 9 n’amanota 18.

 

 

 

 

 

 

 

 

 

 

 

TANGA IGITEKEREZO

One Comment on “Volleyball: UNIK VC nta bwo izitabira amarushanwa mu mwaka w’imikino wa 2018-2019”

  1. UNIK Mwafashe umwanzuro mwiza, wo kubanza kwiyubaka no gushaka ubushobozi nyuma mukazagarukana imbaraga mu mikino.

Leave a Reply

Your email address will not be published. Required fields are marked *