24°C , Intermittent clouds | Kigali-Rwanda
Niyogisubizo Samuel uzwi nka Tayson wifuza kuzakina ku rwego mpuzamahanga

Volleyball: Ubuzima bwa Niyogisubizo wifuza gukina ku rwego mpuzamahanga

Yanditswe na Nkomeje Guillaume

Ku ya 12-02-2019 saa 12:57:15

Niyogisubizo Samuel uzwi ku izina rya “Tyson”, ni umwe mu bakinnyi bafitiye runini ikipe ya Volleyball ya Kaminuza y’Ubukerarugendo, Ikoranabuhanga n’Ubucuruzi (UTB VC), ikina muri shampiyona y’igihugu y’ikiciro cya mbere mu mukino wa Volleyball.

Mu mwaka we wa mbere akinira UTB VC, nyuma y’uko ayigezemo avuye muri Kirehe VC mu 2018, amaze kugaragaza ko yaje ari umukinnyi wari ukenewe ahanini bitewe n’ibyo amaze kuyigezaho.

Niyogisubizo yabashije kuyifasha gutwara igikombe k’irushanwa ry’Intwari “Intwari Volleyball Tournament 2019”, ry’uyu mwaka wa 2019, nyuma y’uko itsinze Gisagara VC ku mukino wa nyuma amaseti 3 kuri1.

Yamaze no gufasha gusoreza ku mwanya wa 2 muri shampiyona ya 2019 n’amanota 28, irushwa na REG VC ya mbere inota rimwe gusa (29). Ibi byayihesheje itike yo kuzakina na Playoffs, ikaba izahura na Gisagara VC yabaye iya 3 n’amanota 28, tariki 15 Gashyantare 2019.

Mu kiganiro kirambuye yagiranye n’Imvaho Nshya (I.N), Niyogisubizo Samuel (N.S) ufite amasezerano y’imyaka 3 akinira UTB VC yavuze ku rugendo rwe mu mukino wa Volleyball ndetse anatangaza ku ntumbero afite mu gihe kiri imbere.

Yatangiye yivuga uwo ari we mu magambo make

Amazina ni Niyogisubizo Samuel Tyson. Navukiye muri Tanzania, tariki 26 Ugushyingo 1995. Ababyeyi ni Mukanzayirambaho Claudette na data Winzinkayo Augustin gusa we yitabye Imana.

Ndi umuhererezi mu muryango w’abana batanu. Dufite umukobwa umwe n’abahungu bane. Ndeshya na metero imwe na 86 (1.86), nkaba mfite ibiro 75 (75kg).

Ndi umukinnyi wa UTB VC, nkina ku mwanya w’iburyo, nambara nimero 17 muri UTB VC.

Niyogisubizo Samuel uzwi nka Tayson wifuza kuzakina ku rwego mpuzamahanga

I.N: Waba warabashije kujya mu ishuri ukiga?

Nize amashuri abanza muri EP Nyakarambi, kugeza mu mwaka wa kane, nkomereza ku kindi kigo kitwa Rurenge Protestant, ari na ho nasoreje iki kiciro cy’aya mashuri.

Nize amashuri yisumbuye y’ikiciro rusange « O’level », muri Groupe Scolaire Nyakarambi, hanyuma nize ubwubatsi « Construction », mu kigo kitwa Kirehe Adventist Technical College (KATC), na yo nyasoza mu 2016.

Ubu ndimo kwiga muri Kaminuza ya UTB, mu mwaka wa mbere aho niga “Business Management.”

I.N: Ese gukina Volleyball wabikomoye he?

N.S: Volleyball, nayikomoye kuri mukuru wange witwa Muhawenimana Lambert ni we wayinkundishije cyane kuko na we yayikinnye yiga amashuri yisumbuye mu kigo kitwa St Kizito i Zaza.

I.N: Ni gute watangiye gukina umukino wa Volleyball?

N.S: Natangiye nkina amarushanwa ahuza ibigo by’amashuri “Inter-Scolaire”, nkirangiza kwiga amashuri yisumbuye y’ikiciro rusange « O’level », mu 2012 nahise nkina shampiyona bwa mbere mu 2013 muri KVC kugeza mu 2014, mpita njya muri Kirehe VC mpakina imyaka 3 (2015, 2016 na 2017) nahise nza muri UTB VC ari na ho ndi ubungubu, ndimo kubakinira umwaka w’imikino wa 2018-2019.

I.N: Mu mwaka wa mbere ukinira UTB VC byakugendeye bite?

N.S: Byabanje gusa n’ibingora kuko ni ikipe nshya nari njemo ariko gahoro gahoro nagiye mfata gahunda y’ikipe, ubu rwose nta kibazo.

I.N: Intego ushaka kugeraho muri UTB ni iyihe?

N.S: Intego ya mbere mfite ni ugutwara buri gikombe cyose gikinirwa hano mu Rwanda, muri Afurika y’ Iburasirazuba ndetse no muri Afurika muri rusange, ikindi no kuba nahamagarwa mu ikipe y’igihugu nkuru ya Volleyball.

Niyogisubizo (nomero 17), umwe mu bakinnyi bahagaze neza muri UTB VC

I.N: Hari icyo ubona gukina Volleyball byakumariye?

N.S: Yego gukina Volleyball hari icyo byamariye, icya mbere byamfashije kwiga amashuri yisumbuye ndetse na n’ubu biri kumfasha kwiga Kaminuza ndetse hari n’ibindi igenda imfasha mu buzima busanzwe.

I.N: Waba waragize amahirwe yo gukinira ikipe y’igihugu? Ese mwitaye gute?

N.S: Yego, nakiniye ikipe y’igihugu mu batarengeje imyaka 17 “U-17”, mu mwaka wa 2012 mu mikino yabereye mu gihugu cy’ Algerie ndetse tuzana umudari w’umwanya wa 3.

Aha kandi twabashije kubona itike y’igikombe k’Isi, cyabereye muri Mexico mu 2013, na ho tujyayo tuzana umwanya wa 20.

Nakiniye ikipe y’igihugu mu batarengeje imyaka 21 “U-21”, yabereye muri Tunisie mu 2013 na ho tuzana umudari w’umwanya wa gatatu ndetse n’itike y’igikombe k’Isi cyabereye muri Turquie mu 2013, twamanukanyeyo umwanya wa 20.

Nanakiniye ikipe y’igihugu mu batarengeje imyaka 23 “U-23”, mu mikino y’igikombe cy’Afurika cyabereye mu Misiri mu 2015.

I.N: Wifuza ko gukina Volleyball byazakugeza kuki?

N.S: Gukina Volleyball, icya mbere nifuza byazangezaho ni ukuba byamfasha kubaho neza hamwe n’umuryango wange.

I.N: Wumva ushaka kuzakina Volleyball ku ruhe rwego?

N.S: Nk’umukinnyi, ikifuzo cyange ni ugutera imbere, nkarushaho gukina neza nkaba naba n’umukinnyi mwiza. Nishimiye gukina muri UTB VC kandi mpabonera amahirwe menshi, numva nzakoresha neza kugira ngo nzabashe gukina amarushanwa atandukanye bityo akazamfasha no kuzamura umukino wange. Gukina ku rwego mpuzamahanga rwose ntibyangwa nabi.

I.N: Hari abo ufatiraho ikitegererezo mu bagikina cyangwa abahagaritse?

N.S: Mu bakina, ni Mutuyimana Aimable, dukinana akaba na kapiteni wange. Mpitamo gukina Volleyball, nashakaga kuzamera nka Nsabimana Eric wari uzwi nka ‘Machine”, kuko kuva nkiri muto, namubonaga nk’uwo nareberaho ndetse no kugeza ubu, ndacyamufata nk’umukinnyi mwiza.

I.N: Ni iki wabwira abantu bagize uruhare mu gutuma uba uwo uri we?

N.S: Mu rugendo rwange, nagize abantu benshi nanyuze imbere kandi baramfashije cyane, icyo navuga ni ukubashimira. Ndashimira byimazeyo, Nshimiyimana Innocent, umusifuzi waje gukorera i Kirehe, amfasha kwerekeza muri KVC, mu minsi ya mbere yange ntangira gukina Volleyball. Abandi barimo; Nsengiyumva Jean Marie wantoje muri KVC no mu ikipe y’igihugu U17, Nyirimana Fidele umutoza wange muri UTB VC ndetse na Paul Bitok, umutoza w’ikipe y’igihugu.

Niyogisubizo (ibumoso), kumwe na Niyigena basanzwe bakinana muri UTB VC

TANGA IGITEKEREZO

4 Comments on “Volleyball: Ubuzima bwa Niyogisubizo wifuza gukina ku rwego mpuzamahanga”

  1. Komeza ukore gahunda yawe ushishikaye kdi ubishyizeho umwete kandi natwe abagukunda tukanagufana turagushyigikiye cyaneee@

  2. Uyumwana wumusore niwe utuma mfana UTb. Go high Samu . with courage, hardworking and discipline you will achieve more than what you expect. Njyewe ndamufana bikaze gusa inama nakugira imikino nimyiza arko jya wibukako harigihe uzagera gukina bitagikunda hama Wibuke gusavinga ugikora ,we kwijandika munzoga nabakobwa , wite kumasomo yawe ushyizemo umwete kuko diplome yo ntiba expired upfa kuba wumva ibyo wize

Leave a Reply

Your email address will not be published. Required fields are marked *