17°C , Partly sunny | Kigali-Rwanda
Perezida wa FRVB, Karekezi Leandre (ibumoso) ahemba umwe mu bakinnyi bitwaye neza

Volleyball: Turacyabifite byinshi byo gukosora mu kiciro cy’abagore-Karekezi

Yanditswe na BUGINGO FIDELE

Ku ya 13-06-2018 saa 06:24:18

Nyuma y’irushanwa ryo kwibuka abari abakinnyi, abatoza, abayobozi n’abakunzi b’umukino wa Volleyball bazize Jenoside yakorewe Abatutsi mu 1994 “Genocide Memorial Tournament 2018”, Perezida w’ishyirahamwe ry’umukino wa Volleyball mu Rwanda “FRVB”, Karekezi Leandre  yatangaje  bishimiye uko ryagenze ariko ko hari ibyo bagomba  gukora cyane mu kiciro cy’abagore.

Perezida wa FRVB, Karekezi Leandre (ibumoso) ahemba umwe mu bakinnyi bitwaye neza

Iri rushanwa ryabaye tariki 09-10 Kamena 2018, ikipe ya Gisagara VC mu bagabo yegukanye igikombe itsinze REG VC naho mu bagore igikombe gitwarwa na Nkumba yo muri Uganda itsinze KCB yo muri Kenya.

Karekezi ati Irushanwa  ryatangiye  hitabira amakipe y’imbere mu gihugu rigenda rikura  haza  ibihugu duturanye ariko turifuza ko   hajya haza ibihugu byose by’Afurika kandi turimo gutera intambwe”.

Avuga ko hari amakipe yo muri Cameroun ndetse n’ayo muri Congo Brazzaville yari yemeye kuza  ariko biza kwanga. Ati Ririmo kugenda  riba irushanwa rikomeye abanyafurika bibonamo. Tugomba kwifashisha Volleyball kongera kubaka  ubumwe bw’Abanyarwanda n’Abanyafurika muri rusange”.

Perezida wa FRVB akomeza avuga ko iri rushanwa ryabasigiye ishusho nziza. Ati Byatweretse ko Volleyball yacu igeze ku rwego rushimishije mu bagabo amakipe yo mu Rwanda ni yo yakinnye umukino wa nyuma”.

Gusa mu kiciro cy’abagore avuga ko byaberetse ko bagifite byinshi byo gukosora.  Ati Mu by’ukuri habayemo kwirara  kuko mu myaka ishize yose  habonekaga nibura ikipe imwe yo mu Rwanda  ku mukino wa nyuma  uyu munsi kuba itabonetse  ni ukureba ibyo dukosora”.

Intego bafite kugira ngo amakipe yitabire

Karekezi ati Ibituma amakipe aza ni imikoranire myiza yacu  n’izindi federasiyo  ariko ikindi ni uko dushyiramo n’ibihembo  bishimishije  uyu mwaka  twazamuye ibihembo  uko dukomeza dushaka abafatanyabikorwa  n’abaterankunga  muri iri rushanwa bituma n’amakipe yaturutse hirya no hino  yitabira kuko   abona ko aje  ashobora  kubona tike yo kuza no gusubirayo  batagombye kwikora ku mufuka”.

Uyu mwaka hari hitabiriye amakipe 21 yose hamwe harimo 9 yaturutse hanze y’u Rwanda.

TANGA IGITEKEREZO

Leave a Reply

Your email address will not be published. Required fields are marked *