Volleyball: Shampiyona igiye gusozwa hakinwa imikino ya “Playoffs”

Yanditswe na BUGINGO FIDELE

Ku ya 27-10-2020 saa 22:37:41

Tariki 28-10-2020
Abagore
RRA VC-UTB VC (09h00)
APR VC-KVC (12h00)
Abagabo
APR VC-UTB VC (15h00)
REG VC-Gisagara VC (18h00)

Tariki 29-10-2020
Abagore
RRA VC-APR VC (09h00)
UTB VC-KVC (12h00)
Abagabo
APR VC-REG VC (15h00)
UTB VC-Gisagara VC (18h00)

Tariki 30-10-2020
Abagore
RRA VC-KVC (09h00)
APR VC-UTB VC (12h00)
Abagabo
APR VC-Gisagara VC (15h00)
REG VC-UTB VC (18h00)

Kuri uyu wa Gatatu tariki 28 Ukwakira 2020 ni bwo hatangira imikino ya kamarampaka “Playoffs”  mu rwego rwo gusoza shampiyona y’umukino wa Volleyball mu kiciro cy’abagabo n’abagore.

Kimwe no mu yindi mikino kubera COVID-19,  shampiyona ya Volleyball mu Rwanda ya 2019-2020  yarahagaze muri Werurwe 2020 gusa nyuma y’aho Leta y’u Rwanda isabye ko ibikorwa bya siporo byasubukurwa ariko hakurikizwa amabwiriza yo kwirinda, ishyirahamwe ry’umukino wa Volleyball mu Rwanda “FRVB” bateguye gahunda yo gusubukura imikino kugira ngo shampiyona isozwe.

Iyi mikino iratangira kuri uyu wa Gatatu tariki 28 izasozwe tariki 31 Ukwakira 2020. Izabera  kuri Sitade Nto Amahoro i Remera.

Ruterana Fernand, Visi Perezida  wa FRVB ushinzwe amarushanwa atangaza ko   ubusanzwe amakipe yajyaga akina ahatanira imyanya hanyuma  abashije kuza mu myanya 4 ya mbere agakina “Playoffs” kugira ngo hamenyekane igomba kwegukana igikombe.

Akomeza avuga ko  COVID-19 yatumye imikino ihagarara itarangiye aho igomba gusubukurirwa rero bakaba barahisemo guhagarikira aho byari bigeze ubundi hagakinwa irushanwa risoza “Playoffs”.

Mu bagabo amakipe agomba guhatana ni Gisagara VC, REG VC ifite igikombe giheruka, UTB VC na APR VC naho mu bagore ni  RRA VC, UTB VC, APR VC na KVC.

Uko imikino iteganyijwe

Muri buri kiciro ikipe izahura n’iyindi  hanyuma ikipe ya mbere n’iya kabiri zikine umukino wa nyuma naho ikipe ya 3 n’iya 4 zihatanire umwanya wa 3.

Ku munsi wa mbere w’iyi mikino, mu kiciro cy’abagore, ikipe ya RRA VC irakina na UTB VC naho APR VC ikine na KVC. Mu bago ikipe ya APR VC irakina na UTB VC naho REG VC ikine na Gisagara VC.

Imikino y’amajonjora izasozwa tariki 30 Ukwakira 2020 hanyuma tariki 31 Ukwakira 2020 habe imikino yo guhatanira umwanya wa 3 ndetse n’imikino ya nyuma yo guhatanira igikombe.

Mu gukomeza kwirinda COVID-19, abakinnyi b’amakipe yose bacumbikiwe ahantu hamwe  kandi imikino  abafana nta bwo bemerewe kuyitabira  ahubwo bazayikurikira  ku murongo wa kabiri wa Televiziyo y’u Rwanda “KC2” no ku zindi mbuga nkoranyambaga za FRVB.

Biteganyijwe ko ikipe ya mbere mu byiciro byombi  izahabwa igikombe na miriyoni 1 y’amafaranga y’u Rwanda, ikipe ya  kabiri izahabwa ibihumbi 800 naho iya 3 ihabwe ibihumbi 500.

FRVB yabonye umufatanyabikorwa

Ubuyobozi bwa FRVB butangaza ko  bwamaze kubona umufatanyabikorwa   ari we  “Plan International”  akaba ari we muterankunga mukuru w’iri rushanwa risoza shampiyona.

Perezida wa FRVB, Karekezi Leandre atangaza ko bagiranye ibiganiro birambuye n’uyu mufatanyabikorwa bemeranywa gukorana  igihe kirekire.

Plan International  ubusanzwe ni umuryango Mpuzamahanga uharanira uburenganzira bw’umwana n’uburinganire hagati y’abana b’abakobwa n’abahungu. Muri iyi mikino ya Volleyball bakaba bafite ubutumwa bwo gukangurira abana b’abakobwa gusubira ku ishuri “ Girls back to school”.

Perezida wa FRVB, Karekezi Leandre

Ruterana Fernand, Visi Perezida wa FRVB ushinzwe amarushanwa

 

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.