17°C , Partly cloudy | Kigali-Rwanda
Abakinnyi ba RRA VC bamaze gushyikirizwa ibirango birimo ibendera ry'igihugu n'ikigo cya RRA

Volleyball: RRA VC yasabwe kuzitwara neza mu mikino y’Afurika

Yanditswe na Nkomeje Guillaume

Ku ya 14-03-2019 saa 15:14:46

RRA VC yerekeje i Cairo mu Misiri ikaba yitabiriye imikino y’Afurika ihuza amakipe yabaye aya mbere iwayo “2019 Women’s African Club Championship” izatangira tariki 16 isozwe 26 Werurwe 2019.

Mbere y’uko ihaguruka, ejo hashize tariki 13 Werurwe 2019 yabanje gushyikirizwa ibirango birimo ibendera ry’igihugu ndetse n’irya RRA maze isabwa kuzahagararira u Rwanda neza muri iyi mikino.

Hakizimana Richard, Perezida w’icyubahiro wa RRA VC akaba na Komiseri ushinzwe imari muri RRA yasabye abakinnyi kuzitwara neza bityo bakaba bazatahana umwanya mwiza kurenza uwo babonye mu mikino iheruka.

Yagize ati “Ndabashimira kuba mumaze iminsi mwitwara neza, ariko mugende mubikomeze muzane kiriya gikombe kuko kirakenewe mu Rwanda.”

Kansiime Kagarama Julius, Visi Perezida wa mbere w’ishyirahamwe ry’umukino wa Volleyball mu Rwanda “FRVB” wabanje gushimira RRA kuba idahwema gutanga umusanzu ishyigikira iyi kipe nawe yasabye abakinnyi ba RRA VC kuzitwara neza nk’uko basanzwe babikora.

Mukashyaka Drocelle, Perezida wa RRA VC yibukije abakinnyi ko bakwiye gukora iyo bwabaga bakazana insinzi.

Ati “Ubutumwa tubahaye bukomeye ni ukubifuriza gutsinda, nk’intumwa z’u Rwanda bagomba kutuzanira insinzi kuko u Rwanda nta bwo rutsindwa ruharanira gutsinda mu bikorwa byose.”

Yungamo ati “Ikipe ihagaze neza imaze iminsi mu mwiherero abakinnyi bari hamwe bitoza, bagiye barebera hamwe aho bakeneye kuzamura barabikora kandi nabo nk’uko babitugaragarije, nta mpungenge dufite turizera tudashidikanya ko bazaba bari mu myanya ya mbere.”

Mudahinyuka Christophe wahawe gutoza RRA VC muri iyi mikino atangaza ko biteguye neza.

Ati “Ikipe ihagaze neza, yiteguye guhangana n’andi makipe. Intego tujyanye mu irushanwa, ni ugutsinda tukagera aheza hashoboka. Intego nyamukuru y’uyu mwaka ni ukuba imbere ya 5 ba mbere.”

Izabayo Regine, kapiteni wa RRA VC avuga ko nk’abakinnyi bumva biteguye gutanga imbaraga zabo bakitwara neza. Ati “Intego ni ugutsinda, twariteguye twabonye umwanya uhagije kandi twizeye y’uko tuzabikora neza nk’uko bikwiriye. Urebye turifuza kuza mu makipe 3 ya mbere.”

Mu mikino y’Afurika iheruka kubera i Cairo mu Misiri muri 2018, RRA VC yasoreje ku mwanya wa 5 ni mu gihe muri 2016 yari yabashije kugera muri ½ maze itahukana umwanya wa 4.

Abakinnyi 12 ba RRA VC berekeje mu Misiri

Aba ni Akimanizanye Ernestine, Ingabire Rolande, Izabayo Regine, Mukandayisenga Benitha, Mukantambara Seraphine, Musaniwabo Hope, Mukamana Denise, Niyomukesha Euphrance, Nyirimana Theodosie, Umutesi Marie Paul, Uwimana Beatrice, Namyalo Margret na Uwamahoro Beatrice. Abandi ni Mudahinyuka Christophe, umutoza mukuru wungirijwe na Kabila Marie Chantal, Mukamurenzi Providence ushinzwe imibereho y’ikipe, Ndayisaba Alphonse (umusifuzi) na Mukase Josiane uyoboye iyi kipe.

Abakinnyi ba RRA VC bamaze gushyikirizwa ibirango birimo ibendera ry’igihugu n’ikigo cya RRA

TANGA IGITEKEREZO

Leave a Reply

Your email address will not be published. Required fields are marked *