27°C , Mostly cloudy | Kigali-Rwanda

Volleyball: RRA VC irahura na Prisons muri ¼ mu mikino y’Afurika

Yanditswe na NKOMEJE GUILLAUME

Ku ya 12-03-2018 saa 09:14:31

 

Uyu munsi

RRA VC- Prisons (14h00)

Pipeline-Bafia (16h00)

Carthage-Shams (18h00)

Ahly – Customs (20h00)

Kuva tariki 5 kugeza 15 Werurwe 2018, i Cairo mu Misiri harimo kubera imikino y’Afurika y’amakipe yabaye aya mbere iwayo muri Volleyball y’abagore “2018 Women’s African Volleyball Club Championship” kuri ubu igeze muri ¼ k’irangiza.

Ikipe ya RRA VC irakina na Prisons yo muri Kenya 1/4 k’imikino y’Afurika

Uyu munsi  tariki 12 Werurwe 2018, ikipe ya RRA VC ihagarariye u Rwanda irakina na Prisons VC yo muri Kenya (14h00).

Uyu mukino uza kubanzirira indi mikino ya ¼, RRA VC yazamutse ari iya kabiri mu itsinda rya mbere “A” nyuma yo gustinda imikino ibiri muri 3, ifite akazi katoroshye ko kwitwara neza imbere ya Prisons VC yazamutse iyoboye itsinda “C” kuko yatsinze imikino yose uko ari 3.

RRA VC kimwe n’andi makipe yo mu Rwanda akunze kugorwa n’amakipe yo muri Kenya, umukino uheruka kuyihuza na Pipeline mu guhatanira umwanya wa 3 muri aya marushanwa mu 2016, ari nabwo yaherukaha kwitabira yaje gutsindwa amaseti 3-1.

Mu kiganiro Imvaho Nshya yagiranye na Paul Bitok, umutoza w’ikipe y’u Rwanda, akaba akomoka muri Kenya, usanzwe ukurikiranira hafi umukino wa Volleyball yemeza ko uza kuba ari umukino ukomeye. Ati “Uraza kuba ari umukino ukomeye, guhura n’ikipe ifite ubunararibonye muri iri rushanwa kuko yaritwaye inshuro 5 ndetse n’umudali wa Bronze mu mwaka ushize”.

Bitok avuga ko amakipe yo muri Kenya, akomeye mu busatirizi no kuzibira (block) gusa ko atari beza mu kwakira imipira (reception), bityo ko bishobora kubateza ibibazo ku mipira itewe  n’ikipe bahanganye (services).

 

Mu yindi mikino ya ¼ itegerejwe kuba, ikipe ya Pipeline yo muri Kenya irakina na Bafia yo muri Cameroun (16h00), Carthage yo muri Algeria ikine na Shams yo mu Misiri (18h00) naho Ahly yo mu Misiri ikine na Cutoms yo muri Nigeria (20h00).

Mu mikino yo guhatanira imyanya (9-16), Nkumba irakina na Asec (13h00), INJS irakina na Nyong (15h00), Chief irahura na FAP (17h00) naho Vision irahura na Harare City (19h00).

 

 

 

 

 

 

 

 

TANGA IGITEKEREZO

Leave a Reply

Be the First to Comment!

avatar