18°C , Mostly cloudy with thunderstorms | Kigali-Rwanda
Ikipe ya REG VC yitwaye neza yegukana igikombe k'irushanwa ribanziriza shampiyona

Volleyball: REG VC yatwaye irushanwa ribanziriza shampiyona

Yanditswe na BIZIMANA ERIC

Ku ya 23-01-2018 saa 07:19:22

Ikipe ya REG VC ni yo yegukanye  igikombe k’irushanwa ryo kwitegura shampiyona y’ikiciro cya mbere muri Volleyaball “Gisagara Pre-season Tournament 2018”  ryabaye tariki 20-21 Mutarama 2018. Ikaba yaratsinze Gisagara VC amaseti 3-0.

Ikipe ya REG VC yitwaye neza yegukana igikombe k’irushanwa ribanziriza shampiyona

Ni irushanwa ryabereye muri Gymnase ya Gisagara aho ryitabirwa n’amakipe atandatu mu makipe 9 azakina shampiyona. Ayo makipe yari agabanyije mu matsinda abiri ni aho  Gisagara VC, APR VC na  REG zari mu itsinda A  naho UTB, IPRC South na KVC zijya mu itsinda B.

REG irimo abakinnyi bafite ubunararibonye nka Kwizera Marchal na Ndamukunda Flavier n’abakinnyi bakizamuka nka Iragena Herve Martial yageze mu mikino ya ½ imaze gutsinda amakipe yose bari mu itsinda rimwe mu buryo buyoroheye, nyuma isezerera ikipe  IPRC South VC muri ½  ku maseti 3-0.

Gisagara VC irimo kwiyubaka nyuma yo kuzana umutoza ufite ubunararibonye, Nyirimana Fidele yatsinze APR VC mu matsinda inasezerera UTB  ku maseti 3-0 muri ½ .

Ku mukino w’umwanya wa gatatu, UTB yatsinze IPRC South amaseti 3-0 biyoroheye.   Ku mukino wa nyuma ikipe ya  REG VC  yongeye gusubira Gisagara VC iyitsinda amaseti 3-0 (25-21, 29-27, 25-23).

Nyirimana Fidele, umutoza wa Gisagara VC  yemeza ko iri rushanwa rimweretse ko hari byinshi agomba gukora kugira ngo abakinnyi bamenyerane.

Uyu mutoza wageze muri iyi kipe avuye muri Kirehe VC mu mwaka ushize yagize ati “Ni imyitozo tugomba gukora. Nabonye ko kubasha kwitwara neza ku  manota ya nyuma birimo kutugora. Icyo nzi ni uko nimara kubishyira byose ku murongo tuzatsinda. Icyo nzi ni uko n’ubwo tubuze iki gikombe, icya shampiyona byanze bikunze tugomba kukigumana’’.

Mana Jean Paul, umutoza wa REG VC nawe yemera ko hari isomo bakuye muri iri rushanwa. Agira ati “Byatweretse urwego turiho, n’ubwo twatsinze byatweretse aho tugomba gukosora n’aho tugomba gushyira imbaraga’’.

REG VC yatwaye iki gikombe yanahawe amafaranga ibihumbi 200, Gisagara VC  yaje ku mwanya wa kabiri ibona ibihumbi 100 na UTB yaje ku mwanya wa gatatu ibona ibihumbi 50.

Iri rushanwa rizakurikirwa n’iry’Intwari rizaba  tariki 27-28 Mutarama 2018  ribere i Kigali ryitabirwe n’amakipe yose uko ari ikenda. Nyuma shampiyona yagombaga kuzatangira tariki 27 Mutarama 2018 ikaba izatangira  tariki 03 Gashyantare 2018.

TANGA IGITEKEREZO

Leave a Reply

Be the First to Comment!

avatar